കൊറോണ വ്യാപനം മൂലം ഗൾഫ് രാഷ്ട്രങ്ങളിൽ നിരവധി മലയാളികളാണ് ചികിത്സയിൽ കഴിയുന്നത്. അമ്പതില്പരം പേരാണ് ഇതിനോടകം തന്നെ മരണത്തിന് കീഴടങ്ങിയത്. അതോടൊപ്പം തന്നെ ലോക്ഡൗൺ പ്രഖ്യാപിച്ചതുമൂലം നാട്ടിലെ ചികിത്സ കിട്ടാതെയും ഒപ്പം മരുന്ന് ലഭിക്കാതെയും മരിച്ച പ്രവാസികളും അനവധിയാണ്. ഇത്തരം ഒരു സാഹചര്യത്തിൽ ഏറെ ചർച്ചയാകുന്നത് സൗദി അറേബ്യതന്നെയാണ്.

സൗദി അറേബ്യയിൽ മാത്രം 2788 ഇന്ത്യാക്കാർക്കാണ് കൊവിഡ് ബാധിച്ചതായുള്ള വാർത്തകൾ പുറത്തേക്ക് വരുന്നത്. ഇന്ത്യൻ അംബാസഡർ ഡോ. ഔസാഫ് സഈദ് അറിയിച്ചത് പ്രകാരമാണ് കണക്കുകൾ വ്യക്തമാക്കുന്നത്. ഇതിനോടകം തന്നെ കൊറോണ മൂലം 21 പേർ മരണമടഞ്ഞു. എന്നാൽ അതിൽ ആറുപേർ മലയാളികളാണ് എന്നത് ഏറെ ഞെട്ടൽ ഉളവാക്കുന്നു. ലഭ്യമാകുന്ന കണക്കുകൾ അനുസരിച്ച് അഞ്ച് പേർ മഹാഷ്ട്ര സ്വദേശികളാണ്.

അതോടപ്പം തന്നെ തെലങ്കാന, ഉത്തർപ്രദേശ്, ബിഹാർ തുടങ്ങിയ സംസ്ഥാനങ്ങളിൽ നിന്നുള്ളവരാണ് ബാക്കി 10 പേർ. മദീനയിലുള്ള കണ്ണൂര്‍ സ്വദേശി ഷബ്നാസ് (29), റിയാദിലുള്ള മലപ്പുറം ചെമ്മാട് സ്വദേശി സ്വഫ്‌വാന്‍ (41),പുനലൂർ സ്വദേശി വിജയകുമാരന്‍ നായര്‍ (51), മക്കയിലുള്ള മലപ്പുറം തെന്നല വെസ്റ്റ് ബസാർ സ്വദേശി മുഹമ്മദ് എന്ന ഇപ്പു മുസ്ലിയാർ (57), ഉനൈസയിലുള്ള ആലപ്പുഴ ആദിക്കാട്ടുകുളങ്ങര സ്വദേശി ഹസീബ് ഖാന്‍ (51), ജിദ്ദയിലുള്ള മലപ്പുറം കൊളപ്പുറം ആസാദ് നഗർ സ്വദേശി പാറേങ്ങൽ ഹസ്സൻ (56) എന്നിവരുടെ മരണമാണ് മലയാളികളുടെതായി സ്ഥിരീകരിച്ചിട്ടുള്ളത്. ഇത്തരത്തിൽ വേദനാജനകമാകുകയാണ് സൗദിയിലെ വിവരങ്ങൾ.