കോവിഡിനെ തുടര്ന്ന് പ്രതിസന്ധിയിലായ പ്രവാസി ഇന്ത്യക്കാരെയും കൊണ്ട് യുഎഇ യില് നിന്ന് രണ്ട് എയര് ഇന്ത്യ വിമാനങ്ങള് വ്യാഴാഴ്ച കേരളത്തില് എത്തും... എംബസി തയ്യാറാക്കിയിരിക്കുന്ന പട്ടികയിലെ പരമാവധി പേരെ ഇന്ത്യയിലേക്ക് കൊണ്ട് വരാനാണ് വിദേശകാര്യ മന്ത്രാലയത്തിന്റെ ലക്ഷ്യം
കോവിഡിനെ തുടര്ന്ന് പ്രതിസന്ധിയിലായ പ്രവാസി ഇന്ത്യക്കാരെയും കൊണ്ട് യുഎഇ യില് നിന്ന് രണ്ട് എയര് ഇന്ത്യ വിമാനങ്ങള് വ്യാഴാഴ്ച കേരളത്തില് എത്തും. ആദ്യ സംഘത്തില് മടങ്ങുന്നവരുടെ പട്ടിക യുഎയിലെ ഇന്ത്യന് എംബസി തയ്യാറാക്കി. അബുദാബി - കൊച്ചി, ദുബായ് - കോഴിക്കോട് എന്നിങ്ങനെയാണ് ആദ്യവിമാനങ്ങള് സര്വീസ് നടത്തുക. എംബസിയില് രജിസ്റ്റര് ചെയ്തവരില് നിന്ന് ആരോഗ്യ പ്രശനങ്ങള് ഉള്ളവര്, ഗര്ഭിണികള്, മുതിര്ന്ന പൗരന്മാര്, ടൂറിസ്റ്റ് വിസയില് എത്തി കുടുങ്ങിയവര്, ജോലി നഷ്ടപ്പെട്ടവര്, അടുത്ത ബന്ധുക്കള് മരിച്ചവര്, ലേബര് ക്യാമ്പുകളില് കഴിയുന്ന തൊഴിലാളികള് എന്നിവരെ ഉള്പ്പെടുത്തിയാണ് ആദ്യ പട്ടിക തയ്യാറാക്കിയിരിക്കുന്നത്.
പട്ടികയില് ഉള്പ്പെട്ടവരെ എംബസിയില് നിന്ന് ഫോണ് അല്ലെങ്കില് ഇ-മെയില് വഴി ബന്ധപ്പെടും. തുടര്ന്ന് എയര് ഇന്ത്യയില് നിന്ന് ടിക്കറ്റ് വാങ്ങാന് ഇവരോട് നിര്ദേശിക്കും. വെള്ളിയാഴ്ച മുതല് എല്ലാ ദിവസവും ഗള്ഫ് രാജ്യങ്ങളില് നിന്ന് കൂടുതല് വിമാനങ്ങള് സര്വ്വീസ് ഉണ്ടാകും. എംബസി തയ്യാറാക്കിയിരിക്കുന്ന പട്ടികയിലെ പരമാവധി പേരെ ഇന്ത്യയിലേക്ക് കൊണ്ട് വരാനാണ് വിദേശകാര്യ മന്ത്രാലയം ലക്ഷ്യമിട്ടിരിക്കുന്നത്.
അതേ സമയം കോവിഡ് ലക്ഷണം ഇല്ലാത്തവരെ മാത്രമേ കൊണ്ട് വരുകയുള്ളു. ഇന്ത്യയില് എത്തിയാല് ഉടന് ആരോഗ്യ സേതു ആപ്പ് ഡൗണ് ലോഡ് ചെയ്യണം. തുടര്ന്ന് 14 ദിവസം ക്വാറന്റൈനില് കഴിയണം. ആശുപത്രിയിലോ, പ്രത്യേകമായി സജ്ജീകരിക്കുന്ന സ്ഥലനങ്ങളിലോ ആണ് ക്വാറന്റൈനില് കഴിയേണ്ടത്. ക്വാറന്റൈനില് കഴിയുന്നതിന്റെ ചെലവും പ്രവാസി തന്നെ വഹിക്കണം.
14 ദിവസത്തിന് ശേഷം കോവിഡ് പരിശോധന നടത്തും. കോവിഡ് ഇല്ലെന്ന് തെളിഞ്ഞാല് വീട്ടിലേക്ക് പോകാം. ഇന്ത്യയിലെ മെഡിക്കല് പരിശോധന, ക്വാറന്റൈന് എന്നിവ സംസ്ഥാന സര്ക്കാരുകളുടെ ഉത്തരവാദിത്തമാണ്. വരും ദിവസങ്ങളില് കൂടുതല് സ്വകാര്യ വിമാന കമ്പനികളും പ്രവാസികളെ കൊണ്ട് വരുന്നതിന് ഗള്ഫ് മേഖലയില് നിന്ന് സര്വീസ് നടത്തും. വിമാനത്തില് യാത്ര ചെയ്യുന്നതിന് വെബ്സൈറ്റ്, ട്രാവല്സ് വഴി ടിക്കറ്റ് ലഭിക്കില്ല. സ്ഥാനപതി കാര്യാലയം തയ്യാറാക്കി നല്കുന്ന ലിസ്റ്റ് പ്രകാരം എയര് ഇന്ത്യ എക്സ്പ്രസ്സ് ഓഫീസുകളില് നിന്നാണ് ടിക്കറ്റ് ലഭിക്കുകയെന്നും എംബസി അധികൃതര് അറിയിച്ചു.
https://www.facebook.com/Malayalivartha
