അമേരിക്കയിലെ കാപ്പിറ്റോള്‍ ആക്രമ സംഭവങ്ങളുടെ പശ്ചാത്തതലത്തില്‍ ട്വിറ്റര്‍ ട്രംപിന്റെ അക്കൗണ്ട് പൂട്ടിയപ്പോള്‍ അതിന്റെ നേട്ടം ഇങ്ങ് ഇന്ത്യയിലും. നമ്മുടെ പ്രധാനമന്ത്രി നരേന്ദ്രമോദിയാണ് ഇനി മുതല്‍ ട്വിറ്ററില്‍ ഏറ്റവും കൂടുതല്‍ പേര്‍ പിന്തുടരുന്ന ഭരണകര്‍ത്താവ്. ട്രംപിന് 88.7 മില്ല്യണ്‍ ഫോളോവേഴ്സാണ് ഉണ്ടായിരുന്നത്. പ്രധാനമന്ത്രി നരേന്ദ്ര മോദിക്ക് 64.7 മില്യണ്‍ ഫോളോവേഴ്സുണ്ട്.

അതെ സമയം ട്വിറ്ററില്‍ ഏറ്റവും കൂടുതല്‍ പേര്‍ പിന്തുടരുന്ന രാഷ്ട്രീയ നേതാവ് മുന്‍ അമേരിക്കന്‍ പ്രസിഡന്റ് ബരാക്ക് ഒബാമയാണ്. 127.9 മില്ല്യണ്‍ ആളുകളാണ് ട്വിറ്ററില്‍ ഒബാമയെ പിന്തുടരുന്നത്. അമേരിക്കന്‍ പ്രസിഡന്റായി തിരഞ്ഞെടുക്കപ്പെട്ട ജോ ബൈഡന് ട്വിറ്ററില്‍ 23.3 മില്ല്യണ്‍ ഫോളോവേഴ്സാണ് ഉള്ളത്. ആഭ്യന്തര മന്ത്രി അമിത് ഷായ്ക്ക് 24.2 മില്ല്യണ്‍ ഫോളോവേഴ്സും ഡല്‍ഹി മുഖ്യമന്ത്രി അരവിന്ദ് കേജ്രിവാളിന് 21.2 മില്ല്യണ്‍ ഫോളോവേഴ്സുമാണ് ഉള്ളത്.

ട്രംപ് അനുകൂലികളുടെ കാപ്പിറ്റോള്‍ ആക്രമത്തിന് പിന്നാലെയാണ് ട്രംപിന്റെ അക്കൌണ്ട് ട്വിറ്റര്‍ പൂട്ടിയത്. അക്രമത്തിന് ജനങ്ങളെ പ്രേരിപ്പിക്കുന്ന തരത്തിലുള്ള ട്രംപിന്റെ ട്വീറ്റുകളുടെ പേരിലാണ് നടപടി. ട്വിറ്ററിനു പുറമെ ഫെയ്സ്ബുക്ക് ഉള്‍പ്പെടെയുള്ള സമൂഹ മാധ്യമങ്ങളും ട്രംപിന്റെ അക്കൗണ്ടിന് താഴ് വീണിരുന്നു.

എന്നാല്‍ ട്വിറ്ററില്‍ നിന്ന് പുറത്താക്കിയതിന് പിന്നാലെ സ്വന്തമായി സോഷ്യല്‍ മീഡിയ പ്ലാറ്റ്ഫോം നിര്‍മ്മിക്കാനൊരുങ്ങുകയാണ് ഡൊണാള്‍ഡ് ട്രംപ്. അമേരിക്കന്‍ പ്രസിഡന്റുമാര്‍ ഉപയോഗിക്കുന്ന @ജഛഡട എന്ന താത്കാലിക അക്കൗണ്ടിലൂടെയാണ് ട്രംപ് ഇക്കാര്യം പറഞ്ഞത്. ട്വിറ്ററിന്റെ നടപടിക്കെതിരെ നിശബ്ദരാക്കാന്‍ സാധിക്കില്ലെന്ന് വ്യക്തമാക്കിയാണ് ട്രംപിന്റെ പ്രതികരണം. 24 മണിക്കൂറാണ് ആദ്യം ട്വിറ്റര്‍ ട്രംപിന്റെ അക്കൗണ്ടുകള്‍ക്ക് വിലക്ക് ഏര്‍പ്പെടുത്തിയത്. എന്നാല്‍ ഭാവിയിലും ട്രംപ് പ്രകോപനമുണ്ടാക്കാനുള്ള സാദ്ധ്യതയുണ്ടെന്ന് കാണിച്ച് പിന്നീട് സ്ഥിരമായി അക്കൗണ്ട് നീക്കം ചെയ്യുകയായിരുന്നു.