ഇന്ത്യയിലെ മറ്റ് സംസ്ഥാനങ്ങളെ അപേക്ഷിച്ച് കേരളത്തില്‍ പ്രമേഹത്തിന്റെ വ്യാപ്തി രണ്ടിരട്ടി കൂടുതലാണ്. ദാ ഇപ്പോള്‍ 25 വയസ്സുമുതൽ തന്നെ പ്രമേഹം കണ്ടെത്തുന്നതിന് സ്‌ക്രീനിങ് പരിശോധനകൾ ആരംഭിക്കണമെന്ന്  നിര്‍ദേശം നല്‍കിയിരിക്കുകയാണ് ഗവേഷകർ . പ്രമേഹത്തെക്കുറിച്ച് നടത്തിയ പഠനത്തിന്റെ അടിസ്ഥാനത്തിലാണ് നിർദേശം. ഡോ. അനൂപ് മിശ്ര, മലയാളി പ്രമേഹ രോഗവിദഗ്ധൻ ഡോ. ജ്യോതിദേവ് കേശവദേവ് എന്നിവർ പഠന സംഘത്തിലുണ്ട്.

  രാജ്യത്തുടനീളം നടത്തിയ പഠനത്തിന് ശേഷം ‘ഡയബെറ്റിക് ആൻഡ് മെറ്റബോളിക് സിൻഡ്രോം-ക്ലിനിക്കൽ റിസർച്ച് ആൻഡ് റിവ്യൂസ്’ എന്ന മെഡിക്കൽ ജേണലിലാണ് പഠനഫലം പ്രസിദ്ധീകരിച്ചത്. നിലവില്‍ 30 വയസ്സാണ് സര്‍ക്കാര്‍ നല്‍കിയിരിക്കുന്ന മാര്‍ഗനിര്‍ദേശം.

കഴിഞ്ഞ പത്ത് വർഷത്തിനുള്ളിൽ ചെറുപ്പക്കാരിൽ പ്രമേഹം കണ്ടെത്തുന്നതിന്റെ തോത് കൂടിയിട്ടുണ്ടെന്നാണ് രാജ്യത്തിന്റെ വിവിധ ഭാഗങ്ങളിൽ നിന്നുള്ള ഡയബറ്റിക് കേന്ദ്രങ്ങളിൽ നിന്നുള്ള ഡാറ്റ വ്യക്തമാക്കുന്നത്. അതുകൊണ്ടുതന്നെ  25 വയസ്സുമുതൽ തന്നെ പ്രമേഹം കണ്ടെത്തുന്നതിന് സ്‌ക്രീനിങ് പരിശോധനകൾ നടത്തേണ്ട അവസ്ഥയാണെന്നാണ് ഗവേഷകർ അഭിപ്രായപ്പെടുന്നത്.

25 വയസ്സുള്ള ഒരാൾക്ക് കുടവയർ, അമിതവണ്ണം, അമിതഭാരം, കുടുംബത്തിൽ പ്രമേഹ പാരമ്പര്യം എന്നിവയുണ്ടെങ്കിൽ വർഷത്തിലൊരിക്കലെങ്കിലും പ്രമേഹ പരിശോധന നടത്തണമെന്നും ഗവേഷകർ നിർദേശിക്കുന്നു.

 ഈ സാഹചര്യത്തില്‍ കൊഴുപ്പ്, മധുരം, ഉപ്പ് എന്നിവ കുറഞ്ഞ ഭക്ഷണം ചെറുപ്പം മുതല്‍ തന്നെ ഭക്ഷണശീലങ്ങളില്‍ ഉള്‍പ്പെടുത്താന്‍ ശ്രദ്ധിക്കണം.

 ഡയബറ്റിക് കേന്ദ്രങ്ങളില്‍ നിന്നുള്ള ഡാറ്റ വിശകലനം ചെയ്തതില്‍ നിന്നും ഗവേഷകര്‍ക്ക് മനസ്സിലാക്കാനായത് 30 വയസ്സിന് താഴെയുള്ള 77.6 ശതമാനം പേരും അമിതവണ്ണവും ഭാരവും ഉള്ളവരാണെന്നാണ്. കൂടുതൽ ചെറുപ്പക്കാരാണ് പ്രമേഹം മൂലം ഗുരുതര ആരോഗ്യപ്രശ്‌നങ്ങൾ നേരിടുന്നത്. ഗുരുതരമായ സാമൂഹിക-സാമ്പത്തിക പ്രത്യാഘാതങ്ങളും പ്രമേഹം മൂലം ഉണ്ടാകുന്നുവെന്നും പഠനത്തിൽ വിലയിരുത്തിയിട്ടുണ്ട്.

ഇന്ത്യയില്‍ 77 മില്ല്യണ്‍ പ്രമേഹ രോഗികളാണുള്ളത്. കഴിഞ്ഞ 8-10 വര്‍ഷങ്ങളായി അനിയന്ത്രിതമായ പ്രമേഹം മൂലം സങ്കീര്‍ണതകള്‍ വര്‍ധിച്ചുവരുകയാണ്. രാജ്യത്തെ 50-90 ശതമാനം രോഗികളിലാണ് ഈ അവസ്ഥ ഉണ്ടാകുന്നത്. പ്രമേഹ ചികിത്സയ്ക്കും വൃക്കസ്തംഭനം, നാഡീവ്യവസ്ഥയിലെ തകരാറുകള്‍, കണ്ണിന്റെ പ്രശ്‌നങ്ങള്‍ തുടങ്ങി പ്രമേഹത്തിന്റെ സങ്കീര്‍ണതകള്‍ ചികിത്സിക്കാനുമായി ലക്ഷക്കണക്കിന് രൂപയാണ് ഓരോ വര്‍ഷവും ചെലവഴിക്കുന്നത്. അതിനാല്‍ തന്നെ പ്രമേഹം നേരത്തെ കണ്ടെത്താനുള്ള പരിശോധനകളും ആരോഗ്യകരമായ ജീവിതശൈലിയും എത്രയും പെട്ടെന്ന് നടപ്പിലാക്കണമെന്നും ഡോ. ജ്യോതിദേവ് കേശവദേവ് പറഞ്ഞു.