മലയാളിയായ മജു വര്‍ഗീസ് അമേരിക്കന്‍ പ്രസിഡന്റ് ജോ ബൈഡന്റെ ഡപ്യൂട്ടി അസിസ്റ്റന്റായും വൈറ്റ് ഹൗസ് മിലിറ്ററി ഓഫീസ് (ഡബ്ല്യുഎച്ച്എംഒ) ഡയറക്ടറായും നിയമിതനായി.

വൈറ്റ് ഹൗസിലെ സൈനിക ഏകോപനം, പ്രസിഡന്റിന്റെ ഔദ്യോഗിക യാത്രകള്‍, അടിയന്തിര വൈദ്യസഹായത്തിനുള്ള ഒരുക്കങ്ങള്‍ എന്നീ ചുമതലകളെല്ലാം മിലിറ്ററി ഓഫീസിന്റെ കീഴില്‍ വരും. അഭിഭാഷകനായ മജുവിന്റെ മാതാപിതാക്കള്‍ തിരുവല്ല സ്വദേശികളാണ്.

നേരത്തെ ബൈഡന്റെ തിരഞ്ഞെടുപ്പ് പ്രചാരണ സംഘത്തിന്റെ സിഇഒ ആയിരുന്നു മജു. ബൈഡന്റെയും കമല ഹാരിസിന്റെയും സ്ഥാനാരോഹണ ചടങ്ങിന്റെ നടത്തിപ്പു സമിതിയിലും അംഗമായിരുന്നു.

രണ്ടാം തവണയാണ് മജു വൈറ്റ് ഹൗസിലെത്തുന്നത്. വൈറ്റ് ഹൗസിനുള്ളിലെ പട്ടാള വിഭാഗ മേധാവിയായിട്ടാണ് നിയമനം. വളരെ സുപ്രധാനമായ പല കാര്യങ്ങളുടെയും ചുമതല മജുവായിരിക്കും വഹിക്കുക. പ്രസിഡന്റിന്റെ മെഡിക്കല്‍ യൂണിറ്റ് ഡയറക്ടറുടെ ചുമതല, എയര്‍ ലിഫ്റ്റ് ഗ്രൂപ്പിന്റെയും വൈറ്റ് ഹൗസ് കമ്മ്യൂണിക്കേഷന്‍ ഗ്രൂപ്പിന്റെയും ചുമതല എന്നിവയും ഇദ്ദേഹത്തിനായിരിക്കും.

ബറാക് ഒബാമ പ്രസിഡന്റായപ്പോള്‍ വിവിധ തസ്തികകളില്‍ മജു ആറ് വര്‍ഷം സേവനമനുഷ്ഠിച്ചിട്ടുണ്ട്. 2015 ലെ ഒബാമയുടെ ഇന്ത്യ സന്ദര്‍ശനത്തിന്റെ ചുമതലയും മജുവിനായിരുന്നു. അമേരിക്കക്കാരി ജൂലി വര്‍ഗീസാണ് ഭാര്യ. 14 വയസ്സുള്ള ഇവാന്‍ ഇവരുടെ ഏകമകനാണ്.