ശ്രീ ബുദ്ധന്റെ രൂപത്തിൽ മുൻ യുഎസ് പ്രസിഡന്റ് ഡോണൾഡ് ട്രംപിന്റെ പ്രതിമ നിർമിച്ച് ചൈനീസ് കമ്പനി. ഫർണിച്ചർ നിർമ്മാതാക്കളായ ഹോങ് ജിൻഷിയാണ് പ്രതിമ നിർമിച്ചത്. ബുദ്ധനെ പോലെ ധ്യാനിക്കുന്ന പ്രതിമയാണ് നിർമിച്ചിരിക്കുന്നത്.

ഇത്തരത്തിലുള്ള ട്രംപിന്റ്റെ 250 പ്രതിമകളാണ് കമ്പനി നിർമിച്ചിരിക്കുന്നത്. ട്രംപിന്റെ 200 പ്രതിമകളുടെ ഓർഡർ ലഭിച്ചിട്ടുണ്ടെന്ന്

ചൈനീസ് കമ്പനി അറിയിച്ചു. 4.6 മീറ്റർ വലിപ്പമുള്ള പ്രതിമക്ക് 3999 യുവാനും(44,707 രൂപ)1.6 മീറ്റർ വലിപ്പമുള്ളതിന് 999 യുവാനും (11,168 രൂപ ) ആണ് വില.

അതേസമയം, ഡോണൾഡ് ട്രംപിന്റെ മെഴുക് പ്രതിമ ഈയിടെ മ്യൂസിയത്തിൽ നിന്നും നീക്കം ചെയ്തിരുന്നു. മ്യൂസിയത്തിൽ വരുന്നവരും പോകുന്നവരുമെല്ലാം പ്രതിമയിൽ നിരന്തരമായി ഇടിക്കുന്നത് കൂടിയതോടെ കേടുപാടുകൾ സംഭവിക്കുന്നത് പതിവായിരുന്നു.

തുടർന്നാണ് പ്രതിമ നീക്കം ചെയ്തത്. ടെക്‌സാസിലെ സാൻ അന്റോണിയോയിലെ ലൂയിസ് തുസാദ്സ് വാക്സ് വർക് മ്യൂസിയത്തിലെ പ്രതിമയാണ് അന്ന് നീക്കം ചെയ്തിരുന്നത്.

മ്യൂസിയത്തിലെ സ്റ്റോറേജിലേക്ക് പ്രതിമ മാറ്റിയെന്നും നിരവധി കേടുപാടുകളുണ്ടെന്നും അധികൃതർ പറയുന്നു.

അമേരിക്കൻ പ്രസിഡന്റ് തെരഞ്ഞെടുപ്പിന് പിന്നാലെ മ്യൂസിയത്തിൽ സന്ദർശനത്തിനെത്തുന്ന പലരും പ്രതിമയിൽ ഇടിച്ച് പ്രതിഷേധിക്കാറുണ്ടായിരുന്നു. ഇതിനെ തുടർന്നാണ് പ്രതിമ നീക്കം ചെയ്തത്.

പക്ഷേ, മെയ്ക് അമേരിക്ക ഗ്രേറ്റ് എഗെയ്ൻ’ എന്ന ട്രംപിന്റെ വാചകമാണ് പ്രതിമ നിർമ്മിക്കാൻ പ്രചോദനമെന്ന് കമ്പനി ഉടമ പറഞ്ഞു.

ചൈനീസ് ഉൽപ്പന്നങ്ങളിൽ ഈ ആശയം സംയോജിപ്പിക്കുകയാണ് ലക്ഷ്യം. ട്രംപ് പ്രതിമകൾ കണ്ടാൽ എങ്ങനെ പ്രതികരിക്കുമെന്ന് അറിയില്ല. എങ്കിലും അദ്ദേഹത്തിന് പ്രതിമകളിലൊന്ന് സമ്മാനിക്കുമെന്ന് ശില്പി അറിയിച്ചു. ഈ രീതിയിൽ ധ്യാനിക്കുന്നത് ട്രംപിന് ഗുണകരമാകുമെന്നും ശില്പി പറയുന്നു.