ലഘുലേഖകള്‍ കൈവശം വെച്ചതിനും മാവോവാദി ബന്ധമാരോപിച്ചും പന്തീരാങ്കാവില്‍ രണ്ടു വിദ്യാര്‍ഥികള്‍ യു.എ.പി.എ (അണ്‍ലോഫുള്‍ ആക്ടിവിറ്റീസ് പ്രിവന്‍ഷന്‍ ആക്ട്) പ്രകാരം അറസറ്റില്‍.. ഇരുവരെയും 15 ദിവസത്തേക്ക് റിമാന്‍ഡ് ചെയ്തു, ജാമ്യാപേക്ഷ തിങ്കളാഴ്ച പരിഗണിക്കും. ഒളവണ്ണ മൂര്‍ക്കനാട് ത്വാഹ ഫസല്‍ (24) തിരുവണ്ണൂര്‍ പാലാട്ട് നഗര്‍ അലന്‍ ഷുഹൈബ് (20) എന്നിവരെയാണ് പന്തീരാങ്കാവ് പൊലീസ് അറസ്റ്റ് ചെയ്തത്. ഇരുവരും സി.പി.എം പ്രവര്‍ത്തകരാണ്. യു.എ.പി.എയിലെ 20, 32, 39 വകുപ്പുകള്‍ പ്രകാരമാണ് കേസ്. യു.എ.പി.എ പ്രത്യേക കോടതി കൂടിയായ കോഴിക്കോട് പ്രിന്‍സിപ്പല്‍ സെഷന്‍സ് ജഡ്ജി എം.ആര്‍ അനിതക്ക് മുമ്പാകെയാണ് ഹാജരാക്കിയത്.

വെള്ളിയാഴ്ച രാത്രി പെരുമണ്ണ പാറമ്മല്‍ അങ്ങാടിക്ക് സമീപം റോന്തുചുറ്റുന്നതിനിടെ മൂന്നു പേരെ സംശയ സാഹചര്യത്തില്‍ കണ്ടെന്നും ഒരാള്‍ ഓടി രക്ഷപ്പെട്ടെന്നുമാണ് പൊലീസ് പറയുന്നത്. ഇവരുടെ കൈയില്‍ നിന്ന് മാവോവാദി അനുകൂല നോട്ടീസ് പിടിച്ചെടുത്തു. മാവോവാദി വേട്ടക്കെതിരെ ജനങ്ങള്‍ രംഗത്തിറങ്ങുക എന്ന തലക്കെട്ടില്‍ സി.പി.എം മാവോവാദി പശ്ചിമഘട്ട പ്രത്യേക മേഖല കമ്മിറ്റി വക്താവ് ജോഗിയുടെ പേരിലുള്ള നോട്ടീസാണ് പിടികൂടിയത്. ഒളവണ്ണയിലെ ത്വാഹയുടെ വീട്ടില്‍ നടത്തിയ പരിശോധനയില്‍ വേറെയും ലഘുലേഖകളും പോസ്റ്ററുകളും കണ്ടെടുത്തു.
വയനാട് കലക്ടറേറ്റിന് മുന്നില്‍ ഒക്ടോബര്‍ 28, 29, 30 തീയതികളില്‍ നടത്തിയ രാപകല്‍ മഹാധര്‍ണയുടെയും 'ഇന്ത്യയിലെ ജാതി പ്രശ്‌നം നമ്മുടെ കാഴ്ചപ്പാട്' എന്ന് ലഘുലേഖയും കണ്ടെടുത്തു. ഒപ്പമുണ്ടായ ആളെ കുറിച്ച് വിവരം ലഭിച്ചിട്ടില്ല. പോലീസ് പറയുന്നു. സി.പി.എം പാറമ്മല്‍ ബ്രാഞ്ച് കമ്മിറ്റി അംഗമായ ത്വാഹ ഫസല്‍ കണ്ണൂര്‍ സ്‌കൂള്‍ ഓഫ് ജേണലിസത്തിന്റെ കോഴിക്കോട് പുതിയറയിലെ ബ്രാഞ്ചില്‍ പി.ജി വിദ്യാര്‍ഥിയാണ്. കണ്ണൂര്‍ സര്‍വകലാശാല ധര്‍മടം സന്റെറില്‍ രണ്ടാം വര്‍ഷ എല്‍എല്‍.ബി വിദ്യാര്‍ഥിയാണ് അലന്‍ ഷുഹൈബ്. സി.പി.എം മീഞ്ചന്ത ബൈപാസ് ബ്രാഞ്ച് അംഗവും ബാലസംഘം, എസ്.എഫ്.ഐ പ്രവര്‍ത്തകനുമാണ്. ഇരുവരുടെയും കുടുംബവും സി.പി.എമ്മുമായി അടുത്ത ബന്ധമുള്ളവരാണ്. കരിനിയമം ചുമത്തിയതിനൂം പൊലീസ് രാജിനുമെതിരെ വന്‍ പ്രതിഷേധമുയര്‍ന്നു. സി.പി.എം നേതാക്കളും പ്രവര്‍ത്തകരും ബന്ധുക്കളും മറ്റും രംഗത്തെത്തിയതിനെ തുടര്‍ന്ന് മുഖ്യമന്ത്രിയുടെ നിര്‍ദേശപ്രകാരം ഉത്തരമേഖല ഐ.ജി അശോക് യാദവ് പന്തീരാങ്കാവ് പൊലീസ് സ്‌റ്റേഷനിലെത്തി ഒന്നര മണിക്കൂറിലധികം ഇരുവരെയും ചോദ്യം ചെയ്തിരുന്നു. യു.എ.പി.എ ചുമത്താവുന്ന കുറ്റമുണ്ടെന്നായിരുന്നു പിന്നീട് ഐ.ജിയുടെ പ്രതികരണം. ബന്ധുക്കള്‍ മുഖ്യമന്ത്രിയെ കണ്ട് സങ്കടം പറഞ്ഞിരുന്നു.

ഒരാശയത്തെ പിന്‍താങ്ങി എന്നതുകൊണ്ട് മാത്രം യു.എ.പി.എ ചുമത്താന്‍ കഴിയില്ലെന്ന് അലനും ത്വാഹക്കുംവേണ്ടി ഹാജരായ അഡ്വ. എം.കെ. ദിനേഷും അഡ്വ. വിനീതയും വാദിച്ചു. പൊലീസ് മുഖത്ത് അടിച്ചതായും വയറില്‍ ഇടിച്ചതായും ത്വാഹ ജഡ്ജിയോട് പരാതിപ്പെട്ടു. തെറ്റിദ്ധാരണയുടെ അടിസ്ഥാനത്തിലാണ് കേസെടുത്തതെന്നും ജാമ്യം അനുവദിക്കണമെന്നും പ്രതിഭാഗം വാദിച്ചു. കേസ് വിശദമായി പരിശോധിക്കാതെ ജാമ്യം അനുവദിക്കരുതെന്ന് പ്രോസിക്യൂഷനുവേണ്ടി ഹാജരായ അഡീഷനല്‍ പ്രോസിക്യൂട്ടര്‍ വി. ബിന്ദുവും വാദിച്ചു. റിമാന്‍ഡ് ചെയ്ത അലനെയും ത്വാഹയെയും ജില്ല ജയിലിലേക്ക് മാറ്റി.