ഭാരതത്തിലെ ഋഷിപരമ്പരയ്ക്ക് പ്രപഞ്ചത്തിലെയും, ഭൂമിയിലെയും കാന്തികപ്രഭാവങ്ങളെപ്പറ്റി വ്യക്തമായ അറിവുണ്ടായിരുന്നു. അത് മനസ്സിലാക്കിയാണ് നമ്മുടെ പൂര്‍വ്വികര്‍ വാസ്തുശാസ്ത്രവിധിപ്രകാരം ഗൃഹനിര്‍മ്മാണം നടത്തിയിരുന്നത്.

വസ്തുവില്‍ ഗൃഹം പണിയുമ്പോള്‍ വസ്തുവുമായി ബന്ധപ്പെട്ട ഊര്‍ജ്ജമേഖലകളെ പറ്റിയുള്ള ധാരണകള്‍ ഗുണകരമായ രീതിയില്‍ അവര്‍ ഗൃഹനിര്‍മ്മാണ വേളയില്‍ പ്രാവര്‍ത്തികമാക്കി. ഗൃഹത്തിലെ ഓരോ മുറികള്‍ക്കും അവര്‍ പ്രത്യേക ശ്രദ്ധ നല്‍കി. മികച്ച വാസ്തുഗൃഹങ്ങള്‍ നിര്‍മ്മിച്ച് ആ ഗൃഹങ്ങളില്‍ അവര്‍ സന്തോഷത്തോടെ ജീവിച്ചു.

ഗൃഹനിര്‍മ്മാണശേഷമുള്ള ഗൃഹവാസം എങ്ങനെയായിരിക്കണമെന്ന കാര്യത്തിലും നമ്മുടെ പൂര്‍വ്വികര്‍ക്ക് വ്യക്തത ഉണ്ടായിരുന്നു. ഓരോ മുറിയിലെയും കാന്തികപ്രവാഹത്തെ കുറിച്ചും, എങ്ങിനെയാണ് ആ മുറിയില്‍ വസിക്കേണ്ടത് എന്നതിനെ കുറിച്ചും അവര്‍ക്ക് അറിവുണ്ടായിരുന്നു.

വാസ്തുശാസ്ത്രം നമുക്ക് പകര്‍ന്നു തന്ന അറിവുകളില്‍ പ്രധാനപ്പെട്ട ഒന്നാണ് ശയനദിശ. ഉറക്കസമയത്ത്, നമ്മളിലും, നമ്മുക്കു ചുറ്റുമുള്ള കാന്തികപ്രവാഹത്തിന്റെ സ്വാധീനത്തെ അധികരിച്ചാണ് ശയനദിശ ചിട്ടപ്പെടുത്തിയിരിക്കുന്നത്.

ഭൂമിയിലെ കാന്തികബലരേഖകളുടെ ഉത്ഭവം ഉത്തരധ്രൂവം ആണ്. അവസാനിക്കുന്നതാകട്ടെ ദക്ഷിണധ്രൂവത്തിലും. ഇപ്രകാരം സഞ്ചരിക്കുന്ന കാന്തികതരംഗങ്ങളെ അടിസ്ഥാനമാക്കിയാണ് ശയനദിശ രൂപപ്പെടുത്തിയിരിക്കുന്നത്. വിപരീത ദിശയിലുള്ളവ തമ്മില്‍ ആകര്‍ഷിക്കുകയും, സമാന ദിശയിലുള്ളവ തമ്മില്‍ വികര്‍ഷണം ഉണ്ടാകുകയും ചെയ്യുന്നു എന്നതാണ് കാന്തികബലരേഖകളുമായി ബന്ധപ്പെട്ട സിദ്ധാന്തം.

അതിന്‍പ്രകാരം നാം വടക്കോട്ട് തലവച്ചുറങ്ങുകയാണെങ്കില്‍ നമ്മുടെ ശരീരത്തിലെ കാന്തികബലരേഖ ഭൂമിയിലെ കാന്തികബലരേഖയ്ക്ക് സമാന്തരമാകുന്നു. ഇത് വികര്‍ഷണ സ്വഭാവമാണ് പ്രകടിപ്പിക്കുക. തന്‍മൂലം വടക്കുദിശയില്‍ തലവച്ചുറങ്ങുന്നവര്‍ക്ക് ശാരീരിക അസ്വസ്ഥതകളും, മാനസിക പ്രശ്‌നങ്ങളും ഉണ്ടാകുവാന്‍ സാദ്ധ്യതയേറെയാണ്. എന്നാല്‍ തെക്കോട്ട് തലവച്ചുറങ്ങിയാല്‍ ഫലം മറിച്ചാകുന്നു.

ഭൂമിയുടെ കാന്തികബലവും, ശരീരത്തിന്റെ കാന്തികബലവും വിരുദ്ധധ്രൂവങ്ങളിലായതിനാല്‍ അവ തമ്മില്‍ ആകര്‍ഷണം ഉണ്ടാകുന്നു. ഇതുമൂലം ശരീരത്തിന്റെ കാന്തികബലത്തിന് ക്ഷതമൊന്നും സംഭവിക്കുന്നില്ല. ശരീരവും, മനസ്സും പൂര്‍ണ്ണ ആരോഗ്യത്തോടുകൂടി നിലനില്‍ക്കുകയും ചെയ്യും.

ഇക്കാരണത്താല്‍ ആണ് ശയനദിശയ്ക്ക് ഏറ്റവും ഉത്തമ ദിക്കായി തെക്ക് ദിക്കിനെയും, ഏറ്റവും അധമദിക്കായി വടക്കു ദിക്കിനെയും കണക്കാക്കുന്നത്. മേല്‍ പറഞ്ഞ സിദ്ധാന്തപ്രകാരം തെക്ക് ദിക്ക് ശയനത്തിന് ഏറ്റവും ഉത്തമവും, കിഴക്ക് ദിക്ക് ഉത്തമവും, പടിഞ്ഞാറ് ദിക്ക് അധമവും, വടക്ക് ദിക്ക് ഏറ്റവും അധമവുമാണ്. വെടക്കു തലപോലും വടക്കു വയ്ക്കരുത് എന്നൊരു നാട്ടുമൊഴി തന്നെയുണ്ട്!

തെക്ക്, കിഴക്ക് ദിക്കുകള്‍ ശയനത്തിനായി തിരഞ്ഞെടുക്കുന്നവരുടെ ശരീരത്തിനും മനസ്സിനും ദോഷകരമായ കാന്തികക്ഷതമൊന്നും സംഭവിക്കുകയില്ല എന്നുമാത്രമല്ല പൂര്‍ണ്ണ ആരോഗ്യം ശരീരത്തിനും മനസ്സിനും ഉണ്ടായിരിക്കുകയും ചെയ്യും. ശരീരം ഒരു ക്ഷേത്രമാണ്. അറിവില്ലായ്മകൊണ്ട് അതിലെ കാന്തിക പ്രഭാവത്തെ ക്ഷതപ്പെടുത്തുമ്പോള്‍ നഷ്ടമാകുന്നത് ആരോഗ്യ പൂര്‍ണ്ണമായൊരു ജീവിതമാണ്.