തൈറോയ്ഡ് ഇന്നത്തെ കാലത്ത് പലരേയും അലട്ടുന്ന ഒരു പ്രശ്‌നമാണ്. വ്യത്യാസപ്പെട്ടു വരുന്ന ജീവിത ശൈലികളും ഭക്ഷണ ശീലങ്ങളും ഒക്കെത്തന്നെയാണ് ഇതിനു കാരണമാകുന്നതും.

കഴുത്തില്‍ കാണുന്ന ചെറിയൊരു ഗ്രന്ഥിയാണ് തൈറോയ്ഡ്. ചെറുതെങ്കിലും ശരീരത്തിന്റെ ആകെയുള്ള പ്രവര്‍ത്തനങ്ങളെ നിയന്ത്രിച്ചു നിര്‍ത്താന്‍ കഴിയുന്ന ഒന്നാണിത്. തൈറോയ്ഡ് ഗ്രന്ഥി പുറപ്പെടുവിയ്ക്കുന്ന തൈറോസിന്‍ എന്ന ഹോര്‍മോണ്‍ തോതിലുണ്ടാകുന്ന വ്യത്യാസങ്ങളാണ് പലപ്പോഴും തൈറോയ്ഡ് പ്രശ്‌നങ്ങള്‍ക്ക് കാരണമാകാറ്.

ശരീരം തടിവെക്കുക, മാനസിക പിരിമുറുക്കം, ക്ഷീണം, വേദന, മുടികൊഴിച്ചില്‍ തുടങ്ങിയവയാണ് തൈറോയ്ഡിന്റെ ലക്ഷണങ്ങള്‍. ഇത്തരം ലക്ഷണങ്ങള്‍ കണ്ടുതുടങ്ങിയാല്‍ തന്നെ നിങ്ങള്‍ക്ക് വീട്ടില്‍ നിന്നു തന്നെ ഇതിനുള്ള പരിഹാരങ്ങള്‍ തേടാം.

തൈറോയ്ഡ് ഹോര്‍മോണിന്റെ അമിത ഉല്‍പാദനം ഹൈപ്പര്‍ തൈറോയ്ഡ് എന്ന അവസ്ഥയ്ക്കു കാരണമാകും. കുറവ് ഉല്‍പാദനം ഹൈപ്പോതൈറോയ്ഡിനും. ഇവ രണ്ടും ഒരു വിധത്തില്‍ അല്ലെങ്കില്‍ മറ്റൊരു വിധത്തില്‍ ആരോഗ്യപരമായി പല പ്രശ്‌നങ്ങളുണ്ടാക്കുകയും ചെയ്യും.

തൈറോയ്ഡിനെ പലപ്പോഴും തിരിച്ചറിയാന്‍ കഴിയുന്നില്ല. പെണ്‍കുട്ടികളിലാണ് കൂടുതലായി ഈ രോഗം കണ്ടു വരുന്നത്. ഗര്‍ഭിണിയായ സ്ത്രീക്ക് തൈറോയ്ഡ് ഉണ്ടാകുമ്പോള്‍ അത് കുഞ്ഞിനെയും ബാധിക്കുന്നു. ഇത് കുഞ്ഞുങ്ങളുടെ തലച്ചോറിനെയും പ്രതികൂലമായി ബാധിക്കും. ഗര്‍ഭിണികള്‍ തീര്‍ച്ചയായും തൈറോയ്ഡ് ടെസ്റ്റ് ചെയ്യേണ്ടതാണ്. രക്തം വഴിയാണ് തൈറോയ്ഡ് ഉണ്ടോയെന്ന് നോക്കുന്നത്.

തൈറോയ്ഡിന് മരുന്നു കഴിച്ചു തുടങ്ങിയാല്‍ ജീവിത കാലം മുഴുവന്‍ കഴിച്ചു കൊണ്ടിരിയ്ക്കണമെന്നതാണ് ഒന്ന്. ഏതൊരു പ്രശ്‌നത്തേയും പോലെ തൈറോയ്ഡിനും ചില നാച്വറല്‍ പരിഹാരരീതികളുണ്ട്. ഇതെക്കുറിച്ച് അറിയൂ,

