യു എ ഇ യില്‍ നിന്ന് ഇന്ത്യയിലേക്ക് ആഡംബര കപ്പല്‍ സര്‍വീസുകള്‍ തുടങ്ങാന്‍ പ്രമുഖ കമ്പനികൾ ഒരുങ്ങുന്നു എന്നതാണ് പുതിയ റിപ്പോർട്ടുകൾ. ആദ്യഘട്ടത്തില്‍ മുംബൈ, ഗോവ, മംഗളൂരു എന്നിവിടങ്ങളിലേക്കാകും സര്‍വീസ് ആരംഭിക്കുക. ക്രൂസ് ടൂറിസം പ്രചാരണത്തിനായി ബെംഗളൂരു, പുണെ, അഹമ്മദാബാദ്, മുംബൈ എന്നിവിടങ്ങളില്‍ നടത്തിയ റോഡ്ഷോകളില്‍ മികച്ച പ്രതികരണം ലഭിച്ചിരുന്ന അടിസ്ഥാനത്തിലാണ് പുതിയ തീരുമാനങ്ങൾ അറിയിച്ചത്.

യാത്രക്കാര്‍ക്ക് അഞ്ചും ഏഴും പതിനാലും അതില്‍ കൂടുതലും രാത്രികള്‍ തങ്ങാവുന്ന പാക്കേജുകളാകും ആഢംബര കപ്പലുകളിൽ ഒരുക്കുക. യു എ ഇയില്‍ ഒക്ടോബര്‍ 25നു ക്രൂസ് ടൂറിസം സീസണ്‍ ആരംഭിച്ചതു മുതല്‍ പ്രമുഖ രാജ്യങ്ങളില്‍ നിന്നുള്ള ആഡംബര കപ്പലുകള്‍ എത്തിക്കൊണ്ടിരിക്കുകയാണ്. യാത്രക്കാരുടെ എണ്ണത്തില്‍ കഴിഞ്ഞ സീസണിനെക്കാൾ 15% ആണു വളര്‍ച്ച ഉണ്ടായിരിക്കുന്നത്.