ലോകത്തെ ഏറ്റവും കൂടുതല്‍ ചര്‍ച്ച ചെയ്യപ്പെടുന്ന 16 ആകര്‍ഷക കേന്ദ്രങ്ങളിലൊന്നായി ശൈഖ് സായിദ് ഗ്രാന്‍ഡ് മോസ്ക് തെരഞ്ഞെടുക്കപ്പെട്ടു. ആധുനിക ഇസ്ലാമിക വാസ്തുശില്‍പ ചാരുതയുമായി ലോകത്തെ വിസ്മയിപ്പിക്കുന്ന ശൈഖ് സായിദ് പള്ളിക്ക് അബൂദബിയില്‍ കണ്ടിരിക്കേണ്ട സ്ഥലങ്ങളില്‍ പ്രഥമ സ്ഥാനമാണ് വെബ്സൈറ്റ് നല്‍കിയിരിക്കുന്നത്. കഴിഞ്ഞ വര്‍ഷം സന്ദര്‍ശകരും പ്രാര്‍ഥനക്കെത്തിയവരുമായി 46.85 ലക്ഷം പേര്‍ ശൈഖ് സായിദ് പള്ളിയില്‍ എത്തിയെന്നാണ് കണക്ക്.   പ്രമുഖ ട്രാവല്‍ വെബ്സൈറ്റായ ‘ട്രിപ്അഡ്വൈസര്‍’ ആണ് ആസ്ത്രേലിയയിലെ സിഡ്നി ഹാര്‍ബര്‍, റോമിലെ കെളോസിയം, പാരിസിലെ ഈഫല്‍ ടവര്‍ , കേപ്ടൗണിലെ ടേബിള്‍ മൗണ്ടയ്ന്‍, ന്യൂയോര്‍ക്കിലെ സെന്‍ട്രല്‍ പാര്‍ക്ക് എന്നിവക്കൊപ്പം ശൈഖ് സായിദ് പള്ളിയെയും തെരഞ്ഞെടുത്തത്.
പള്ളിയുടെ വാസ്തുശില്‍പമടക്കമുള്ള പ്രത്യേകതകള്‍, യു.എ.ഇ രാഷ്ട്രപിതാവ് ശൈഖ് സായിദ് ബിന്‍ സുല്‍ത്താന്‍ ആല്‍ നഹ്യാന്‍െറ ചരിത്രം എന്നിവ വിശദീകരിക്കുന്ന ഗൈഡുകളുടെ സഹായത്തോടെ ഒരു മണിക്കൂര്‍ പള്ളി ചുറ്റിക്കാണുന്നതിനുള്ള അവസരം ഒരുക്കിയിട്ടുണ്ടെന്ന് ശൈഖ് സായിദ് മോസ്ക് സെന്‍റര്‍ ഡയറക്ടര്‍ യൂസഫ് അല്‍ ഉബൈദി പറഞ്ഞു.
വെള്ളിയാഴ്ച പകല്‍ ഒഴികെ എല്ലാ ദിവസങ്ങളിലും സന്ദര്‍ശകരെ അനുവദിക്കും. വെള്ളിയാഴ്ച ഉച്ചവരെ പ്രാര്‍ഥിക്കാനെത്തുന്നവര്‍ക്ക് മാത്രമാണ് പ്രവേശനം.