നിയമലംഘനങ്ങൾ നടത്തുന്നതിൽ പിടിപ്പെട്ടാൽ കടുത്ത നടപടികളാണ് പൊതുവെ ഗൾഫ് രാഷ്ട്രങ്ങൾ സ്വീകരിക്കുക. പ്രത്യേകിച്ച് കർക്കശക്കാരായ സൗദി അറേബ്യ. ഇപ്പോഴിതാ മലയാളികളെ ഏവരെയും ഞെട്ടലിലാഴ്ത്തി വാർത്ത പുറത്തുവരുകയുണ്ടായി. മലയാളിയായ ഷമീർ സൗദിയിൽ കൊല്ലപ്പെട്ട കേസിലെ പ്രതികൾക്ക്​ കീഴ്​കോടതി വിധിച്ച വധശിഷ അപ്പീൽ കോടതിയും ശരിവച്ചിരിക്കുകയാണ്.

അഞ്ചുവർഷം​ മുമ്പ്​ ജുബൈലിലെ വർക്​​ഷോപ്​​ മേഖലയിലെ മുനിസിപ്പാലിറ്റി (ബലദിയ) മാലിന്യപ്പെട്ടിക്ക്​ സമീപം മരിച്ചനിലയിൽ കണ്ടെത്തിയ കോഴി​ക്കോട്​ കൊടുവള്ളി മുക്കിലങ്ങാടി സ്വദേശി ഷമീറിന്റെ ഘാതകർക്കാണ്​​ ജുബൈൽ കോടതി വിധിച്ച വധശിക്ഷ ദമ്മാമിലെ അപ്പീൽ കോടതിയും ശരിവെച്ചത്​. ഇതിൽ മലയാളികളും ഉൾപ്പെടുന്നുണ്ട്.

അതേസമയം അൽ ഖോബാറിൽ ഡ്രൈവറായിരുന്ന തൃശൂർ കൊടുങ്ങല്ലൂർ ഏറിയാട് സ്വദേശി ചീനികപ്പുറത്ത്​ നിസാം സാദിഖ്​ ( 29), കുറ്റ്യാടി സ്വദേശി ആശാരിത്തൊടിക അജ്​മൽ, നാല്​ സൗദി യുവാക്കൾ എന്നിവരാണ്​ കേസിലെ പ്രതികൾ. ഈ ആറുപേരെയും വധശിക്ഷക്ക്​ വിധേയമാക്കണമെന്നാണ്​ വിധിയിൽ രേഖപ്പെടുത്തിയിട്ടുള്ളത്.

അഞ്ചുവർഷം​ മുമ്പ്​ ചെറിയ പെരുന്നാളി​ന്റെ തലേദിവസം പുലർച്ചെയാണ്​ ഷമീറിന്റെ മൃതദേഹം ബ്ലാങ്കറ്റിൽ പൊതിഞ്ഞ നിലയിൽ മാലിന്യപ്പെട്ടിക്ക്​​ സമീപം സമീപവാസികൾ കണ്ടെത്തിയത്​. ഇതിനും മൂന്ന്​ ദിവസം​ മുമ്പ്​ കാണാതായ ഇയാളെ ബന്ധുക്കളും പൊലീസും തിരയുന്നതിനിടയിലാണ്​ മൃതദേഹം കണ്ടെത്തിയത്​.

വിശദമായ പരിശോധനയിൽ ശരീരത്തിലെ മർദനമേറ്റ പാടുകളും മൃതദേഹം കണ്ടെത്തിയ സാഹചര്യങ്ങളും ഇതൊരു കൊലപാതകമാണെന്ന നിഗമനത്തിലെത്തിക്കുകയായിരുന്നു. വൈകാതെ തന്നെ ആറു പ്രതികളെയും സൗദി പൊലീസ്​ പിടികൂടുകയും ചെയ്തു. ഹവാല പണം ഏജൻറായിരുന്ന ഷമീറിൽനിന്ന്​ പണം കവരാൻ​ വേണ്ടി സൗദി യുവാക്കൾ ഇയാളെ തട്ടി​ക്കൊണ്ടുപോവുകയായിരുന്നു.

