കോറോണക്കാലത്തും പ്രവാസലോകത്തെ ഞെട്ടിച്ച് വിവാഹനിശ്ചയം. ചുമ്മാതല്ല മലയാളിയെ അങ്ങ് പ്രവാസലോകം ഏറ്റെടുത്തത്. മൊബൈലിലെ സ്‌ക്രീനിനുനേരെ ശ്രീജിത്ത് മോതിരം നീട്ടിയപ്പോള്‍ കടലിനിക്കരെയിരുന്ന് രാധിക കൈനീട്ടുകയുണ്ടായി. പിന്നെ ക്ലോസപ്പും വൈഡ് ആങ്കിളും സൈഡ് ആങ്കിളും ചേര്‍ന്ന് കാന്‍ഡിഡ് ഫോട്ടോഗ്രഫിയുടെ നിമിഷങ്ങള്‍ എഴുതിച്ചേർത്തു. അങ്ങനെ വരനും വധുവും അകലങ്ങളിലിരുന്ന് സാക്ഷികളായി.

അങ്ങനെ കോവിഡ്കാലം സൃഷ്ടിക്കുന്ന പ്രതിസന്ധികള്‍ ചെറുതല്ല. പക്ഷേ, പരിഹാരം കണ്ടെത്താനും മലയാളി മിടുക്കനാണ് എന്ന് തെളിയിച്ചിരിക്കുകയാണ്. പ്രതിശ്രുതവരന്‍ കടലിനക്കരെ ഖത്തറില്‍, വധു ഇങ്ങ് ചെന്ത്രാപ്പിന്നിയിലുമാണ്. വിവാഹനിശ്ചയ ഷൂട്ട് അടിപൊളിയാക്കണമെന്ന് കരുതിയ വീട്ടുകാര്‍ക്ക് വീണ്ടും ആശങ്ക..

എന്നാല്‍, ആശങ്കയെല്ലാം വിഷ്ണുവിന്റെ വിര്‍ച്വല്‍ഷൂട്ട് എന്ന 'ഐഡിയ'യ്ക്കു മുന്നില്‍ പമ്പകടന്നു. അങ്ങനെ വൈകിയില്ല, വീഡിയോകോളിലൂടെ വരന് നിര്‍ദേശങ്ങളെത്തി. ഇപ്പുറത്ത് ലൈവായി പ്രതിശ്രുതവധുവും ഒരുങ്ങി. ഇതെല്ലാം വിഷ്ണുവിന്റെ ക്യാമറ എല്ലാം ഒപ്പിയെടുത്തു. ഷൂട്ട് കെങ്കേമമാക്കി. ഏങ്ങണ്ടിയൂര്‍ സ്വദേശി ശ്രീജിത്തിന്റെയും ചെന്ത്രാപ്പിന്നി സ്വദേശി രാധികയുടെയും വിവാഹനിശ്ചയമാണ് വിര്‍ച്വല്‍ ഷൂട്ടിങ്ങിലൂടെ അക്കരെ ഇക്കരെ ഇരുന്ന് അവിസ്മരണീയമാക്കിയത്.