വാസ്തു വിദഗ്ധനെ എങ്ങനെ തെരഞ്ഞെടുക്കണം?
ഏവരുടേയും സ്വപ്നമാണ് സ്വന്തമായി ഒരു വീട് . ആ സ്വപ്നം സാക്ഷാത്ക്കരിക്കുവാന്‍ തീരുമാനിക്കുമ്പോള്‍ നമ്മള്‍ പണിയുവാന്‍ തീരുമാനിച്ച വീട് സ്ഥിതിചെയ്യുന്ന ഭൂമിയെ പറ്റിയും, വീടിനെ പറ്റിയും വാസ്തു ശാസ്ത്രപരമായ അറിവുകള്‍ നാം ആര്‍ജ്ജിക്കേണ്ടതുണ്ട്. അല്ലാത്തപക്ഷം നമ്മള്‍ നിര്‍മ്മിക്കുന്ന പ്രിയപ്പെട്ട ഭവനം നമുക്ക് തന്നെ ദോഷകരമായിത്തീരും.
ഭാരതത്തിന്റെ പാരമ്പര്യ ശാസ്ത്രശാഖകളിലൊന്നാണ് വാസ്തു. ബ്രഹ്മാവില്‍ നിന്നും, വിശ്വകര്‍മ്മാവ്, യമന്‍ എന്നീ ആചാര്യന്‍മാരിലൂടെ മനുഷ്യകുലത്തില്‍ പ്രചാരത്തിലായ വാസ്തു ശാസ്ത്രത്തിന്റെ അടിത്തറ ആത്മീയ ആചാര്യന്മാരുടെ അപാരമായ ജ്ഞാനബോധവും, ഗണിതശാസ്ത്രത്തിന്റെ അനന്ത സാധ്യതകളും കൂട്ടിയിണക്കികൊണ്ടുള്ളതാണ്. ദൈവം മനുഷ്യന്റെ നന്മയ്ക്കും, അഭിവൃദ്ധിയ്ക്കുമായി അറിഞ്ഞു നല്‍കിയതെന്ന് വിശ്വസിക്കപ്പെടുന്ന വാസ്തു ശാസ്ത്രം ആയിരക്കണക്കിന് വര്‍ഷങ്ങള്‍ക്കു മുന്‍പേ ഗുരുശിഷ്യ ബന്ധത്തിലൂടെ ഭാരതത്തില്‍ പ്രചരിച്ചിരുന്നു.
ഈ ആധുനിക യുഗത്തില്‍ ഒരു ഗൃഹം പണിയുമ്പോള്‍ മികച്ച വാസ്തുശാസ്ത്രകാരനെ തിരഞ്ഞെടുക്കുമ്പോള്‍ ചില പ്രധാന കാര്യങ്ങള്‍ നാം ഓര്‍മ്മയില്‍ സൂക്ഷിക്കേണ്ടതായിട്ടുണ്ട്. നാം താമസിച്ചുകൊണ്ടിരിക്കുന്ന ഗൃഹത്തിന്റെ വാസ്തു നോക്കുമ്പോഴും ഇക്കാര്യങ്ങളില്‍ ചിലതൊക്കെ ശ്രദ്ധിക്കണം. ഗൃഹനിര്‍മ്മിതിയ്ക്കുള്ള വാസ്തു തിരഞ്ഞെടുക്കുന്നതിനു മുന്‍പായിതന്നെ വാസ്തു ആചാര്യന്മാരുടെ സേവനം ഉപയോഗപ്പെടുത്തി തുടങ്ങിയിരിക്കണം.
ഗൃഹനിര്‍മ്മാണം പൂര്‍ത്തിയാകുന്നതുവരെയുള്ള കാര്യങ്ങള്‍ പൂര്‍ണ്ണമായും വാസ്തു വിദഗ്ധന്റെ നിര്‍ദ്ദേശപ്രകാരം മാത്രമേ ചെയ്യാവൂ. ഉദാഹരണമായി പറയുകയാണെങ്കില്‍, ഒരു ഭവനത്തിന്റെ പ്രധാനപ്പെട്ട ഭാഗമാണ് അടുക്കള. അടുക്കളയുടെ സ്ഥാനം എവിടെയായിരിക്കണം. എന്നതു കൂടാതെ ജനലുകളും, വാതിലുകളും എവിടെയായിരിക്കണം, അടുപ്പുകള്‍ എവിടെയായിരിക്കണം, അടുക്കള ഉപകരണങ്ങള്‍ സൂക്ഷിക്കേണ്ടത് എവിടെയാണ്, ഇലക്ട്രിക്ക് സ്വിച്ചുകളുടെ സ്ഥാനം എവിടെയാണ് തുടങ്ങി എല്ലാ കാര്യങ്ങളും വ്യക്തമായി പറഞ്ഞു തരുവാന്‍ മാത്രം അറിവുള്ള ഒരു വാസ്തു വിദഗ്ധന്റെ സേവനം മാത്രമേ സ്വീകരിക്കാവൂ. അല്ലാത്തപക്ഷം നിങ്ങളുടെ ഗൃഹം നിങ്ങള്‍ക്കു തന്നെ ദോഷകരമായി ഭവിച്ചേക്കാം.
