ഇന്ത്യന് സര്ക്കാരിന്റെ സോഫ്റ്റ്വേര് ഹാക്ക് ചെയ്ത അഞ്ച് ചൈനീസ് പൗരന്മാര്ക്കെതിരേ അമേരിക്ക കേസെടുത്തു
നൂറിലേറെ അമേരിക്കന് സ്ഥാപനങ്ങളുടെയും ഇന്ത്യന് സര്ക്കാരിന്റെയും സോഫ്റ്റ്വേര് ഹാക്ക് ചെയ്ത അഞ്ച് ചൈനീസ് പൗരന്മാര്ക്കെതിരേ യു.എസ്. നീതിന്യായവകുപ്പ് കേസെടുത്തു. വിവരം ചോര്ത്തല് സംബന്ധിച്ച മൂന്ന് സംഭവങ്ങളാണ് പുറത്തുവന്നത്.
മൂന്ന് മലേഷ്യന് പൗരന്മാര് ഡേറ്റ വില്ക്കാന് ചൈനക്കാരെ സഹായിച്ചതിന് കഴിഞ്ഞ 13-ന് അറസ്റ്റിലായി. ചൈനക്കാരായ പ്രതികളെ പിടികിട്ടാപ്പുള്ളികളായി പ്രഖ്യാപിച്ചെന്നും യു.എസ്. ഡെപ്യൂട്ടി അറ്റോര്ണി ജനറല് ജെഫ്രി റോസെന് വ്യക്തമാക്കി. ചൈനീസ് സര്ക്കാരിനെ റോസെന് രൂക്ഷമായി വിമര്ശിച്ചു. സൈബര് ക്രിമിനലുകളെ ചൈനീസ് കമ്യൂണിസ്റ്റ് പാര്ട്ടി സംരക്ഷിക്കുകയാണ്. ചൈനയ്ക്കു പുറത്തുള്ളതും ചൈനയ്ക്ക് ഗുണമുള്ളതുമായ ബൗദ്ധികസ്വത്തുക്കളാണ് മോഷ്ടിക്കുന്നതെന്നും അദ്ദേഹം ആരോപിച്ചു.
ചൈനീസ് ഹാക്കര്മാര് ഇന്ത്യന് സര്ക്കാരിന്റെ ഉടമസ്ഥതയിലുള്ള ഓപ്പണ് വി.പി.എന്. നെറ്റ്വര്ക്കില് നുഴഞ്ഞുകയറാന് വി.പി.എസ്. പ്രവൈഡര് സെര്വറുകളാണ് ഉപയോഗിച്ചത്. 'കൊബാള്ട്ട് സ്ട്രൈക്ക്' മാല്വേര് ഉപയോഗിച്ചായിരുന്നു സൈബര് ആക്രമണമെന്നും കുറ്റപത്രത്തില് പറയുന്നു. ചൈനയുടെ സൈബര് ആക്രമണം അമേരിക്കയിലും പുറത്തുമുള്ള നൂറിലേറെ യു.എസ്. കമ്പനികളെയും സ്ഥാപനങ്ങളെയും ബാധിച്ചു.
വിദേശസര്ക്കാരുകള്, സന്നദ്ധസംഘടനകള്, സര്വകലാശാലകള്, ബുദ്ധിജീവികള്, ജനാധിപത്യ രാഷ്ട്രീയനേതാക്കള്, ഹോങ്കോങ് സാമൂഹികപ്രവര്ത്തകര് എന്നിവരെയും ഹാക്കര്മാര് ലക്ഷ്യമിട്ടു. സോഴ്സ് കോഡ്, സോഫ്റ്റ്വേര് കോഡ്, കസ്റ്റമര് അക്കൗണ്ട് ഡാറ്റ, ബിസിനസ് വിവരങ്ങള് തുടങ്ങിയവ മോഷ്ടിക്കപ്പെട്ടു. സോഫ്റ്റ്വേര്, കമ്പ്യൂട്ടര് ഹാര്ഡ്വേര്, ടെലികമ്യൂണിക്കേഷന് സ്ഥാപനങ്ങള്, സാമൂഹികമാധ്യമങ്ങള്, വീഡിയോ ഗെയിം കമ്പനികള് തുടങ്ങിയവയും ഇരകളാക്കപ്പെട്ടു.
അനധികൃത വെബ്സൈറ്റുകളിലൂടെയാണ് ചോര്ത്തിയ വിവരങ്ങളുടെ വില്പ്പന. വിയറ്റ്നാം, ബ്രിട്ടന് എന്നീ രാജ്യങ്ങളെയും ചൈനീസ് ഹാക്കര്മാര് ലക്ഷ്യമിട്ടെങ്കിലും ബ്രിട്ടനിലെ ശ്രമം വിജയിച്ചില്ല. എന്നാല്, ഇന്ത്യ, ഓസ്ട്രേലിയ, ബ്രസീല്, ചിലി, പാകിസ്താന്, ഹോങ്കോങ്, ഇന്തോനീഷ്യ, ജപ്പാന്, മലേഷ്യ, സിംഗപ്പുര്, ദക്ഷിണാഫ്രിക്ക, തായ്ലാന്ഡ്, തായ്വാന് തുടങ്ങിയ രാജ്യങ്ങളിലെ വ്യക്തികളുടെയും സംഘടനകളുടെയും കമ്പനികളുടെയും വിവരങ്ങള് ചോര്ത്തപ്പെട്ടു.
സൈബര് കുറ്റകൃത്യങ്ങള്ക്കായി ചൈനീസ് സര്ക്കാര് സ്വന്തം പൗരന്മാരെ പ്രേരിപ്പിക്കുകയാണെന്ന് ആരോപിച്ച എഫ്.ബി.ഐ. ഡെപ്യൂട്ടി ഡയറക്ടര് ഡേവിഡ് ബോവ്ഡിച്ച്, ചൈനീസ് സര്ക്കാരുമായി ഉറ്റബന്ധമുള്ളതിനാല് ലോകത്തെവിടെയുമുള്ള വിവരങ്ങള് ചോര്ത്താമെന്നു കരുതുന്ന സൈബര് ക്രിമിനലുകള്ക്കെതിരേ സാധ്യമായതെല്ലാം ചെയ്യുമെന്ന് പറഞ്ഞു.
https://www.facebook.com/Malayalivartha
