കൊവിഡ്-19 വ്യാപനം രൂക്ഷമായ ഇന്ത്യയിൽ നിന്നുള്ള വിമാനങ്ങൾക്ക് തൽക്കാലിക വിലക്കേർപ്പെടുത്തി ഹോങ്കോങ്. ചൊവ്വാഴ്‌ച മുതൽ മേയ് മൂന്ന് വരെയാണ് ഇന്ത്യയിൽ നിന്നുള്ള എല്ലാ വിമാനങ്ങൾക്കും വിലക്കേർപ്പെടുത്തുന്നതെന്ന് വ്യോമയാന മന്ത്രാലയം വ്യക്തമാക്കി.

ഇന്ത്യയെ കൂടാതെ കൊവിഡ് കേസുകൾ കൂടുതലുള്ള പാകിസ്ഥാൻ, ഫിലിപ്പൈൻസ് എന്നീ രാജ്യങ്ങളിൽ നിന്നുള്ള വിമാനങ്ങൾക്കും ഹോങ്കോങ് വിലക്കേർപ്പെടുത്തി.

മറ്റ് രാജ്യങ്ങളിൽ നിന്ന് എത്തുന്നവർ യാത്രയ്‌ക്ക് 72 മണിക്കൂർ മുൻപ് ആർടി പിസിആർ പരിശോധന നാടത്തി കൊവിഡ് നെഗറ്റീവ് സർട്ടിഫിക്കറ്റ് കൈവശം സൂക്ഷിക്കണമെന്ന് അധികൃതർ അറിയിച്ചു.

ഇന്ത്യയിൽ നിന്നുള്ള യാത്രക്കാരിൽ കൂടിയ തോതിലാണ് കൊവിഡ് കേസുകൾ സ്ഥിരീകരിക്കുന്നതെന്ന് ഹോങ്കോങ് അറിയിച്ചു. വിസ്‌താരയുടെ വിമാനങ്ങളിൽ ഈ മാസം രാജ്യത്ത്

എത്തിയ അമ്പതോളം പേർക്ക് കൊവിഡ് സ്ഥിരീകരിച്ചിട്ടുണ്ട്. ഇതോടെ വിസ്‌താരയുടെ എല്ലാ സർവീസുകൾക്കും മേയ് രണ്ടുവരെ വിലക്കേർപ്പെടുത്തിയിട്ടുണ്ട്.

ഞായറാഴ്‌ച ഹോങ്കോങിലെത്തിയ മൂന്ന് മുംബൈ - ഹോങ്കോങ് വിസ്‌താര യാത്രക്കാര്‍ക്ക് കൂടി രോഗബാധ സ്ഥിരീകരിച്ചിരുന്നു. ഇന്ത്യയിൽ കൊവിഡ് കേസുകൾ ദിനംപ്രതി വർധിക്കുകയാണ്. കേന്ദ്ര ആരോഗ്യ മന്ത്രാലയം ഇന്ന് രാവിലെ പുറത്തുവിട്ട കണക്കുകൾ പ്രകാരം കഴിഞ്ഞ 24 മണിക്കൂറിനിടെ 2,73,810 പേർക്കാണ് പുതിയതായി രോഗം സ്ഥിരീകരിച്ചു.

ഇതോടെ രാജ്യത്ത് കൊവിഡ് സ്ഥിരീകരിച്ചവരുടെ എണ്ണം 1,50,61,919 ആയി. ഇന്നലെ മാത്രം 1,619 പേർ കൂടി കൊവിഡ് ബാധിച്ച് മരിച്ചതോടെ ആകെ മരണം 1,78,769 ആയി ഉയർന്നു.