ഇനി ഒരു മികച്ച വാസ്തു വിദഗ്ധനെ എങ്ങനെ തിരഞ്ഞെടുക്കണമെന്ന് നോക്കാം. നിങ്ങള്‍ സമീപിക്കുന്ന വാസ്തു വിദഗ്ധന്‍ വാസ്തു വിദ്യ പാരമ്പര്യമായി കൈകാര്യം ചെയ്യുന്ന കുടുംബത്തിലെ അംഗമാണോ എന്ന് നോക്കുക. തന്റെ പൂര്‍വ്വികരെപ്പോലെ വൈദഗ്ധ്യം ഉള്ള ആളാണോ എന്ന് അന്വേഷിച്ച് മനസ്സിലാക്കുക. സ്‌കോളര്‍ ആണെങ്കില്‍ അയാളുടെ യോഗ്യതകള്‍ മനസ്സിലാക്കുക. അവ സത്യസന്ധമാണെന്ന് ഉറപ്പിക്കുക.
വാസ്തു വിദഗ്ധന്റെ പ്രവര്‍ത്തി പരിചയ കാലയളവ് മനസ്സിലാക്കുക. ഏതെങ്കിലും വിധ സാമ്പത്തിക ക്രമക്കേടുകള്‍ നടത്തിയിട്ടുള്ള ആള്‍ ആണോ എന്ന് അന്വേഷിക്കുക. ദൈവഭക്തിയുള്ള ആള്‍തന്നെയാണോ എന്ന് പ്രത്യേകം ശ്രദ്ധിക്കുക. സാമ്പത്തിക ദുര്‍വ്യയം വരുത്തുന്ന ആള്‍ ആണോ എന്ന് അന്വേഷിക്കുക, വസ്തു കണ്ടെത്തുന്നതു മുതല്‍ ഗൃഹനിര്‍മ്മാണം പൂര്‍ത്തീകരണം വരെ സേവനം തരുന്ന ആള്‍ ആണെന്ന് ഉറപ്പു വരുത്തുക.
വാസ്തു വിദഗ്ധന്‍ തരുന്ന നിര്‍ദ്ദേശങ്ങളില്‍ ഏതെങ്കിലും കാര്യങ്ങളില്‍ വിശ്വസം തോന്നാതിരുന്നാല്‍ കൂടുതല്‍ വിശദീകരണം ആവശ്യപ്പെടുക. എന്നിട്ടും സംശയം തോന്നുന്നുവെങ്കില്‍ മറ്റൊരു വാസ്തു വിദഗ്ധനെ സമീപിച്ച്് സംശയനിവാരണം നടത്തുക. വാസ്തു വിദഗ്ധനുമായി ഊഷ്മളവും ആദരവുമുള്ള സ്‌നേഹബന്ധം നിലനിര്‍ത്തുക. വാസ്തു വിദഗ്ധന്റെ സേവനങ്ങള്‍ക്ക് അര്‍ഹവും മാന്യവുമായ പ്രതിഫലം നല്‍കുക. ഗൃഹവാസം തുടങ്ങിയ ശേഷവും ആ ബന്ധം അതേ അളവില്‍ നിലനിര്‍ത്തുക. ഐശ്വര്യമുള്ള ഒരു നല്ല ഗൃഹം അത് നമ്മുടെ ആയുരാരോഗ്യത്തിനും, അഭിവൃദ്ധിയ്ക്കും ആവശ്യമാണെന്ന് മനസ്സിലാക്കി ഗൃഹത്തെ പരിപാലിക്കുക. എങ്കില്‍ തീര്‍ച്ചയായും നിങ്ങളുടെ ഗൃഹം നിങ്ങള്‍ക്ക് സര്‍വ്വ എൈശ്വര്യങ്ങളും നല്‍കും.
https://www.facebook.com/Malayalivartha
