കാല്ലക്ഷത്തിലേറെ പേര്ക്ക് കൊവിഡ് എന്നിട്ടും യുദ്ധക്കൊതി മൂത്ത് ഇറാന്; ബാലിസ്റ്റിക്ക് മിസൈല് പദ്ധതിക്ക് സഹായകമാകുന്ന സൈനീക സാറ്റ്ലൈറ്റ് വിക്ഷേപിച്ച് ഇറാന്
ഏപ്രില് 22 വരെയുള്ള കണക്ക് പ്രകാരം 5297 പേരാണ് കൊവിഡ് ബാധിച്ച് ഇറാനില് മരിച്ചത്. കാല്ലക്ഷത്തിലേറെ പേര്ക്ക് ഇപ്പോഴും കോവിഡ് 19 ഭേദമായിട്ടില്ല. എന്നിട്ടും ഭരണകൂടത്തിന് യുദ്ധക്കൊതിയാണ്, പല തവണയായി പരാജയപ്പെട്ട മിലിട്ടറി സാറ്റലൈറ്റിന്റെ വിക്ഷേപണം നടത്തിയിരിക്കുകയാണ് ഇറാന്. പലതവണ പരാജയപ്പെട്ടു എങ്കിലും ഇപ്പള് അത് വിജയം കണ്ടു എന്നാണ് പുറത്തുവരുന്ന റിപ്പോര്ട്ടുകള്. 'നൂര്' അഥവാ പ്രകാശം എന്നു പേരിട്ടിരിക്കുന്ന സാറ്റലൈറ്റ് ഇറാന് ഭ്രമണപഥത്തിലെത്തിച്ചിരിക്കുന്നതെന്ന് ഇറാന് റവല്യൂഷനറി ഗാര്ഡ്സ് വ്യക്തമാക്കി.
'മെസഞ്ചര്' എന്നു വിളിപ്പേരിട്ട സാറ്റലൈറ്റ് കാരിയര് ഉപയോഗിച്ചായിരുന്നു മിസൈല് ബഹിരാകാശത്തെത്തിച്ചത്. എന്നാല് ഇത്തരമൊരു സംവിധാനത്തെപ്പറ്റി നേരത്തേ ആരും കേട്ടിട്ടില്ലെന്നാണു വിദഗ്ധര് പറയുന്നത്. തികച്ചും രഹസ്യാത്മകമായിട്ടായിരുന്നു നിര്മാണം. സാങ്കേതികവിദ്യയുടെ വിവരങ്ങളും മറച്ചുവച്ചു.
ദാഷ്ടെ കവീര് എന്നറിയപ്പെടുന്ന മരുഭൂമിയില് രണ്ടു ഘട്ടമായിട്ടായിരുന്നു വിക്ഷേപണ നടപടികള്. എന്നാല് എപ്പോഴായിരുന്നു വിക്ഷേപണമെന്നു വ്യക്തമാക്കിയിട്ടില്ല. ഭൗമോപരിതലത്തില്നിന്ന് 425 കിലോമീറ്റര് ഉയരത്തിലുള്ള ഭ്രമണപഥത്തിലാണ് സാറ്റലൈറ്റ് എത്തിയത്. സൈനിക ആവശ്യത്തിനായി ഉപയോഗിക്കാവുന്ന, ഇറാന്റെ ആദ്യ മിലിട്ടറി സാറ്റലൈറ്റാണിത്. ഇറാന്റെ ബാലിസ്റ്റിക് മിസൈല് പദ്ധതിയെ ഉള്പ്പെടെ സഹായിക്കുന്നതാണ് പുതിയ സാറ്റലൈറ്റ്.
ആണവ ഉടമ്പടിയില്നിന്നു യുഎസ് പിന്മാറിയതിനെത്തുടര്ന്നുള്ള സംഘര്ഷം മേഖലയില് നിലനില്ക്കുന്നതിനിടെയാണ് ഇറാന്റെ സാറ്റലൈറ്റ് പരീക്ഷണം. ഒട്ടേറെ തവണ മറ്റു സാറ്റലൈറ്റുകളെയും ഭ്രമണപഥത്തിലെത്തിക്കാന് ശ്രമിച്ച് ഇറാന് പരാജയപ്പെട്ടിരുന്നു. ഇക്കഴിഞ്ഞ ഫെബ്രുവരിയില് ആശയവിനിമയ ഉപഗ്രഹമായ സഫര്1ന്റെ വിക്ഷേപണം പരാജയപ്പെട്ടിരുന്നു. കഴിഞ്ഞ വര്ഷം പായം, ദോസ്തി എന്നീ സാറ്റലൈറ്റുകളും പരാജയപ്പെട്ടു. 2019 ഓഗസ്റ്റില് ലോഞ്ചിങ്ങിനിടെ റോക്കറ്റ് പൊട്ടിത്തെറിച്ചതും തിരിച്ചടിയായി. ഇതിന്റെ ചിത്രം യുഎസ് പ്രസിഡന്റ് ഡോണള്ഡ് ട്രംപ് ട്വീറ്റ് ചെയ്തിരുന്നു. ഇതിനെത്തുടര്ന്നാണ് മറ്റു രാജ്യങ്ങളും ഇറാന്റെ വിക്ഷേപണത്തില് ഇടപെടുന്നുണ്ടെന്ന സംശയമുണ്ടായത്. എന്നാല് യുഎസ് അന്നുതന്നെ ഇതു നിഷേധിച്ചു. 2019 ഫെബ്രുവരിയില് ഇമാം ഖമൈനി സ്പേസ് െസന്ററിലുണ്ടായ തീപിടിത്തത്തില് മൂന്നു ഗവേഷകര് മരിച്ചിരുന്നു. ആണവ പോര്മുനകള് വഹിക്കാനാകുന്ന ബാലിസ്റ്റിക് മിസൈലുകള് നിര്മിക്കുന്നത് തടയാനുള്ള യുഎന് സെക്യൂരിറ്റി കൗണ്സില് പ്രമേയത്തെ ലംഘിക്കുന്നതാണ് മിലിട്ടറി സാറ്റലൈറ്റുകളെന്നാണ് നേരത്തേ യുഎസ് വ്യക്തമാക്കിയിരുന്നത്.
https://www.facebook.com/Malayalivartha