കൊറോണ വ്യാപനത്തിന്റെ നാളുകൾ പിന്നിട്ട് യുഎഇ സാധാരണ ജീവിതത്തിലേക്ക് മടങ്ങുമ്പോൾ പ്രതീക്ഷ പ്രവാസികളായ മലയാളികൾക്കാണ്. കോവിഡ് തൂത്തെറിഞ്ഞ പലതും തിരിച്ചുപിടിക്കാനുള്ള നെട്ടോട്ടത്തിലാണ് പ്രവാസികൾ. ഇതേതുടർന്ന് ദുബായിൽ നിന്ന് ഏറെ സന്തോഷകരമായ വാർത്തയാണ് പുറത്തേക്ക് വരുന്നത്. ദുബായ് എമിഗ്രേഷൻ വീണ്ടും സന്ദർശക വീസ അനുവദിച്ചു തുടങ്ങിയാതായി റിപ്പോർട്ട്. ഇന്ത്യ അടക്കം കൂടുതൽ രാജ്യങ്ങൾക്ക് ഇന്നലെ(ബുധൻ) മുതൽ സന്ദർശക വീസ നൽകിത്തുടങ്ങിയതായി അധികൃതർ അറിയിക്കുകയായിരുന്നു. എന്നാൽ ഇതിനായി കാത്തിരുന്ന ഒട്ടേറെ പേര്‍ ഇന്നലെ തന്നെ വീസയ്ക്ക് അപേക്ഷിക്കുകയും ചെയ്തതായി ആമർ കേന്ദ്രങ്ങളും ട്രാവൽ ഏജൻസികളും വ്യക്തമാക്കുകയുണ്ടായി.

അതേസമയം കോവിഡ്–19 നെ തുടർന്ന് മാർച്ച് മുതൽ ദുബായ് സന്ദർശക വീസ അനുവദിക്കുന്നത് നിർത്തലാക്കിയിരുന്നു. ഇതേതുടർന്ന് ഇന്ത്യക്കാരടക്കം ഒട്ടേറെ രാജ്യക്കാർ സന്ദർശക വീസ അനുവദിക്കുന്നത് കാത്തിരിക്കുകയായിരുന്നു. എല്ലായിടത്തു നിന്നും ആളുകൾ ജോലി അന്വേഷിച്ചെത്താറുള്ളത് ഇത്തരത്തിലുള്ള സന്ദർശക വീസയിലാണ്. ഇതിനിടെ എല്ലാ രാജ്യങ്ങൾക്കും ടൂറിസ്റ്റ് വീസയും അനുവദിച്ചു തുടങ്ങിയത് പ്രവാസികളിൽ നൽകുന്ന പ്രതീക്ഷകൾ ചെറുതൊന്നുമല്ല. ഇങ്ങനെ ടൂറിസ്റ്റ് ഏജൻസികൾ മുഖേനയാണ് ഇൗ വീസയ്ക്ക് അപേക്ഷ നൽകേണ്ടത്..