കണ്ണൂർ മാട്ടൂൽ സഫ ഇംഗ്ലിഷ് മീഡിയം സ്കൂളിൽനിന്ന് സിബിഎസ്ഇ പത്താം ക്ലാസ് പരീക്ഷയിൽ 500ൽ 492 മാർക്കു നേടിയ ഹിസാനയുടെ വിജയം ആഘോഷമാക്കി അബുദാബി പൊലീസ് രംഗത്ത്. ആ നിറവ് കണ്ട് കണ്ണ് നിറഞ്ഞ് വിദ്യാർത്ഥി. കണ്ണൂർ മാട്ടുൽ സ്വദേശിയും അബുദാബി പൊലീസ് എച്ച്ആർ വിഭാഗം ജീവനക്കാരനുമായ ഹനീഫയുടെ മകളാണ് ഹിസാന. സിബിഎസ്ഇ കേരള കേഡറിൽ രണ്ടാം സ്ഥാനം നേടിയ ഹിസാനയെ പൊലീസ് വിഡിയോ കോളിലൂടെ വിളിച്ച് അഭിനന്ദിക്കുകയും ചെയ്തു. കടലിനക്കരെയുള്ള വിജയാഘോഷം ലൈവായി ഹിസാന കണ്ടത് അധ്യാപകരോടൊപ്പമായിരുന്നു..

അതോടൊപ്പം തന്നെ അപ്രതീക്ഷിതമായി ലഭിച്ച ആഘോഷത്തിലും സമ്മാനത്തിലും ഹിസാനയും കുടുംബവും അധ്യാപകരും കൃതജ്ഞത രേഖപ്പെടുത്തുകയും ചെയ്തു. ഹിസാനയുടെ ചിത്രം പതിച്ച കേക്ക് മുറിച്ചായിരുന്നു പൊലീസ് ആഘോഷിച്ചത്. ഹിസാനയ്ക്കുള്ള ഉപഹാരമായ സ്വർണമാല പൊലീസ് എച്ച്ആർ മേധാവി ബ്രിഗേഡിയർ ഖൽഫാൻ സുൽത്താൻ ‍അൽ കിന്ദി അച്ഛൻ ഹനീഫയ്ക്കു നൽകുകയും ചെയ്തു. തുടർന്ന് എംപ്ലോയി അഫയേഴ്സ് മാനേജർ കേണ‍ൽ മുഹമ്മദ് അലി സാബിയും ചടങ്ങിൽ പങ്കെടുത്തു.

അങ്ങനെ ഉന്നത വിജയം നേടിയതിൽ അനുമോദിച്ച പൊലീസ് കൂടുതൽ നേട്ടങ്ങൾ കൈവരിക്കട്ടെയെന്ന് ആശംസിക്കുകയുമുണ്ടായി. മികച്ച വിജയം നേടിയ മകളുടെ ഫോട്ടോ പ്രൊഫൈൽ ചിത്രമാക്കിയതു കണ്ട് വിവരം ചോദിച്ചറിഞ്ഞ പൊലീസ് അപ്രതീക്ഷിത ആഘോഷമൊരുക്കി ഹനീഫയെയും കുടുംബത്തെയും ഞെട്ടിച്ചത്. ഇതാദ്യമായാണ് ഒരു മലയാളിയുടെ വിജയം അബുദാബി പൊലീസ് ആഘോഷിക്കുന്നത് എന്നത് ഏറെ ആശ്ചര്യം നൽകുന്നു.