ലോകം മുഴുവന്‍ കൊറോണക്കെതിരെ പോരാടുമ്പോള്‍ പാകിസ്താനില്‍ ഭക്ഷണ വിതരണത്തില്‍ കടുത്ത മതപീഡന വാര്‍ത്തകളാണ് പുറത്തുവരുന്നത്. കഴിഞ്ഞ മാസം കറാച്ചിയിലെ കോരംഗി മേഖലയില്‍ ഭക്ഷണ വിതരണത്തില്‍ നടത്തിയ പരസ്യമായ വിവേചനം വാര്‍ത്തയായിരുന്നു. നിലവില്‍ കടുത്ത മതപീഡനം നടത്തുന്ന വാര്‍ത്തകളാണ് വീണ്ടും പുറത്തുവരുന്നത്.

ഭരണകൂടം നേരിട്ട് വിതരണം നടത്തുന്ന കേന്ദ്രങ്ങളിലാണ് മതംനോക്കി മാത്രം അവശ്യവസ്തുവിതരണം നടത്തുന്നത്. രാജ്യത്തെ 20 ലക്ഷത്തോളം വരുന്ന 2 ശതമാനം ക്രൈസ്തവ സമൂഹവും 40 ലക്ഷമായി കുറഞ്ഞ 4 ശതമാനം ഹിന്ദു-സിഖ് വംശജരും കടുത്ത ദാരിദ്ര്യത്തിലാണ്. കൊറോണ ബാധമൂലം മുസ്ലീം ഭൂരിപക്ഷ പ്രദേശം കടുത്ത ജാഗ്രത പാലിക്കുമ്പോഴും മറ്റിടങ്ങളില്‍ ഇതിന്റെ പേരില്‍ നടക്കുന്നത് ചികിത്സയ്ക്ക് പകരം മതപീഡനമാണെന്നാണ് ആരോപണം.

ക്രൈസ്തവര്‍ക്ക് അവരുടെ ആരാധനകളൊന്നും നടത്താന്‍ സാധിക്കുന്നില്ല. ഭക്ഷണ വിതരണ കേന്ദ്രത്തില്‍ പരസ്യമായി ഖുറാന്റെ ഇസ്ലാമിക വചനങ്ങളായ കലമാ തയ്യബ വായിക്കുന്നവര്‍ക്ക് മാത്രമേ ഭക്ഷണമോ അവശ്യവസ്തുക്കളോ നല്‍കാവൂ എന്ന് പ്രാദേശിക ഭരണകൂടം തീരുമാനിച്ചിരിക്കുകയാണ്. അത് ചൊല്ലാന്‍ വിസ്സമ്മതിച്ചവര്‍ക്കാര്‍ക്കും റേഷന്‍ നിഷേധിക്കുന്ന കാഴ്ചയാണെങ്ങും. ലിയാറി, സച്ചാല്‍ ഖോത്ത് തുടങ്ങിയ കറാച്ചിയിലെ മേഖലകളിലെല്ലാം ഹിന്ദുസമൂഹവും ഇതേ പീഡനം സഹിക്കുകയാണെന്നാണ് പരാതി.