യു.എ.ഇ അടക്കമുള്ള രാജ്യങ്ങളില്‍ ഇന്ത്യന്‍ പാസ്പോര്‍ട്ടിന് ക്ഷാമം അനുഭവപ്പെടുന്നതിനാല്‍ അപേക്ഷകര്‍ ആഴ്ചകളോളം കാത്തിരിക്കേണ്ടി വരും. പുതിയ പാസ്പോര്‍ട്ട് ലഭിക്കാനും നിലവിലുള്ളവ പുതുക്കാനും അപേക്ഷ നല്‍കിയവരാണ് കാത്തിരിക്കേണ്ടി വരുന്നത്. ഇന്ത്യയില്‍ നിന്ന് പാസ്പോര്‍ട്ട് ബുക്ക്ലെറ്റുകള്‍ വരുന്നതില്‍ നേരിടുന്ന കാലതാമസമാണ് അപേക്ഷകര്‍ക്ക് ബുദ്ധിമുട്ടുണ്ടാക്കുന്നത്. 36 പേജുള്ള സാദാ പാസ്പോര്‍ട്ടാണ് എംബസികളിലും കോണ്‍സുലേറ്റുകളിലും ഇല്ലാത്തത്. 64 പേജുള്ള ജംബോ പാസ്പോര്‍ട്ടുകള്‍ക്ക് ക്ഷാമം നേരിടുന്നുണ്ടുവെങ്കിലും അത്യാവശ്യക്കാര്‍ക്ക് നല്‍കുന്നുണ്ട്. 
ഇന്ത്യയില്‍ പാസ്പോര്‍ട്ട് അച്ചടിയില്‍ ഉണ്ടായ ബുദ്ധിമുട്ടുകളാണ് വിദേശ രാജ്യങ്ങളില്‍ അടക്കം പ്രതിഫലിക്കുന്നത്. നാസിക്കിലെ ഇന്ത്യന്‍ സെക്യൂരിറ്റി പ്രസില്‍ മാത്രമാണ് പാസ്പോര്‍ട്ട് അച്ചടിക്കുന്നത്. ഇതിനുള്ള ലാമിനേറ്റഡ് പേപ്പറിന്‍െറ ഇറക്കുമതിയില്‍ നേരിടുന്ന തടസ്സമാണ് പുതിയ ബുക്ക്ലെറ്റുകളുടെ ക്ഷാമത്തിന് കാരണമാകുന്നതെന്നാണ് സൂചന.
ലാമിനേറ്റഡ് പേപ്പര്‍ ഇല്ലാതിരുന്നതിനെ തുടര്‍ന്ന് 2014 ആദ്യത്തില്‍ നാസിക്കിലെ സെക്യൂരിറ്റി പ്രസില്‍ രണ്ടാഴ്ച അച്ചടി മുടങ്ങിയിരുന്നു. 2014 ആദ്യം മുതല്‍ ഇന്ത്യയില്‍ പാസ്പോര്‍ട്ട് ലഭിക്കുന്നതിന് നേരിട്ടിരുന്ന കാലതാമസമാണ് ഇപ്പോള്‍ വിദേശ രാജ്യങ്ങളിലേക്കും വ്യാപിച്ചിരിക്കുന്നത്. നിലവിലെ സാഹചര്യത്തില്‍ സാധാരണ പാസ്പോര്‍ട്ടിന്‍െറ ക്ഷാമം പരിഹരിക്കുന്നതിന് ഒരു മാസത്തിലധികം എടുക്കുമെന്നാണ് സൂചന.
യു.എ.ഇയില്‍ 36 പേജുള്ള പാസ്പോര്‍ട്ടിന് ഫീസ് ഈടാക്കിയിരുന്നത് 341 ദിര്‍ഹമാണ്. അതേസമയം, ജംബോ പാസ്പോര്‍ട്ടിന് 436 ദിര്‍ഹം വേണം. ഇതു സാധാരണക്കാരായ ഇന്ത്യക്കാരെ ബാധിക്കുന്നുണ്ട്. ഇതോടൊപ്പം പാസ്പോര്‍ട്ടിന്‍െറ കാലാവധി തീരുന്നതിന് തൊട്ടുമുമ്പ് മാത്രം അപേക്ഷിക്കുന്ന രീതിയും പ്രശ്നം സൃഷ്ടിക്കുന്നുണ്ട്. കാലാവധി അവസാനിക്കാന്‍ ആറ് മാസം ബാക്കിയിരിക്കെ അപേക്ഷിക്കാമെങ്കിലും പലരും അവസാന മാസങ്ങളിലാണ് ബി.എല്‍.എസ് സെന്‍ററുകളില്‍ പുതുക്കാനുള്ള അപേക്ഷയുമായെത്തുന്നത്. 2013ല്‍ യു.എ.ഇയിലെ ഇന്ത്യന്‍ എംബസി മുഖേന 1.75 ലക്ഷം പാസ്പോര്‍ട്ടുകളാണ് നല്‍കിയത്. ഈ വര്‍ഷം ഇതുവരെ ഏകദേശം 75000ഓളം പാസ്പോര്‍ട്ടുകള്‍ നല്‍കിക്കഴിഞ്ഞു. അടിയന്തര ആവശ്യമുള്ളവര്‍ ജംബോ പാസ്പോര്‍ട്ടിന് അപേക്ഷിക്കണമെന്ന് എംബസി ഉദ്യോഗസ്ഥന്‍ ‘ഗള്‍ഫ് മാധ്യമ’ത്തോട് പറഞ്ഞു. മറ്റ് ഗള്‍ഫ് രാജ്യങ്ങളിലും പാസ്പോര്‍ട്ടിന് ക്ഷാമം നേരിടുന്നുണ്ട്.