സ്വന്തമായി ഒരു വീട് അത് ഏവരുടെയും സ്വപ്നമാണ്. വീടുകളെക്കുറിച്ചുള്ള കാഴ്ചപ്പാട് പലർക്കും പല രീതിയിലാണ്. ചിലർ സിറ്റിയെ ഇഷ്ടപെടുമ്പോൾ മറ്റുചിലർ ഗ്രാമഭംഗി ആസ്വദിക്കാൻ ഇഷ്ടപെടുന്നു. ലോകത്തിലെ ഏറ്റവും ഉയരം കൂടിയ വീട് വില്‍പനയ്ക്ക്. എവിടെയാണെന്നല്ലേ അമേരിക്കയിലെ അരിസോണയില്‍ മലനിരകളില്‍ ആണ് ആദ്യ ദർശനത്തിൽ തന്നെ ആരെയും മോഹിപ്പിക്കുന്ന ഈ സ്വപ്നസൗധം.

മലനിരകള്‍ക്കു ഇടയിലെ ഈ സ്വപ്നവീട് സ്വന്തമാക്കണം എന്ന് ആഗ്രഹിക്കുന്നവർ ഇതിന്റെ വില കുടി കേട്ടോളു. 1.5 മില്ല്യന്‍ ഡോളര്‍ അതായത്ഏകദേശം 9,72,00,000 രൂപ ഉണ്ടെങ്കില്‍ ഈ വീട് സ്വന്തമാക്കാം .

അരിസോണയിലെ പ്രസ്‌കോട്ടില്‍ തംബ് ബട്ട്, ഹംഫ്രേസ്, ബില്‍ വില്ല്യംസ്, സാന്‍ഫ്രാന്‍സിസ്‌കോ എന്നീ മലനിരകള്‍ക്ക് നടുവിലെ മനോഹരമായ ഭൂപ്രദേശത്താണ് ഈ വീട് സ്ഥിതി ചെയ്യുന്നത്. ആകാശം മുട്ടെ ഉയര്‍ന്നു നില്‍ക്കുന്ന ഈ വീടിന്റെ പേരും രസകരമാണ്- ഫാല്‍കണ്‍ നെസ്റ്റ് അഥവാ പരുന്തിന്‍കൂട്.6,200 ചതുരശ്ര അടി വിസ്തീര്‍ണമുള്ള ഈ പത്തു നില വീട്ടില്‍ പക്ഷെ ഒരു കുടുംബത്തിനു താങ്ങാന്‍ ഉള്ള സ്ഥലം മാത്രമേ ഉള്ളൂ എന്നതാണ് മറ്റൊരു കൌതുകം.

124 അടി ഉയരവും ഒരു നിലയില്‍ നിന്ന് അടുത്ത നിലയിലേക്ക് എത്താന്‍ ഹൈഡ്രോളിക് എലവേറ്ററുമുള്ള ഈ ആഡംബര സൗധത്തില്‍ മൂന്ന് കിടപ്പുമുറികള്‍ മാത്രമാണ് ഉള്ളത്. ചൂടുകാലത്ത് വീടാകെ തണുപ്പിക്കാനും ശൈത്യകാലത്ത് ചൂടുപകരാനും പ്രത്യേക സംവിധാനങ്ങളും ഇവിടെ ഒരുക്കിയിട്ടുണ്ട്. ഇന്ത്യന്‍ വംശജനായ സുകുമാര്‍ പാലാണ് ഫാല്‍കണ്‍ നെസ്റ്റിന്റെ നിര്‍മ്മാതാവ്.1994ലാണ് അദ്ദേഹം ഈ വീട് നിര്‍മ്മിച്ചത്.
ചില്ലുകൊണ്ടുള്ള ഭിത്തികളായതിനാൽ ചുറ്റുമുള്ള മലനിരകളുടെയും അരിസോണയിലെ മരുഭൂമിയുടെയും സൗന്ദര്യം 360 ഡിഗ്രിയില്‍ വീടിനുള്ളില്‍ ഇരുന്നു തന്നെ ആസ്വദിക്കാം എന്നതും ഇതിന്റെ പ്രത്യേകതയാണ്.
അംബാനിയുടെ മുംബൈയിലെ അന്റീലിയ എന്ന സൗധം ഫാല്‍കണ്‍ നെസ്റ്റിനേക്കാളും ഉയരമുള്ളതാണ്.എന്നാല്‍ ഒരു കുടുംബത്തിനു മാത്രം താമസിക്കാനുള്ള സൗകര്യങ്ങളുള്ള ഏറ്റവും വലിയ വീട് എന്ന വിശേഷണമാണ് ഫാല്‍കണ്‍ നെസ്റ്റിനെ വ്യത്യസ്തമാക്കുന്നത്.