യൂ എസുമായിയുള്ള നയതന്ത്ര ബന്ധം വിച്ഛേദിക്കുമെന്ന മദുറോയുടെ പ്രഖ്യാപനത്തിന് പിന്നാലെ സാമ്പത്തിക സ്രോതസുകൾ മരവിപ്പിക്കുമെന്ന മുന്നറിയിപ്പ് നൽകി അമേരിക്കൻ സുരക്ഷാ ഉപരദേഷ്ടാവ് ജോണ്‍ ബോള്‍ട്ട്. അടുത്ത 72 മണിക്കൂറിനകം യു.എസ് നയതന്ത്ര പ്രതിനിധികള്‍ രാജ്യം വിടണമെന്നും മദുറോ നിര്‍ദേശം നല്‍കിയതിനെ തുടർന്നാണ് ജോണ്‍ ബോള്‍ട്ട് മുന്നറിയിപ്പ് നൽകിയിരിക്കുന്നത്.

പ്രതിപക്ഷത്തെ പിന്തുണക്കാനുള്ള അമേരിക്കയുടെ നീക്കത്തിൽ കനത്ത പ്രതിഷേധമറിയിച്ചാണ് മദുറോ നയതന്ത്രബന്ധം വിഛേദിക്കാന്‍ തീരുമാനിച്ചത്. ഇന്നലെ ഇടക്കാല പ്രസിഡന്റായി സ്വയം പ്രഖ്യാപിച്ച പ്രതിപക്ഷ നേതാവ് ജുവാന്‍ ഗെയ്ഡോയെ അമേരിക്ക പിന്തുണച്ചിരുന്നു.ഇതാണിപ്പോൾ മദുറോയെ ചൊടിപ്പിച്ചത്. തുടർന്ന് യൂ എസ് പ്രതിനിധികൾ രാജ്യം വിടണമെന്ന് മദുറോ പ്രഖ്യാപിക്കുകയായിരുന്നു. ഇതിന് പിന്നാലെയാണ് അമേരിക്കയുടെ ഭീഷണി.

അതേസമയം, അട്ടിമറി നടത്തി രാജ്യം പിടിക്കാനാണ് ഗെയ്ഡോയുടെ ശ്രമമെന്ന് മദുറോ ആരോപിച്ചു. അമേരിക്കയുടെ നടപടി വന്‍ പ്രകോപനമാണെന്നും പ്രതിസന്ധി പരിഹരിക്കാന്‍ വിവിധ കക്ഷികളുമായി ചര്‍ച്ചക്ക് തയ്യാറാണെന്നും അദ്ദേഹം അറിയിച്ചു. എന്നാല്‍, യു.എസുമായുള്ള ബന്ധം അവസാനിപ്പിക്കാനും ഉദ്യോഗസ്ഥരെ പുറത്താക്കാനും മുന്‍ പ്രസിഡന്റായ മദുറോക്ക് അധികാരമില്ലെന്നാണ് യു.എസിന്റെ അവകാശവാദം.