നിർമാണ സാമഗ്രികളുടെ ദൗർലഭ്യത്തെ തുടർന്ന് പരിസ്ഥിതിയെ ബാധിക്കാത്ത നിലയിൽ സംസ്ഥാനത്തെ ക്വാറികൾ തുറന്നുപ്രവർത്തിപ്പിക്കുന്ന കാര്യം പരിശോധിച്ചുവരികയാണെന്ന് മുഖ്യമന്ത്രി . സംസ്ഥാനത്ത് ക്വാറികൾ പൂട്ടിയത് മൂലം നിർമാണ സമാഗ്രികളുടെ ക്ഷാമമുണ്ടായി. അതിനെ തുടർന്ന് മറ്റ് സംസ്ഥാനങ്ങളിൽ നിന്നും വൻവിലയിൽ സാധന സാമഗ്രികൾ സംസ്ഥാനത്തേക്ക് വന്നു.

2500 രൂപക്ക് ലഭിച്ചുവന്ന മെറ്റൽ ആറായിരം മുതൽ ഒമ്പതിനായിരം രൂപ ഈടാക്കിയാണ് എത്തുന്നത്. അതിനെ തുടർന്നാണ് തമിഴ്നാട് മുഖ്യമന്ത്രി വിജയിനെ കണ്ടത്. തമിഴ്നാട്ടിൽ നിന്നും സാധനങ്ങൾ ലഭ്യമാക്കുന്നത് ഈമാസം അവസാനത്തോടെ കുറച്ച് ലളിതമാക്കാമെന്ന് അദ്ദേഹം ഉറപ്പ് നൽകി.
മെറ്റലിന് വില വർദ്ധിക്കുമ്പോൾ മറ്റ് നിർമാണ സാധനങ്ങൾക്കും വില വർദ്ധിക്കും. മുമ്പ് 400 ചതുരശ്ര അടി വിസ്തീർണമുള്ള വീട് വയ്ക്കാൻ അഞ്ച് ലക്ഷം രൂപ മതിയായിരുന്നെങ്കിൽ ഇപ്പോൾ എട്ട് ലക്ഷം രൂപ ചെലവാകുന്നു. എത്രയും പെട്ടെന്ന് നിർമാണ സാമഗ്രികളുടെ പ്രതിസന്ധി പരിഹരിക്കാനാകുമെന്നാണ് പ്രതീക്ഷയെന്നും ചോദ്യോത്തരവേളയിൽ മുഖ്യമന്ത്രി മറുപടി നൽകുകയും ചെയ്തു.

അതിർത്തി കടന്നുളള ക്രഷർ മെറ്റീരിയലുകളുടെ വരവ് നിലച്ചത് മൂലം അസംസ്കൃതവസ്തുക്കൾക്കുണ്ടായ കടുത്ത ക്ഷാമം, വിലക്കയറ്റം എന്നിവ സംസ്ഥാനത്തെ ഹോളോബ്രിക്സ് നിർമാണ മേഖലയുടെ വിതരണ ശൃംഖലയെ കാര്യമായി ബാധിച്ചതായി വ്യവസായമന്ത്രി പി.കെ. കുഞ്ഞാലിക്കുട്ടി.