തൈറോയ്ഡ് ചിലപ്പോള്‍ കഴുത്തില്‍ മുഴയായി മാറാം. അല്‍പം കൂടുതലാകുന്ന അവസ്ഥയിലാണ് ഇതുണ്ടാകാറ്. ഈ വീര്‍മതയ്ക്കുള്ള നല്ലൊരു പരിഹാരമാണ് ക്യാബേജ് ഇല. ക്യാബേജിന്റെ ഇല നല്ലപോലെ കഴുകി പതുക്കെ ചതച്ചോ അല്ലാതെയോ കഴുത്തില്‍ വച്ചു കെട്ടാം. ഇത് രാത്രി കിടക്കുമ്പോള്‍ കെട്ടി വച്ച് രാവിലെ നീക്കാം. അല്ലെങ്കില്‍ 10-12 മണിക്കൂര്‍ ശേഷം നീക്കാം. ഇത് അടുപ്പിച്ച് അല്‍പനാള്‍ ചെയ്യുന്നതു നല്ലതാണ്.

വെള്ള നിറത്തില്‍ മെഡിസിനല്‍ ക്ലേ ലഭിയ്ക്കും. വൈറ്റ് മെഡിസിനല്‍ ക്ലേ എന്നാണ് ഇത് അറിയപ്പെടുന്നത്. ഇത് 1 ടീസ്പൂണ്‍ 300 എംഎല്‍ നാച്വറല്‍ സ്പ്രിംഗ് വാട്ടറില്‍ കലര്‍ത്തുക. ഇത് 24 മണിക്കൂര്‍ നേരം ഇങ്ങനെ വയ്ക്കണം. ഇടയ്ക്കിടെ മരത്തവി കൊണ്ട് ഇളക്കണം. ഇത് 24 മണിക്കൂര്‍ ശേഷം കുടിയ്ക്കാം. ഇത് ശരീരത്തിലെ അപചയ പ്രവര്‍ത്തനം ശക്തിപ്പെടുത്തി തൈറോയ്ഡ് ഗ്രന്ഥിയെ സുഖപ്പെടുത്താന്‍ സഹായിക്കും.

1 ടീസ്പൂണ്‍ ആപ്പിള്‍ സിഡെര്‍ വിനെഗര്‍ 200 എംഎല്‍ വെള്ളത്തില്‍ കലക്കി ഒരു ടീസ്പൂണ്‍ തേനും ചേര്‍ത്തിളക്കി ദിവസം മൂന്നു തവണയായി പ്രധാന ഭക്ഷണത്തിനു ശേഷം കഴിയ്ക്കുക. ഇത് 1 ലിറ്റര്‍ ആപ്പിള്‍ സിഡെര്‍ വിനെഗര്‍ തീരുന്നതു വരെ തുടര്‍ച്ചയായി ചെയ്യുക. പിന്നീട് 2 ആഴ്ച കഴിയ്ക്കരുത്. പിന്നീട് വീണ്ടും ആവര്‍ത്തിയ്ക്കുക. ഇതും കഴുത്തിലെ മുഴ കുറയാന്‍ നല്ലതാണ്.

വാള്‍നട്‌സ് ഇതിനുള്ള നല്ലൊരു പരിഹാരമാണ്. തേനും വാള്‍നട്ടും കലര്‍ന്ന മിശ്രിതവും ഹൈപ്പോതൈറോയ്ഡ് മാറാന്‍ ഏറെ ഗുണകരമാണ്. ഇത് ഗ്ലാസ് ജാറിലിട്ടു വച്ച് സൂര്യപ്രകാശം കടക്കാത്ത സ്ഥലത്ത് ഒരാഴ്ച വച്ച ശേഷം ഉപയോഗിച്ചു തുടങ്ങാം. വാള്‍നട് പൊടിച്ചതോ കഷ്ണങ്ങളാക്കിയോ തേനില്‍ കലര്‍ത്തി വയ്ക്കുകയാണ് വേണ്ടത്. ദിവസവും 1 ടീസ്പൂണ്‍ കഴിയ്ക്കാം.

തേങ്ങാപ്പാല്‍ ഹൈപ്പോതൈറോയ്ഡിനുള്ള നല്ലൊരു പരിഹാരമാണ്. ദിവസവും രണ്ടു ടേബിള്‍സ്പൂണ്‍ തേങ്ങാപ്പാല്‍ കഴിയ്ക്കുന്നത് നല്ലതാണ്. വെളിച്ചെണ്ണയുടെ അതേ ഗുണങ്ങള്‍ തൈറോയ്ഡിന് തേങ്ങാപ്പാലും നല്‍കുന്നു.