യുകെയില് നിന്ന് ഇന്ത്യയിലേക്കും തിരിച്ചുമുള്ള എല്ലാ വിമാനങ്ങളും നിര്ത്തിവച്ചു; നിയന്ത്രണം ഡിസംബര് 31 വരെ; ബ്രിട്ടനില് കോവിഡ് വൈറസിന്റെ പുതിയ വകഭേദം കണ്ടെത്തി; രോഗവ്യാപനം രൂക്ഷം
യുകെയില് നിന്ന് ഇന്ത്യയിലേക്കും തിരിച്ചുമുള്ള എല്ലാ വിമാനങ്ങളും നിര്ത്തിവെക്കാന് തീരുമാനിച്ചു. നിലവിലെ സാഹചര്യങ്ങള് കണക്കിലെടുത്ത് കേന്ദ്ര സര്ക്കാരിന്റെതാണ് നടപടി. ചൊവ്വാഴ്ച അര്ദ്ധരാത്രി മുതല് ഡിസംബര് 31 അര്ദ്ധരാത്രി വരെയാണ് വിലക്കേര്പ്പെടുത്തിയിട്ടുള്ളത്.
മുന്കരുതലുകളുടെ ഭാഗമായി ചൊവ്വാഴ്ച അര്ദ്ധ രാത്രിക്ക് മുമ്പായി യുകെയില് നിന്നെത്തുന്ന എല്ലാ യാത്രക്കാരും വിമാനത്താവളങ്ങളിലെത്തുമ്പോള് നിര്ബന്ധിത ആര്ടി-പിസിആര് പരിശോധനയ്ക്ക് വിധേയരാകണമെന്നും വ്യോമയാന മന്ത്രാലയം അറിയിച്ചു. യുകെ വഴി വരുന്ന വിമാന യാത്രികര്ക്കും പരിശോധന നിര്ബന്ധമാണ്. ബ്രിട്ടനില് കോവിഡ് വൈറസിന്റെ പുതിയ വകഭേദം കണ്ടെത്തിയെന്ന് ബ്രിട്ടീഷ് പ്രധാനമന്ത്രി ബോറിസ് ജോണ്സണ് അറിയിച്ചിരുന്നു.
ആദ്യവൈറസിനെക്കാള് 70 ശതമാനമധികം വേഗത്തില് പടര്ന്നുപിടിക്കുന്നതാണ് പുതിയ വൈറസെന്നാണ് റിപ്പോര്ട്ട്. ഇതേ തുടര്ന്ന് നിരവധി രാജ്യങ്ങള് യുകെയിലേക്കുള്ള വിമാന ഗതാഗതത്തിന് വിലക്കേര്പ്പെടുത്തിയിട്ടുണ്ട്. പുതിയ കൊറോണ വൈറസ് കണ്ടെത്തിയ സാഹചര്യത്തില് യുകെയില് നിന്നുള്ള വിമാനങ്ങള്ക്ക് കാനഡ വിലക്ക് ഏര്പ്പെടുത്തി. വാണിജ്യ, യാത്രാ വിമാനങ്ങള്ക്ക് 72 മണിക്കൂര് താല്കാലിക വിലക്കാണ് ഏര്പ്പെടുത്തിയത്. ഇന്ന് അര്ധരാത്രി മുതല് വിലക്ക് പ്രാബല്യത്തില് വരും.
നേരത്തെ, നെതര്ലാന്ഡ്സ്, ബെല്ജിയം എന്നീ രാജ്യങ്ങള് യുകെയില് നിന്നുള്ള വിമാന സര്വീസുകള് നിരോധിച്ചിരുന്നു. ഫ്രാന്സും ഇറ്റലിയും ജര്മ്മനിയും സമാനമായ നടപടികള് സ്വീകരിക്കാന് ഒരുങ്ങുന്നതായും സൂചനയുണ്ട്. കഴിഞ്ഞ ദിവസം ലണ്ടനില് നിന്ന് റോമിലെത്തിയ ആള്ക്ക് പുതിയ വൈറസ് സ്ഥിരീകരിച്ചിരുന്നു. ഇയാളെ പ്രത്യേക നിരീക്ഷണത്തിലേക്ക് മാറ്റിയിട്ടുണ്ട്.
യു.കെയില് പുതുതായി കോവിഡ് ബാധിച്ച ആയിരത്തിലധികം രോഗികളിലാണ് പുതിയ ഇനം വൈറസിന്റെ സാന്നിധ്യം സ്ഥിരീകരിച്ചത്. ലണ്ടനിലും തെക്ക്-കിഴക്കന് ഇംഗ്ലണ്ടിലും വൈറസ് അതിവേഗം വ്യാപിച്ചിട്ടുണ്ട്. കോവിഡ് വ്യാപനം കൂടുതല് ശക്തമായ സാഹചര്യത്തില് ലണ്ടനില് തിയറ്ററുകള്, പബ്ബുകള്, റസ്റ്റാറന്റുകള് എന്നിവക്ക് നിയന്ത്രണങ്ങള് കര്ക്കശമാക്കി. ജനിതക വ്യതിയാനമുള്ള പുതിയ ഇനം വൈറസിനെ കണ്ടെത്തിയിട്ടുണ്ടെന്നും ഇപ്പോള് കോവിഡിന് കാരണമായ വൈറസിനെക്കാള് ഗുരുതരമാണെന്ന് കണ്ടെത്തിയിട്ടില്ലെന്നും ലോകാരോഗ്യ സംഘടന അറിയിച്ചിരുന്നു.
https://www.facebook.com/Malayalivartha