തലതിരിഞ്ഞൊരു വീടിനു പിന്നാലെയാണ് ഇപ്പോള്‍ മലേഷ്യയിലെത്തുന്ന വിനോദസഞ്ചാരികള്‍. ഒരു വീട് വേരോടെ പിഴുത് കുത്തനെ വച്ചാല്‍ എങ്ങനെയുണ്ടാകും, ആ രീതിയില്‍ പണി കഴിപ്പിച്ച 'കെഎല്‍ അപ്‌സൈഡ് ഡൗണ്‍' വീട് കാണാന്‍ ദിവസവും നാനൂറോളം പേരാണ് എത്തുന്നത്. 

കഴിഞ്ഞ മാസമാണ് വീട് സന്ദര്‍ശകര്‍ക്കായി തുറന്നത്. മീഡിയം വലിപ്പത്തിലെ ഒരു ഇംഗ്ലിഷ് കോട്ടേജാണ് കെഎല്‍ അപ്‌സൈഡ് ഡൗണ്‍. 80 ശതമാനം സ്റ്റീലും 20 ശതമാനം മരവും ഉപയോഗിച്ചാണ് നിര്‍മാണം പൂര്‍ത്തിയാക്കിയത്. ഒരോ ഇഞ്ചിലും തലകുത്തനെ എന്ന നിര്‍ബന്ധം പാലിക്കാന്‍ സൂക്ഷ്മത പാലിച്ചായിരുന്നു പ്രവൃത്തി മുഴുവന്‍. ചിത്രങ്ങള്‍ കണ്ടാല്‍തന്നെ അറിയാം വീടുണ്ടാക്കാന്‍ എത്രമാത്രം ബുദ്ധിമുട്ടിക്കാണുമെന്ന്.

സാധാരണ വീടുപോലൊക്കെ തന്നെ, ബെഡ് റൂമുകളും അടുക്കളയും ബാത്‌റൂമും ലിവിങ്‌റൂമും പ്ലേ റൂമുമെല്ലാമുണ്ട്. ഡൈനിങ് ടേബിളും കിടക്കയും ഫര്‍ണിച്ചറുമെല്ലാം ശ്രദ്ധയോടെ തലതിരിച്ച് ക്രമീകരിച്ചിരിക്കുകയാണ് വീട്ടില്‍. 20 അടി ഉയരമുള്ള ഇരുനില വീടിന് 2000 ചതുരശ്ര അടിയാണ് വിസ്താരം.

വീടുകാണാനെത്തുന്നവരില്‍ നാട്ടുകാരും വിദേശികളുമെല്ലാം പെടും. സന്ദര്‍ശകര്‍ക്കു വീടിന്റെ ചിത്രങ്ങളും വിഡിയോകളും എടുക്കുന്നതിനു വിലക്കൊന്നുമില്ല. ശരിയായ ടെക്‌നിക് ഉപയോഗിച്ചു ചിത്രമെടുത്താല്‍ നമ്മള്‍ സീലിങ്ങിലൂടെ നടന്നു നീങ്ങുന്നതായി തന്നെ ക്യാമറയില്‍ പതിയും.

വീടിന്റെ കാര്‍പോര്‍ച്ചില്‍ നിര്‍ത്തിയിട്ടിരിക്കുന്ന മഞ്ഞ ബീറ്റില്‍ കാര്‍വരെ തലകുത്തനെയാണ്. മൂന്നുമാസംകൊണ്ടാണ് വീടു നിര്‍മാണം പൂര്‍ത്തീകരിച്ചത്. മലേഷ്യയിലെ ഏറ്റവും ഉയരംകൂടിയ അപ്‌സൈഡ് ഡൗണ്‍ വീടാണ് ഇത്. വീടിനോട് ചേര്‍ന്നു ഇതുപോലെതന്നെ തല തിരിഞ്ഞൊരു പൂന്തോട്ടമൊരുക്കുകയാണ് അടുത്ത ലക്ഷ്യം. ഈ വര്‍ഷംതന്നെ പൂര്‍ത്തിയാക്കാനാണ് അന്വര്‍ ലക്ഷ്യമിടുന്നത്.