അമേരിക്കയിലെ ഒഹൈയോ സ്വദേശിയായ യുവതിയ്ക്ക് തന്റെ വളര്‍ത്തുനായ സമ്മാനിച്ചത് തീരാനഷ്ടം. മരിയ ട്രെയ്‌നര്‍ എന്ന യുവതിക്കാണ് ഈ ദൗര്‍ഭാഗ്യം ഏര്‍പ്പെട്ടത്. ജെര്‍മന്‍ ഷെപ്പേഡ് ഇനത്തില്‍പ്പെട്ട ഇവരുടെ നായക്കുട്ടിയെ ചുംബിക്കവേ അവര്‍ക്ക് അണുബാധ ഉണ്ടാകുകയായിരുന്നു.

നായയുടെ ശരീരത്തിലെ കപ്‌നോ സൈറ്റോഫാഗ കാനിമോര്‍സസ് (capnocytophaga canimorsus) എന്ന ബാക്ടീരിയ മൂലമുള്ള അണുബാധയാണ് ഇവര്‍ക്ക് ഉണ്ടായത്. നായക്കുട്ടിയെ സാധാരണപോലെ ചുംബിക്കുകയായിരുന്നു ഇവര്‍. പെട്ടെന്ന് ബോധം നഷ്ടപ്പെട്ട് കുഴഞ്ഞുവീഴുകയായിരുന്നു.

ശരീരം പെട്ടെന്ന് മരവിച്ചു. ചര്‍മം ചുവപ്പും പിങ്കും കലര്‍ന്ന നിറമായി. കൈകാലുകളില്‍ രക്തം കട്ടപിടിച്ചു. എന്താണ് ഇവര്‍ക്ക് സംഭവിച്ചതെന്ന് ഡോക്ടര്‍മാര്‍ക്കും കണ്ടെത്താനായില്ല. ആശുപത്രിയില്‍ പ്രവേശിപ്പിച്ചതിന്റെ ഏഴാം ദിവസമാണ് അണുബാധ തിരിച്ചറിയുന്നത്. അപ്പോഴേക്കും ചെവിയിലും മുഖത്തും മൂക്കിലുമെല്ലാം അണുബാധ പടര്‍ന്നിരുന്നു.

എട്ട് ശസ്ത്രക്രിയകള്‍ നടത്തിയശേഷമാണ് മരണത്തിന്റെ വക്കില്‍ നിന്നും ഇവരെ രക്ഷിക്കാനായത്. ജീവന്‍ തിരികെ പിടിക്കാന്‍ കൈകാലുകള്‍ മുറിച്ചുമാറ്റാതെ മറ്റുമാര്‍ഗങ്ങളില്ലായിരുന്നു. അങ്ങനെയാണ് അവരുടെ കൈകാലുകള്‍ മുറിച്ചുമാറ്റാന്‍ ഇടയായത്.

സാധാരണ മൂന്നോ നാലോ ദിവസത്തിന് ശേഷമാണ് അണുബാധ പ്രത്യക്ഷപ്പെടുന്നത്. മൃഗങ്ങളെ ഓമനിച്ചാല്‍ സാധാരണ അണുബാധയുണ്ടാകാറില്ല. അവ കടിക്കുകയോ നഖം കൊണ്ട് പോറലേല്‍പ്പിക്കുകയും ചെയ്യുമ്പോഴാണ് കാപ്‌നോ സൈറ്റോഫാഗ ബാക്ടീരിയ ശരീരത്തില്‍ പ്രവേശിക്കുന്നത്. എന്നാല്‍ ഇത് അപൂര്‍വമായ സാധ്യതയാണെന്ന് ഡോക്ടര്‍മാര്‍ പറഞ്ഞു.