ഒരാള്‍ സ്വവര്‍ഗാനുരാഗിയായി മാറുന്നതിന്റെ കാരണം കണ്ടുപിടിച്ചെന്ന അവകാശവാദവുമായി കുവൈറ്റി സ്വദേശി രംഗത്ത്. കുവൈറ്റി ചാനലായ സ്‌കോപ് ടിവിയിലൂടെ അക്കാദമിക് വിദഗ്ധ എന്ന് അവകാശപ്പെടുന്ന മരിയം അല്‍ സൊഫെല്‍ ആണ് സ്വവര്‍ഗ ലൈംഗികതക്ക് പ്രതിവിധി കണ്ടെത്തിയെന്ന് ചൂണ്ടിക്കാട്ടി രംഗത്തെത്തിയത്. ആണ്‍ സ്വവര്‍ഗാനുരാഗികളുടെ ലൈംഗിക അഭിനിവേശം നിയന്ത്രിക്കുന്ന സപ്പോസിറ്ററുകളാണ് താന്‍ കണ്ടെത്തിയതെന്നാണ് ഇവരുടെ അവകാശവാദം.

ഒരാള്‍ സ്വവര്‍ഗാനുരാഗിയാകുന്നതിന് കാരണം അയാളുടെ മലദ്വാരത്തില്‍ കാണപ്പെടുന്ന, ബീജം ഭക്ഷണമാക്കുന്ന വിരകളാണെന്നാണ് ഇവര്‍ ചൂണ്ടിക്കാട്ടുന്നത്. ''ഈ വിരകള്‍ ലൈംഗികതയെ ബാധിക്കുകയും ഇതേ അവസ്ഥ തുടരുകയും ചെയ്യുന്നു. ഇതിനെതിരെ ഞാന്‍ സപ്പോസിറ്റര്‍ ഗുളികകള്‍ വികസിപ്പിച്ചെടുത്തു. ചിലയാളുകളില്‍ പ്രത്യേക സമയത്ത് ഇത് ഉപയോഗിക്കാം. വിരകളെ ഇല്ലായ്മ ചെയ്യുക വഴി പഴയ അവസ്ഥയിലേക്ക് അയാളെ മടക്കി കൊണ്ടുവരാനാകും.

ഇത് ശാസ്ത്രമാണ്. ഇതില്‍ നാണിക്കാനൊന്നുമില്ല. ഇത് സിദ്ധൗഷധമാണ്. ഇക്കാര്യങ്ങളെല്ലാം ഗ്രന്ഥങ്ങളില്‍ പ്രതിപാദിക്കുന്നുണ്ട്. സപ്പോസിറ്ററുകള്‍ക്കൊപ്പം പുരുഷ സ്വവര്‍ഗാനുരാഗികളുടെ ഭക്ഷണകാര്യത്തിലും ശ്രദ്ധിക്കേണ്ടതുണ്ട്. പുരുഷത്വം ശക്തിപ്രാപിക്കാനും പേശികള്‍ കരുത്താര്‍ജിക്കാനും പ്രത്യേക ഭക്ഷണ ക്രമം കൊണ്ട് സാധിക്കും. മണ്ണിനടിയില്‍ വളരുന്ന കിഴങ്ങ് ഉള്‍പ്പെടെയുള്ള ഭക്ഷണങ്ങള്‍ പുരുഷത്വം വര്‍ധിപ്പിക്കാനും ഉരുണ്ട് ശക്തിയാര്‍ജിച്ച പേശികള്‍ രൂപപ്പെടാനും സഹായിക്കും'' - മരിയം പറയുന്നു.

എന്നാല്‍ എല്‍ജിബിടി സമൂഹം ഈ വാദങ്ങളെല്ലാം തള്ളിക്കളയുന്നു. സ്വവര്‍ഗാനുരാഗത്തിന് എതിരായ ചികിത്സകള്‍ മത മൗലിക വാദികള്‍ക്കിടയിലുണ്ടെന്നും ഇത് തട്ടിപ്പും മുറിവൈദ്യവുമാണെന്നും ജര്‍മന്‍ രാഷ്ട്രീയ നേതാവും സ്വര്‍ഗാനുരാഗിയുമായ വോള്‍ക്കര്‍ ബെക്ക് പറയുന്നു. ഇത്തരത്തിലുള്ള ചികിത്സകരെ തടയണമെന്നും ഇവരുടെ മാനസികനില പരിശോധിക്കണമെന്നും അദ്ദേഹം പറയുന്നു.