അതോടൊപ്പം തന്നെ പണം കണ്ടെത്താൻ കഴിയാതിരുന്നതോടെ മൂന്നു ദിവസത്തോളം ഇയാളെ ബന്ധനത്തിൽ വെച്ച്​ പീഡിപ്പിക്കുകയായിരുന്നു. ഇതിനിടയിൽ മരണം സംഭവിച്ചതായാണ്​​ സൂചന​. പണം കവരുന്ന സ്വദേശി സംഘത്തിന്​ ആവശ്യമായ വിവരങ്ങൾ കൈമാറിയിരുന്നത്​ മലയാളികളായ നിസാം, അജ്​മൽ എന്നിവർ ആയിരുന്നെന്ന്​​ പൊലീസ്​ കണ്ടെത്തുകയും ചെയ്തു​. രണ്ട്​ പിഞ്ചു കുഞ്ഞുങ്ങളും ഭാര്യയുമടങ്ങുന്ന കുടുംബത്തി​ന്റെ ആശ്രയമായിരുന്ന യുവാവിന്റെ കെലപാതകം മലയാളിസമൂഹത്തെ ഏറെ ഞെട്ടിപ്പിച്ചിരുന്നു.

കൂടാതെ മൃതദേഹം കണ്ടെത്തി ദിവസങ്ങൾക്കകംതന്നെ പ്രതികളെ വലയിലാക്കാൻ പൊലീസിന്​ കഴിഞ്ഞു എന്നതും ഏറെ പ്രശംസ നേടിയിരുന്നു. ​അപ്പീൽ കോടതിയും വധശിക്ഷ ശരിവച്ചതോടെ ദയാഹരജികൾ നൽകാനുള്ള ഒരുക്കത്തിലാണ്​ ഇപ്പോൾ പ്രതികൾ. കൊല്ലപ്പെട്ട ഷമീറിന്റെ മകനും മകളും ചെറിയ കുട്ടികളാണ്​. പ്രതികൾക്ക്​ മാപ്പ്​ നൽകാൻ കുടുംബം ഇതുവരെ തയാറായിട്ടില്ല എന്നതും ഇതിന് തടസമായി നിൽക്കുന്നുണ്ട്.

പ്രതിയായ നിസാമിന്റെ കുടുംബത്തിന്റെ അപേക്ഷ പരിഗണിച്ച്​ നിയമസഹായം ലഭ്യമാക്കാൻ ജുബൈലിലെ സാമൂഹിക പ്രവർത്തകൻ സൈഫുദ്ദീൻ പൊറ്റശ്ശേരിക്ക് ഇന്ത്യൻ എംബസി​ അധികാര പത്രം നൽകിയിരുന്നു. അദ്ദേഹം ഇവരെ ജയിലിൽ സന്ദർശിക്കുകയും ആവശ്യമായ നിയമസഹായങ്ങൾ ലഭ്യമാക്കാൻ സഹായിക്കുകയും ചെയ്​തിരുന്നു. അതേസമയം സൗദി ഭരണാധികാരിക്ക്​ ഉൾപ്പെടെ എംബസി വഴി ദയാഹർജി നൽകാനുള്ള ഒരുക്കത്തിലാണ്​ നിസാമിന്റെ കുടുംബമെന്ന്​ സൈഫുദ്ദീൻ ഒരു പ്രമുഖ മാധ്യമത്തോട്​ വ്യക്തമാക്കി. എന്നാൽ, കുടുംബത്തിന്റെ മാപ്പ്​​​ നൽകൽ മാത്രമായിക്കും ആത്യന്തിക പരിഹാരം സ്വീകരിക്കാൻ കഴിയികയുള്ളു.