സൂപ്പർ മാർക്കെറ്റിൽ കവർച്ച നടത്തുന്ന വീഡിയോ സമൂഹമാധ്യമങ്ങളിൽ വൈറലായതിനു പിന്നാലെ പുറത്ത് വരുന്നത് ഞെട്ടിക്കുന്ന വിവരങ്ങൾ. വ്യാജ തോക്ക് കാണിച്ച് ഭീഷണിപ്പെടുത്തി സൂപ്പര്‍മാര്‍ക്കറ്റില്‍ കവര്‍ച്ച നടത്തിയ പുരോഹിതന്‍ പിടിയിലായിരിക്കുകയാണ്. എലീസിയ മൊറീറ എന്ന കത്തോലിക്കാ പുരോഹിതനാണ് തോക്ക് ചൂണ്ടി ഇത്തരത്തിൽ കവര്‍ച്ച നടത്തിയത്. ബ്രസീലിലാണ് സംഭവം. ഇയാള്‍ കവര്‍ച്ച നടത്തുന്ന വീഡിയോയും സാമൂഹിക മാദ്ധ്യമങ്ങളില്‍ വൈറലായിരിക്കുകയാണ്.

സൂപ്പര്‍ മാര്‍ക്കറ്റില്‍ സാധനങ്ങള്‍ വാങ്ങിയ ശേഷം ക്യാഷ് കൗണ്ടറില്‍ ചെന്ന പുരോഹിതന്‍ യുവതിയ്ക്ക് നേരെ തോക്ക് ചൂണ്ടുകയാണ് ചെയ്തത്. ഭയന്നുപോയ യുവതി അവിടെയുണ്ടായിരുന്ന പണം മുഴുവന്‍ ഇയാള്‍ക്ക് നല്‍ക്കുകയായിരുന്നു. തുടര്‍ന്ന് പുരോഹിതന്‍ സൂപ്പര്‍ മാര്‍ക്കറ്റില്‍ നിന്നും സാധനങ്ങളുമായി ഇറങ്ങിപ്പോകുന്ന ദൃശ്യങ്ങളും വീഡിയോയില്‍ കാണുവാൻ സാധിക്കും.

സംഭവത്തിന് പിന്നാലെ പോലീസ് നടത്തിയ അന്വേഷണത്തില്‍ ഇയാളെ കയ്യോടെ പിടികൂടുകയായിരുന്നു. മോഷ്ടിച്ച കാറില്‍ യാത്ര ചെയ്യുന്നതിനിടെയാണ് പ്രതിയെ പോലീസ് പിടികൂടിയത്. ഇത്തരത്തില്‍ വ്യാജ തോക്ക് ചൂണ്ടി ഭീഷണിപ്പെടുത്തി ഇതിന് മുന്‍പും ഇയാള്‍ കവര്‍ച്ച നടത്തിയിട്ടുണ്ട് എന്ന് പോലീസ് അറിയിക്കുകയുണ്ടായി.

അതേസമയം ചോദ്യം ചെയ്തതില്‍ നിന്നും പ്രതിയ്ക്ക് മാനസിക പ്രശ്‌നമുണ്ടെന്ന് സംശയിക്കുന്നതായി പോലീസ് ഉദ്യോഗസ്ഥര്‍ വ്യക്തമാക്കിയിരിക്കുകയാണ്.

പ്രതിയ്ക്ക് മാനസികപ്രശ്‌നമുണ്ടെന്നും രണ്ടാഴ്ച തുടര്‍ച്ചയായി മരുന്ന് കഴിക്കാത്തതു കാരണമാണ് ഇത്തരത്തില്‍ പെരുമാറുന്നതെന്നും പ്രതിയുടെ അഭിഭാഷകന്‍ കോടതിയില്‍ അറിയിക്കുകയും ചെയ്തു. നിലവില്‍ പ്രതിയെ തടങ്കലില്‍ വെച്ചിരിക്കുകയാണ്. വൈദിക പട്ടം ലഭിക്കാന്‍ ദിവസങ്ങള്‍ മാത്രം ബാക്കി നില്‍ക്കെയാണ് പ്രതി കവര്‍ച്ച നടത്തിയത് എന്നാണ് ലഭ്യമാകുന്ന വിവരം.