ഭുമിയെ ചുറ്റുന്ന ഒരു കെട്ടിടം എന്താ കൗതുകം തോന്നുന്നുണ്ടോ? എന്നാൽ ഇതിനെ വെറും കൗതുകം ആയി തള്ളിക്കളയേണ്ട. അത്തരത്തിൽ ഒരു നിർമ്മാണം പ്രാവർത്തികമാക്കാൻ പോവുകയാണ് അമേരിക്കയിലെ ക്ലൗഡ്‌സ് ആർക്കിടെക്ചർ പ്രവർത്തകർ. ആർക്കിടെക്‌ചറിന്റെ ഇതുവരെ തുടർന്നുവന്ന എല്ലാ സിദ്ധാന്തങ്ങളെയും തകർത്തെറിഞ്ഞു കൊണ്ടാണ് ഇവർ കഴിഞ്ഞ ദിവസം ഇങ്ങനെ ഒരു ആശയത്തിൽ എത്തിയത്. ആശയം മാത്രമല്ല അതിനുവേണ്ട രൂപരേഖകളും പദ്ധതികളും ഇവർ തയാറാക്കിയിട്ടുണ്ട്.
ആകാശത്തിൽ ഉറപ്പിച്ച ഒരു കെട്ടിടം! കൃത്യമായി പറഞ്ഞാൽ ഭൂമിയുടെ ഭ്രമണപഥത്തിൽ കറങ്ങുന്ന ഒരു ഛിന്നഗ്രഹത്തിലായിരിക്കും ഈ കെട്ടിടം ഉറപ്പിക്കുക. അനാലീമ ടവർ എന്നാണ് ഈ ഭാവികാലകെട്ടിടത്തിന് അവർ പേരിട്ടിരിക്കുന്നത്.
2021 ൽ ഭൂമിക്കു സമീപം കടന്നുപോകുന്ന ഒരു ചിന്നഗൃഹത്തെ വലയിട്ടുപിടിച്ചു ഭൂമിയുടെ വരുതിയിൽ കൊണ്ടുവരാൻ നാസ പദ്ധതി തയ്യാറാക്കുന്നുണ്ട്. യൂണിവേഴ്സൽ ഓർബിറ്റൽ സപ്പോർട് സിസ്റ്റം എന്നുപേരിട്ടിരിക്കുന്ന ഈ പദ്ധതിയിൽ, ആദ്യം ഒരു ചിന്നഗൃഹത്തെ ഭുമിയിലേക് കൊണ്ടുവരുന്നു. പിന്നീട്, ഒരു കെട്ടിടം ഭൂമിയിൽ നിന്നുകൊണ്ടുവന്ന് ഉരുക്കിന്റെ ശക്തിയുള്ള കേബിളുകൾ കൊണ്ട് ചിന്നഗൃഹത്തിൽ കെട്ടിയിടുന്നു. ബഹിരാകാശനിലയങ്ങൾ നിർമിക്കുന്നതിന് സമാനമായി, പ്രീഫാബ്രിക്കേറ്റഡ് മൊഡ്യൂളുകൾ ആകാശത്ത് വച്ച് കൂട്ടിച്ചേർത്തായിരിക്കും കെട്ടിടം നിർമിക്കുക.

ദുബായിക്ക് മുകളിൽ വച്ച് കെട്ടിടം ഉറപ്പിക്കാനാണ് പദ്ധതിയിട്ടിരിക്കുന്നത്. കടുത്ത അന്തരീക്ഷ മർദത്തെയും വിവിധ മേഖലകളുടെ താപനിലകളെയും പ്രതിരോധിക്കുന്ന വസ്തുക്കളാണ് നിർമാണത്തിന് ഉപയോഗിക്കുക. ഭൂമിക്കൊപ്പം ഭ്രമണം ചെയ്യുന്നതോടൊപ്പം വൈവിധ്യമാർന്ന ഭൂപ്രകൃതി കെട്ടിടത്തിനുള്ളിൽ ഇരുന്നുതന്നെ ആസ്വദിക്കാനാകും. സോളാർ പാനലുകളിലൂടെയായിരുക്കും ആവശ്യമായ വൈദ്യുതി ഉത്പാദിപ്പിക്കുക. മഴമേഘങ്ങളെ ഘനീഭവിപ്പിച്ചായിരിക്കും ജലലഭ്യത വരുത്തുക. ആദ്യഘട്ടത്തിൽ പാരച്യൂട്ടുകളിലായിരിക്കും താമസക്കാർക്ക് ഭൂമിയിലേക്ക് പോകാൻ അവസരമൊരുക്കുക! നിര്മാണരംഗത് ഒരുവലിയ ചുവടുവയ്പാകും ഇത് എന്ന കാര്യത്തിൽ സംശയമില്ല.