ന്യൂ സൗത്ത് വെയ്ല്‍സിലും തെക്കു പടിഞ്ഞാറന്‍ ഓസ്‌ട്രേലിയയിലും കനത്ത് മഴയ്ക്കു നേരിയ ശമനമുണ്ടെങ്കിലും പ്രളയം തുടരുന്നു. രാജ്യത്തെ ഒരു കോടി ജനങ്ങളെ പ്രളയം ബാധിച്ചു.

കനത്ത മഴയെയും വെള്ളപ്പൊക്കത്തെയും തുടര്‍ന്ന് 20,000 പേരെ സുരക്ഷിത സ്ഥാനത്തേക്കു മാറ്റിപാര്‍പ്പിച്ചിരുന്നു. 22,000 പേരോട് ഒഴിഞ്ഞുപോകാന്‍ തയാറായിരിക്കാന്‍ അധികൃതര്‍ ആവശ്യപ്പെട്ടു.

വരും ദിവസങ്ങളില്‍ മഴയ്ക്കു ശമനമുണ്ടാകുമെന്നാണ് കാലാവസ്ഥാ പ്രവചനം. എന്നാല്‍, സാധാരണനില കൈവരിക്കാന്‍ ദിവസങ്ങളെടുക്കും.

പ്രളയത്തില്‍ വീടുകള്‍, പാലങ്ങള്‍, വാഹനങ്ങള്‍, വളര്‍ത്തുമൃഗങ്ങള്‍ എന്നിവയ്ക്കുണ്ടായ നാശം അതിഭീമമാണ്. ഇതുവരെ ആരും മരിച്ചതായി റിപ്പോര്‍ട്ട് ചെയ്തിട്ടില്ല.