സൗദി അറേബ്യയില്‍ ഇനിമുതല്‍ ഷോര്‍ട്‌സ് ധരിച്ചും പുറത്തിറങ്ങാം. എന്ന് പറഞ്ഞാൽ ഒരുപക്ഷെ വിശ്വസിക്കാൻ ഒരൽപം പ്രയാസമാവും കാരണം സൗദി അറേബ്യ എന്ന രാജ്യം അവിടെത്തെ ഭരണകൂടം അത്തരത്തിലുള്ള വസ്ത്രധാരണം ഒരുതരത്തിലും പ്രോത്സാഹിപ്പിക്കില്ല ,എന്നാൽ മാറ്റത്തിന്റെ കാറ്റ് സൗദി അറേബ്യയിലും വീശിതുടങ്ങി...ഷോര്‍ട്‌സ് ധരിക്കുന്നത് പൊതുമര്യാദ നിയമലംഘനമല്ലെന്ന് ആണ് അധികൃതര്‍ ഇപ്പോൾ വ്യക്തമാക്കിയിരിക്കുന്നത്. സമൂഹ മാധ്യമങ്ങളിലും മറ്റും വിഷയം ചര്‍ച്ചയായതിനെത്തുടര്‍ന്നാണ് അധികൃതരുടെ ഇത്തരത്തിലുള്ള അറിയിപ്പുണ്ടായത്. എന്നാൽ മുൻപ് ഇത്തരത്തിലുള്ള വസ്ത്രധാരണം ശിക്ഷാർഹമായിരുന്നു. പൊതുമര്യാദ സംരക്ഷണ നിയമാവലിയിലെ ഏഴ്,ഒമ്പത് ഖണ്ഡികകളില്‍ പറഞ്ഞിരിക്കുന്നത് പൊതുമര്യാദക്ക് വിരുദ്ധമായ പ്രവര്‍ത്തനങ്ങളില്‍ ഏര്‍പ്പെടുന്നവരെ അതേ നിയമാവലിയില്‍ പറയുന്ന പ്രകാരം തന്നെ ശിക്ഷിക്കുമെന്നാണ്.

നിയമാവലിയില്‍ സൂചിപ്പിക്കാത്ത വിഷയത്തില്‍ ശിക്ഷാനടപടി സ്വീകരിക്കുന്നതും പിഴ ചുമത്തുന്നതും അംഗീകരിക്കാനാവില്ല. പൊതുമര്യാദ സംരക്ഷണ നിയമപ്രകാരം പിഴ ചുമത്തപ്പെട്ട വ്യക്തിക്ക് ഇത്തരം കേസുകള്‍ കൈകാര്യം ചെയ്യുന്ന അഡ്മിനിസ്‌ട്രേഷന്‍ കോടതിയില്‍ പരാതി പറയാനുള്ള അവകാശമുണ്ടെന്നും നിയമാവലിയില്‍ പറയുന്നു. ഇത്തരം കേസുകളുമായി ബന്ധപ്പെട്ട് തയ്യാറാക്കുന്ന ‘മഹസര്‍’ സമ്പൂര്‍ണമാവണമെന്നും നിയമലംഘനം നടത്തിയ വ്യക്തിയുടെ പേര്, വ്യക്തിഗതവിവരങ്ങള്‍, ഫോണ്‍നമ്പര്‍, നിയമലംഘനത്തിന്റെ വകുപ്പ്, സ്ഥലം, തീയതി, എന്നീ കാര്യങ്ങള്‍ മഹസറില്‍ രേഖപ്പെടുത്തണം. ഇവക്ക് പുറമെ പിടിച്ച ഓഫീസറുടെ പേര്, തിരിച്ചറിയല്‍ നമ്പര്‍, ഒപ്പ് തുടങ്ങിയവയും കൃത്യമായി ‘മഹസറില്‍’ രേഖപ്പെടുത്തണമെന്നും നിയമമുണ്ട്. എന്തായാലും സൗദിയിലെ നിയമങ്ങളിൽ ഈ അടുത്തകാലത്തായി കുറച്ചൊക്കെ മാറ്റങ്ങൾ സംഭവിച്ചു തുടങ്ങി എന്നത് യാഥാർഥ്യം.