കൊറോണ വ്യാപനത്തെ തുടർന്ന് വിലക്കേർപ്പെടുത്തിയതിനു പിന്നാലെ നേരിട്ട് എത്തിച്ചേരാൻ കാത്തിരിക്കുകയാണ് പ്രവാസികൾ. ഇപ്പോഴിതാ ഇന്ത്യ ഉൾപ്പടെ 34 രാജ്യങ്ങളിൽനിന്ന്​ നേരിട്ട്​ കുവൈത്തിലേക്കുള്ള വിമാന വിലക്ക്​ ജനുവരിയിൽ നീക്കുമെന്ന പ്രചാരണം നിഷേധിച്ച്​ വ്യോമാന വകുപ്പ് രംഗത്ത് എത്തിയിരിക്കുകയാണ്​. കഴിഞ്ഞ ദിവസം ചില മാധ്യമങ്ങളിൽ വന്ന വാർത്ത അടിസ്ഥാനമില്ലാത്തതാണ്​. അത്തരത്തിൽ ഒരു തീരുമാനവും ഇതുവരെ എടുത്തിട്ടില്ല. പട്ടികയിൽ പുതിയ രാജ്യങ്ങളെ ചേർക്കാനോ ഏതെങ്കിലും രാജ്യങ്ങളെ ഒഴിവാക്കാനോ തീരുമാനിച്ചിട്ടില്ല എന്നും വ്യോമാന വകുപ്പ് അധികൃതർ വ്യക്തമാക്കി.

അതോടൊപ്പം തന്നെ കോവിഡ്​ വ്യാപനം വിലയിരുത്തി മന്ത്രിസഭയാണ്​ ഇക്കാര്യത്തിൽ തീരുമാനമെടുക്കുന്നത്​. എന്നാൽ പ്രതിസന്ധി മുൻനിർത്തി വിലക്ക്​ നീക്കണമെന്നാവശ്യപ്പെട്ട്​ കുവൈത്ത്​ എയർവേയ്​സ്​, ജസീറ എയർവേയ്​സ്​ എന്നിവ സമർപ്പിച്ച നിർദേശം പഠിക്കുമെന്ന്​ നേരത്തെ പ്രധാനമന്ത്രിയും ആരോഗ്യ മന്ത്രിയും വ്യക്​തമാക്കിയിരുന്നു, എങ്കിലും തുടർനടപടികൾ ഇതുവരെ ഉണ്ടായിട്ടില്ല.

നേരത്തെ, പ്രധാനമന്ത്രി ശൈഖ്​ സബാഹ്​ ഖാലിദ്​ അൽ ഹമദ്​ അസ്സബാഹ്​ കുവൈത്ത്​ എയർവേയ്​സ്​, ജസീറ എയർവേയ്​സ്​ മേധാവികളുമായും വ്യോമയാന വകുപ്പ്​ മേധാവിയുമായും പ്രത്യേകം കൂടിക്കാഴ്​ച നടത്തിയത്​ പ്രവാസികളിൽ പ്രതീക്ഷ വർധിപ്പിക്കുകയുണ്ടായി. ഏഴുദിവസം യാത്രക്കാരൻ സ്വന്തം ചെലവിൽ ഇൻസ്​റ്റിറ്റ്യൂഷനൽ ക്വാറൻറീനിൽ കഴിയണമെന്ന വ്യവസ്ഥയോടെ കുവൈത്തി​ലേക്ക്​ നേരിട്ട്​ വരാൻ അനുവദിക്കണമെന്ന നിർദേശമാണ്​ വിമാന കമ്പനികൾ മുന്നോട്ടുവെച്ചത് തന്നെ​.