മികച്ച ജീവിതം തേടി അമേരിക്കയിലേക്ക് കടക്കാന്‍ ശ്രമിച്ച യുവതിയേയും മകനെയും അതിര്‍ത്തിയില്‍ സൈനികര്‍ തടയുന്നതിന്റെ, നോവുണര്‍ത്തുന്ന ചിത്രം
അമേരിക്കയിലേക്ക് കുടിയേറുന്നതിനായി ഗ്വാട്ടിമാലയില്‍ നിന്നും തന്റെ കുഞ്ഞുമകനുമൊത്ത് 2400 കിലോമീറ്ററില്‍ അധികം ദൂരം സഞ്ചരിച്ചെത്തിയ യുവതിയെ സൈന്യം തടഞ്ഞ് നിര്‍ത്തുമ്പോഴുള്ള ആ അമ്മയുടെ വേദന റോയിട്ടേഴ്‌സിന്റെ ഫോട്ടോഗ്രാഫര്‍ ചിത്രത്തിലാക്കി.
മികച്ച ജീവിതം തേടി അമേരിക്കയിലേക്ക് കടക്കാന്‍ ശ്രമിച്ച ഗ്വാട്ടിമാല സ്വദേശിനിയായ ലെറ്റി പെരെസിനെയും ഇവരുടെ ആറ് വയസുകാരനായ മകന്‍ ആന്തണി ഡയസിനെയുമാണ് സുരക്ഷാ ഉദ്യോഗസ്ഥന്‍ അതിര്‍ത്തിയില്‍ തടഞ്ഞത്.
ഗ്വാട്ടിമാലയില്‍ നിന്നും അമേരിക്കന്‍ അതിര്‍ത്തി പട്ടണമായ സ്യൂഡാഡ് ജുവാരസിലാണ് ഇവര്‍ എത്തിയത്. എന്നാല്‍ അതിര്‍ത്തി കടക്കുന്നതിനിടെ നിര്‍ഭാഗ്യവശാല്‍ ഇവരെ മെക്‌സിക്കോയുടെ ദേശീയ സുരക്ഷാ വിഭാഗം ഉദ്യോഗസ്ഥര്‍ പിടികൂടുകയായിരുന്നു.
തങ്ങളെ കടത്തി വിടണമെന്ന് പൊട്ടിക്കരഞ്ഞുകൊണ്ട് അപേക്ഷിക്കുവാന്‍ മാത്രമേ ഈ യുവതിയ്ക്ക് സാധിക്കുമായിരുന്നുള്ളു. ഇതിനിടെയാണ് ഫോട്ടാഗ്രാഫര്‍ ജോസ് ലൂയിസ് ഗോണ്‍സാലാസ് ഈ ചിത്രം പകര്‍ത്തിയത്. താന്‍ ഉത്തരവുകള്‍ അനുസരിക്കുക മാത്രമാണ് ചെയ്യുന്നതെന്നും യുവതിയെയും മകനെയും അതിര്‍ത്തി കടക്കുവാന്‍ അനുവദിക്കില്ലെന്നും സൈനികന്‍ പറഞ്ഞുവെന്ന് ഫോട്ടോഗ്രാഫര്‍ റിപ്പോര്‍ട്ട് ചെയ്യുന്നു.
ലോകമെമ്പാടും ഈ ചിത്രം വ്യാപകമായി പ്രചരിച്ചതോടെ പ്രതിഷേധ സ്വരങ്ങളും ഉയരുന്നുണ്ട്. മെക്‌സിക്കന്‍ അതിര്‍ത്തികളില്‍ മനുഷ്യത്വത്തിന് എതിരായ നടപടികളാണ് നടപ്പിലാക്കുന്നതെന്ന വിമര്‍ശനമാണുയരുന്നത്.
https://www.facebook.com/Malayalivartha
