യുഎസ് ക്യാപിറ്റോള്‍ മന്ദിരത്തിന് മുന്നില്‍ പൊലീസുകാര്‍ക്ക് നേരെ അജ്ഞാതന്‍ കാര്‍ ഇടിച്ചുകയറ്റി. ആക്രമണത്തില്‍ ഒരു പൊലീസ് ഉദ്യോഗസ്ഥന്‍ കൊല്ലപ്പെട്ടു. മറ്റൊരാള്‍ക്ക് ഗുരുതരമായി പരിക്കേറ്റു. അക്രമിയെ പൊലീസ് വെടിവച്ചുകൊന്നു.

വില്യം ഇവാന്‍ എന്ന പൊലീസുകാരനാണ് കൊല്ലപ്പെട്ടത്. ബാരിക്കേഡില്‍ ഇടിച്ചു നിര്‍ത്തിയ കാറില്‍ നിന്ന് അക്രമി പുറത്തിറങ്ങുകയും, പൊലീസിന് നേരെ കത്തി വീശുകയുമായിരുന്നു. ഒരു ഉദ്യോഗസ്ഥന് കുത്തേറ്റതായും റിപ്പോര്‍ട്ടുണ്ട്. തുടര്‍ന്ന് പൊലീസ് ഇയാള്‍ക്കുനേരെ വെടിവയ്ക്കുകയായിരുന്നു.

അതേസമയം യുഎസ് കാപ്പിറ്റോള്‍ ആക്രമണത്തില്‍ നടുക്കം രേഖപ്പെടുത്തി പ്രസിഡന്റ് ജോ ബൈഡന്‍. കാര്‍ ആക്രമണത്തില്‍ കൊല്ലപ്പെട്ട പോലീസ് ഉദ്യോഗസ്ഥന്റെ കുടുംബത്തിന്റെ ദുഖത്തിനൊപ്പം രാജ്യമൊന്നാകെ പങ്കുചേരുന്നുവെന്ന് ബൈഡന്‍ പറഞ്ഞു.

വെള്ളിയാഴ്ചയാണ് യുഎസ് കാപ്പിറ്റോളിന് നേരെ ആക്രമണമുണ്ടായത്. കാപ്പിറ്റോള്‍ മന്ദിരത്തിന് മുന്‍പിലെ സുരക്ഷാ ബാരിക്കേഡിലേക്ക് ആക്രമി കാര്‍ ഇടിച്ചു കയറ്റുകയായിരുന്നു.

സംഭവത്തില്‍ വില്യം ബില്ലി എന്ന പോലീസ് ഉദ്യോഗസ്ഥനാണ് മരിച്ചത്. മറ്റൊരാള്‍ക്ക് ഗുരുതര പരിക്കേറ്റിരുന്നു. ആക്രമണത്തെ തുടര്‍ന്ന് കാപ്പിറ്റോള്‍ മന്ദിരം അടച്ചു. ഇവിടേക്കുള്ള വഴികളും അടച്ചിട്ടിരിക്കുകയാണ്. മന്ദിരത്തിന് കനത്ത സുരക്ഷയാണ് ഏര്‍പ്പെടുത്തിയിരിക്കുന്നത്.