സമൂഹ മാധ്യമങ്ങളിലൂടെ മതത്തെയോ മനുഷ്യനേയോ പരിഹസിച്ചത് അതിന് തക്കതായ ശിക്ഷ ലഭിക്കുമെന്നതിന് മുഖ്യ ഉദാഹരണം തന്നെയാണ് നമ്മുടെ പ്രവാസലോകം. അത്തരത്തിൽ നിരവധി വാർത്തകളാണ് ഇപ്പൊൾ പുറത്തേക്ക് വരുന്നത്. സമൂഹമാധ്യമത്തിലൂടെ ഇസ്ലാമിനെ പരിഹസിച്ചതിന് മലയാളി യുവാവ് കുവൈറ്റില്‍ അറസ്റ്റിലായിരിക്കുകയാണ്. മുസ്ലിം ആരാധനയെ പരിഹസിച്ചുകൊണ്ട് ഫേസ്‌ബുക്കില്‍ കമന്റിട്ടതിന് കൊല്ലം കരുനാഗപ്പള്ളി സ്വദേശി അനീഷ് ധര്‍മരാജനെയാണ് കഴിഞ്ഞദിവസം ഫഹാഹീല്‍ പൊലീസ് അറസ്റ്റ് ചെയ്തതെന്ന് വാർത്തകൾ പുറത്തേക്ക് വരുന്നത്.

അതോടൊപ്പം തന്നെ കഴിഞ്ഞ ബുധനാഴ്ച പൗരത്വ ഭേദഗതി നിയമത്തെ അനുകൂലിച്ച്‌ കൊണ്ട് സഭ്യമല്ലാത്ത ഭാഷയില്‍ 'അനീഷ് ധര്‍മ്മരാജന്‍ യുവമോര്‍ച്ച' എന്ന തന്റെ ഫേസ്‌ബുക്ക് പേജില്‍ ഇയാള്‍ പോസ്റ്റിട്ടിരുന്നു. ഇതിനെ വിമര്‍ശിച്ചു കൊണ്ട് പലരും കമന്റ് രേഖപ്പെടുത്തുകയും ചെയ്തിരുന്നു. ഇത്തരത്തില്‍ വന്ന ഒരു കമന്റിനു മറുപടിയായാണു മുസ്ലിംകളുടെ ആരാധനയെ പരിഹസിച്ചു കൊണ്ട് ഇയാള്‍ ഫോട്ടോ കമന്റ് ഇട്ടത് തന്നെ.

ഫഹാഹീലില്‍ പ്രവര്‍ത്തിക്കുന്ന മലയാളിയുടെ ഉടമസ്ഥതയിലുള്ള പ്രമുഖ റസ്റ്റോറന്റ് ഗ്രൂപ്പില്‍ സൂപ്പര്‍വൈസറായി ജോലി ചെയ്യുകയായിരുന്നു ഇയാള്‍ എന്നാണ് ലഭ്യമാകുന്ന വിവരം. ഫേസ്‌ബുക്കില്‍ ഇയാള്‍ നടത്തിയ പരാമര്‍ശത്തെ തുടര്‍ന്ന് നിരവധി പേര്‍ ഇയാള്‍ക്കെതിരേ സ്ഥാപന ഉടമക്ക് പരാതി അറിയിച്ചതോടെ ഉടമ സ്പോണ്‍സറെ അറിയിക്കുകയും പൊലീസില്‍ വിവരം കൈമാറുകയുമാണ് ചെയ്തത്. ഇതേ തുടര്‍ന്നാണു അറസ്റ്റ് ഉണ്ടായിരിക്കുന്നത് തന്നെ. രണ്ടു വര്‍ഷമായി ഇതേ സ്ഥാപനത്തില്‍ ജോലി ചെയ്യുന്ന ഇയാള്‍ നേരത്തെ നാട്ടില്‍ യുവമോര്‍ച്ചയുടെ മണ്ഠലം പ്രസിഡന്റ് ആയിരുന്നു എന്നാണ് അധികൃതർ വ്യക്തമാക്കുന്നത്.