കോവിഡ് മഹാമാരിയെ ചെറുക്കാന് വാക്സിനും മരുന്നും കണ്ടെത്താനുള്ള ഗവേഷണത്തില് പുരോഗതി
കോവിഡ് മഹാമാരിയെ ചെറുക്കാന് യുഎസില് മാത്രം 72 മരുന്നുകള് പരീക്ഷിക്കുന്നതായും ഗവേഷണത്തില് കാര്യമായ പുരോഗതിയുണ്ടെന്നും പ്രസിഡന്റ് ഡോണള്ഡ് ട്രംപ് അറിയിച്ചു. മറ്റ് 211 പദ്ധതികളും വിവിധ ഘട്ടങ്ങളിലായി പുരോഗമിക്കുന്നു. വാക്സിനും മരുന്നും കണ്ടെത്താനുള്ള ശ്രമത്തില് ലോകം മുന്നോട്ട് തന്നെയാണെന്ന് അദ്ദേഹം പറഞ്ഞു.
ചൈനയിലെ ഗവേഷകര് വികസിപ്പിച്ചെടുത്ത കോവിഡ് വാക്സിന് ആരോഗ്യപ്രവര്ത്തകരില് ഈ വര്ഷാവസാനത്തോടെ പരീക്ഷിക്കുമെന്ന് നാഷനല് ഹെല്ത്ത് മിഷന് അറിയിച്ചു. അക്കാദമി ഓഫ് മിലിറ്ററി സര്വീസസ് വികസിപ്പിച്ചെടുത്ത അഡിനോവൈറസ് വെക്ടര് വാക്സിന്റെ ആദ്യഘട്ട പരീക്ഷണം കഴിഞ്ഞ മാസം പൂര്ത്തിയായി. രണ്ടാം ഘട്ടം ആരംഭിച്ചു. കോവിഡിനെതിരെ ലോകത്ത് ആദ്യമായി വികസിപ്പിച്ച വാക്സിനാണിത്.
കോവിഡ് വാക്സിനിലേക്ക് നയിച്ചേക്കാവുന്നതും ഇസ്രയേലിലെ ടെല് അവീവ് സര്വകലാശാലയിലെ പ്രഫസര് ജൊനാഥന് ഗെര്ഷോനി വികസിപ്പിച്ചെടുത്തതുമായ സാങ്കേതികവിദ്യയ്ക്ക് യുഎസ് പേറ്റന്റ് അനുവദിച്ചു. ഓക്സ്ഫഡ് സര്വകലാശാലയിലെ വാക്സിനോളജി പ്രഫസര് സാറ ഗില്ബര്ട്ട് വികസിപ്പിച്ച വാക്സിന് ഒക്ടോബറോടെ ലഭ്യമാകുമെന്നറിയുന്നു. ഇതിന്റെ മൂന്നാം ഘട്ട പരീക്ഷണം നടക്കുന്നു.
ചികിത്സയില് കൂടുതല് ഫലപ്രദമാകുന്ന ചെലവു കുറഞ്ഞതും എളുപ്പം നിര്മിക്കാവുന്നതുമായ വെന്റിലേറ്റര് ബാഴ്സിലോന സര്വകലാശാലയിലെ ഉള്പ്പെടെയുള്ള ഗവേഷകര് കണ്ടെത്തിയിട്ടുണ്ട്. ഇതേസമയം, കോവിഡ് വാക്സിന്റെ ആദ്യഘട്ട ക്ലിനിക്കല് പരീക്ഷണത്തിനായി തിരഞ്ഞെടുത്ത 55 വയസ്സിനു മുകളിലുള്ളവരുടെ പട്ടിക യുഎസ് പുറത്തുവിട്ടു. 18-55 പ്രായക്കാരില് ആദ്യഘട്ട പരീക്ഷണം നടക്കുകയാണ്.
കോവിഡ് മരുന്ന്, വാക്സിന്, മെഡിക്കല് ഉപകരണങ്ങള് എന്നിവയുടെ ഗവേഷണം ഊര്ജിതപ്പെടുത്താന് യുഎന് പൊതുസഭ പ്രമേയത്തിലൂടെ ലോകരാജ്യങ്ങളോട് അഭ്യര്ഥിച്ചു. വാക്സിന് കണ്ടെത്തുമ്പോള് എല്ലാ അംഗരാജ്യങ്ങള്ക്കും ലഭ്യമാക്കണമെന്ന പ്രമേയവും സഭ പാസ്സാക്കി. 193 അംഗങ്ങള് ഈ പ്രമേയത്തെ അനുകൂലിച്ചു.
കോവിഡ് വൈറസിന്റെ യഥാര്ഥ ഉറവിടം ഇനിയും കണ്ടെത്താനായിട്ടില്ലെന്ന് ലോകാരോഗ്യ സംഘടന അറിയിച്ചു. ഇതു സംബന്ധിച്ച വാക്പോര് നിരര്ഥകമാണെന്നും സംഘടന വ്യക്തമാക്കി.
മലേറിയയ്ക്കെതിരെ ഉപയോഗിക്കുന്ന ഹൈഡ്രോക്സി ക്ലോറോക്വിന്, കോവിഡ് രോഗികളില് ഫല്രദമാണോ എന്നു കണ്ടെത്താനുള്ള വിപുലമായ പദ്ധതിക്ക് സ്വിസ് ഔഷധക്കമ്പനിയായ നൊവാര്ടിസ് രൂപംകൊടുത്തു.
https://www.facebook.com/Malayalivartha