ലോകം ഒന്നടങ്കം ഏറെ ആകാംക്ഷയോടെയും അമ്പരപ്പോടെയും ഉറ്റുനോക്കുന്ന ഒരിടമാണ് ദുബായ് എക്സ്പോ 2020. വിലക്കുകൾ എല്ലാം നീക്കി ഇളവുകൾ നല്കിത്തുടങ്ങിയപ്പോൾ യാത്രക്കാരുടെ കുത്തൊഴുക്കാണ് അനുഭവപ്പെടുന്നത്. എക്സ്പോയിൽ എത്തിച്ചേരുന്ന യാത്രക്കാരുടെ എണ്ണവും റെക്കോർഡ് വേഗത്തിൽ ഉയരുകയാണ്. ഈ ഒരു സാഹചര്യത്തിൽ പ്രവാസികളെ നെഞ്ചോട് ചേർത്ത് നിർത്തുന്ന പ്രഖ്യാപനമാണ് യുഎഇ അറിയിച്ചിരിക്കുന്നത്....

ടാക്​സി ഡ്രൈവർമാർക്കും നിർമാണ തൊഴിലാളികൾക്കും എക്​സ്​പോ വേദിയിലേക്ക്​ സൗജന്യ പ്രവേശനം അനുവദിച്ചുകൊണ്ട് ഉത്തരവ് പുറപ്പെടുവിച്ച് യുഎഇ. നേരത്തെ വീട്ടുജോലിക്കാർക്കും ആയമാർക്കും​ കൂടാതെ വിദ്യാർത്ഥികൾക്കും സൗജന്യപ്രവേശനം അനുവദിച്ചതിന്​ പിന്നാലെയാണ്​ കൂടുതൽ മേഖലയിലേക്ക്​ സൗജന്യം വ്യാപിപ്പിച്ചിരിക്കുന്നത്​. 18 വയസ്സിൽ താഴെയുള്ളവർക്കും 60 വയസ്സിന്​ മുകളിലുള്ളവർ നിശ്ചയദാർഢ്യ വിഭാഗത്തിൽപെട്ടവർക്കും ടിക്കറ്റ്​ വേണ്ടെന്ന്​ നേരത്തെ തന്നെ അധികൃതർ അറിയിച്ചിരുന്നു.

ഇപ്പോൾ ആർ.ടി.എയുടെ കീഴിൽ ജോലി ചെയ്യുന്ന ബസ്, ടാക്​സി ഡ്രൈവർമാർക്കാണ്​ സൗജന്യ ​പ്രവേശനം അനുവദിച്ചിരിക്കുന്നത്. ആറ്​ മാസത്തിൽ ഒരിക്കൽ മാത്രമാണ്​ സൗജന്യപ്രവേശനം അനുവദിക്കുക. റെസിഡൻറ്​ വിസ, ആർ.ടി.എ ഐഡി കാർഡ്​ എന്നിവ കാണിച്ചാൽ എക്​സ്​പോയിൽ പ്രവേശിക്കാൻ സാധിക്കുന്നതാണ്.

കൂടാതെ ഹോട്ടൽ, റസ്​റ്റാറൻറ്​, കഫേ എന്നിവിടങ്ങളിൽ പ്രവർത്തിക്കുന്നവർക്ക്​ ഈ മാസം സൗജന്യമായി എക്​സ്പോ വേദിയിൽ പ്രവേശിക്കാൻ സാധിക്കുന്നതാണ്. ഈ വിഭാഗത്തിൽപ്പെടുന്നവർ എക്​സ്​പോയിലെ ടിക്കറ്റ്​ ഓഫിസിൽ നേരി​ട്ടെത്തി മതിയായ രേഖകൾ നൽകിയാൽ സൗജന്യ ടിക്കറ്റ്​ ലഭിക്കുന്നതായിരിക്കും.

അതോടൊപ്പം തന്നെ യുഎഇയിലെ നിർമാണ തൊഴിലാളികൾക്ക്​ കൂട്ടത്തോടെ എക്​സ്​പോയിൽ എത്താനുള്ള വേദിയാണ്​ അധികൃതർ ഒരുക്കുന്നത്​. ഇതിനായി അവരവരുടെ സ്​ഥാപനങ്ങളാണ്​ അപേക്ഷിക്കേണ്ടത്​. എക്​സ്​പോ സൈറ്റിൽ ജോലിചെയ്​ത തൊഴിലാളികൾക്കും ഈ ആനുകൂല്യം ലഭിക്കുന്നതാണ്. ഒരാൾക്ക്​ ഒരു ദിർഹം എന്നനിലയിൽ ഇതിനായി പ്രത്യേക ടിക്കറ്റ്​ ഏ​ർപ്പെടുത്തിയിരിക്കുകയാണ്​. ഈ തുക അതാത് കമ്പനികളാണ്​ അടക്കേണ്ടത്. ഓരോ സ്​ഥാപനത്തിലെയും സംഘങ്ങളായി വേണം എക്​സ്​പോയിലേക്ക് എത്താൻ.

അതേസമയം വീട്ടുജോലിക്കാർക്കും ആയമാർക്കും റെസിഡൻറ്​സ്​ വിസ കോപ്പി ഹാജരാക്കിയാൽ എത്രതവണ വേണമെങ്കിലും മേളയിൽ പ്രവേശിക്കാൻ സാധിക്കുന്നതാണ്. എക്​സ്​പോ ടിക്കറ്റ്​ ബൂത്തിൽ വിസയും ജോലി തെളിയിക്കുന്ന രേഖയും കാണിച്ചാൽ പ്രവേശനത്തിനുള്ള അനുമതി ലഭിക്കുന്നതാണ്. എന്തയാലും ഈ തീരുമാനം പ്രവാസികൾക്ക് വലിയ ആശ്വാസമാണ് നൽകുന്നത്. ഒരു രാജ്യത്തിന് തങ്ങളോട് കരുതൽ കാണിക്കുന്ന അധികൃതർക്ക് മുന്നിൽ നമിക്കുകയാണ് പ്രവാസികൾ.