ചോദ്യങ്ങളുമായി സഹകരിച്ച് ശിവശങ്കര്; ശിവശങ്കര് കസ്റ്റംസിനെ വിളിച്ചതിന് തെളിവുകള് അന്വേഷണ സംഘത്തിന് ലഭിച്ചു; അറസ്റ്റ് ചെയ്യണമെന്ന ഉദേശ്യത്തോടെയല്ല വിളിച്ചു വരുത്തിയതെന്ന് എന്.ഐ.എ
മുഖ്യമന്ത്രിയുടെ മുന് പ്രിന്സിപ്പള് സെക്രട്ടറി എം.ശിവശങ്കറിനെ ഇന്ന് അറസ്റ്റ് ചെയ്യണമെന്ന ഉദേശ്യത്തോടെയല്ല വിളിച്ചു വരുത്തിയതെന്ന് വ്യക്തമാക്കി എന്.ഐ.എ. ഇതുവരെ ചോദിച്ച ചോദ്യങ്ങള്ക്കെല്ലാം ശിവശങ്കര് ഉത്തരം നല്കിയെന്നും അന്വേഷണസംഘവുമായി അദ്ദേഹം പൂര്ണമായും സഹകരിക്കുന്നുവെന്നും എന്.ഐ.എ വൃത്തങ്ങള് വ്യക്തമാക്കുന്നു. ഇന്ന് വിട്ടയച്ച ശേഷം ഇനിയും ചോദ്യം ചെയ്യലിനായി ശിവശങ്കറിനെ വിളിച്ചു വരുത്തുമെന്നാണ് അനൗദ്യോഗിക വിവരം. ശിവശങ്കര് കസ്റ്റംസിനെ വിളിച്ചതിന് തെളിവുകള് അന്വേഷണ സംഘത്തിന് ലഭിച്ചു.
എന്.ഐ.എ ഐ.ജി നിതീഷ് കുമാര് കൊച്ചിയിലേക്ക് തിരിച്ചു. അന്വേഷണത്തിന്റെ ചുമതല നിതീഷ് കുമാര് ഏറ്റെടുക്കും. കൊച്ചിയിലെ അന്വേഷണ ഉദ്യോഗസ്ഥര്ക്കൊപ്പം എന്.ഐ.എ ദക്ഷിണേന്ത്യന് മേധാവി കെ.ബി. വന്ദന, ബംഗളൂരുവില് നിന്നുള്ള എന്.ഐ.എ ഉദ്യോഗസ്ഥര് എന്നിവരും ചോദ്യം ചെയ്യലില് പങ്കെടുക്കുന്നുണ്ട്.
തിരുവനന്തപുരത്ത് വച്ച് നടത്തിയ ചോദ്യം ചെയ്യലില് നല്കിയ മൊഴികളിലെ വൈരുദ്ധ്യങ്ങളില് വ്യക്തത തേടാനാണ് എന്.ഐ.എയുടെ പ്രധാന ശ്രമം. മുന്കൂര് ജാമ്യത്തിന് ശ്രമിക്കാതെ സ്വന്തം വാഹനത്തില് കൊച്ചിയിലെത്തിയാണ് ശിവശങ്കര് ചോദ്യം ചെയ്യലിന് ഹാജരായത്. അതിനിടെ സ്വപ്ന സുരേഷടക്കമുള്ള പ്രതികള് സെക്രട്ടേറിയറ്റിലെത്തിയോ എന്ന് കണ്ടെത്താന് സെക്രട്ടേറിയറ്റിലെ സി.സി.ടി. വി ദൃശ്യങ്ങള് പകര്ത്തി നല്കാനുള്ള നടപടിയും തുടങ്ങി. രണ്ടുഘട്ടമായി ഒരു വര്ഷത്തെ ദൃശ്യങ്ങളാണ് എന്.ഐ.എ ആവശ്യപ്പെട്ടിരിക്കുന്നത്.
https://www.facebook.com/Malayalivartha
