രാജ്യത്തെ വിദ്യാഭ്യാസ രീതി മാറുന്നു. ഇതുസംബന്ധിച്ച കരട് വിദ്യാഭ്യാസ നയം കേന്ദ്രമന്ത്രിസഭ അംഗീകരിച്ചു. പദ്ധതി നിലവില്‍ വന്നാല്‍ യു പി ,ഹെെസ്കൂള്‍ ഹയര്‍സെക്കന്ററി രീതി ഇല്ലാതാകും. 18 വര്‍ഷം കൊണ്ട് നാല് ഘട്ടങ്ങളിലായാണ് വിദ്യാഭ്യാസം. മാനവവിഭവശേഷി മന്ത്രാലയത്തിന്റെ പേര് വിദ്യാഭ്യാസ മന്ത്രാലയമാക്കാനും തീരുമാനമായി. ഇതുസംബന്ധിച്ച ഒദ്യോഗിക അറിയിപ്പ് ഉടനുണ്ടാകുമെന്നാണ് വിവരം.

21 ആം നൂറ്റാണ്ടിന്‍റെ നൈപുണ്യവികസനം നല്‍കുക എന്നതാണ് പുതിയ നയത്തിന്‍റെ ലക്ഷ്യം. പാഠപുസ്തകങ്ങളുടെയും കരിക്കുലത്തിന്‍റെയും ഭാരം കുറയ്ക്കണം. പാഠ്യ, പാഠ്യേതര വേര്‍തിരിവില്ലാതെ കല, സംഗീതം, കരകൗശലം, സ്പോര്‍ട്സ്, യോഗ, സാമൂഹിക സേവനം എന്നിവ പാഠ്യവിഷയങ്ങളാക്കണമെന്നും പുതിയ നയം ശുപാര്‍ശ ചെയ്യുന്നു.

3 മുതല്‍ 18 വയസ്സിന് താഴെയുള്ള കുട്ടികള്‍ക്കെല്ലാം വിദ്യാഭ്യാസം ഉറപ്പുവരുത്താന്‍ എന്‍‌ഇ‌പി നിര്‍ദ്ദേശിച്ചിട്ടുണ്ട്. നിലവില്‍, 14 വയസ്സ് വരെയുള്ള വിദ്യാര്‍ത്ഥികള്‍ക്ക് മാത്രമേ ഈ നിയമം ബാധകമാകൂ. 2025 ഓടെ പ്രീ-പ്രൈമറി വിദ്യാഭ്യാസം സാര്‍വത്രികമാക്കാനും, എല്ലാവര്‍ക്കും അടിസ്ഥാന സാക്ഷരത നല്‍കാനും പുതിയ വിദ്യാഭ്യാസ നയം ലക്ഷ്യമിടുന്നു.

കല, ഹ്യുമാനിറ്റീസ്, സയന്‍സ്, സ്പോര്‍ട്സ്, മറ്റ് തൊഴില്‍ വിഷയങ്ങള്‍ എന്നിവയില്‍ ഏതും പഠിക്കാന്‍ വിദ്യാര്‍ത്ഥികള്‍ക്ക് കൂടുതല്‍ സൗകര്യവും വിഷയങ്ങളുടെ തിരഞ്ഞെടുപ്പും നല്‍കുന്ന വ്യവസ്ഥകള്‍ പുതിയ വിദ്യാഭ്യാസ നയത്തിലുണ്ട്.