അമിതഭാരം താങ്ങാൻ കഴിയാതെ മുങ്ങാന് തുടങ്ങിയ പായ്ക്കപ്പലില് നിന്ന് ആറുപേരെ രക്ഷപ്പെടുത്തി ദുബായ് പോലീസ്, ചരക്ക് ദുബായ് മുന്സിപ്പാലിറ്റിയുടെ സഹായത്തോടെ കരയ്ക്കെത്തിച്ചു
മുങ്ങാന് തുടങ്ങിയ പായ്ക്കപ്പലില് നിന്ന് യാത്രക്കാരെ രക്ഷപ്പെടുത്തി ദുബായ് പോലീസ്. ആറ് ഏഷ്യന് സ്വദേശികളാണ് കപ്പലില് ഉണ്ടായിരുന്നത്. ദുബായ് ക്രീക്കിലാണ് സംഭവം ഉണ്ടായത്.
ക്രീക്കില് നിന്ന് ഏഷ്യന് രാജ്യത്തേക്കുള്ള യാത്രക്കിടെ കപ്പലില് വെള്ളം കയറാന് തുടങ്ങുകയായിരുന്നു. പായ്ക്കപ്പലില് അമിതമായി ചരക്ക് കയറ്റിയതാണ് വിള്ളലുണ്ടാകാന് കാരണമായത്.
കപ്പലിനുള്ളില് വെള്ളം കയറാന് തുടങ്ങിയതോടെ ക്യാപ്റ്റന് ദുബായ് പോലീസിന്റെ കമാന്ഡ് ആന്റ് കണ്ട്രോള് സെന്ററില് വിവരം അറിയിക്കുകയായിരുന്നു.
പിന്നാലെ മാരിടൈം പട്രോളിങ് സംഘം സ്ഥലത്തെത്തി കപ്പില് ഉണ്ടായിരുന്ന മുഴുവന് പേരെയും രക്ഷപ്പെടുത്തി.
പ്രത്യേക സുരക്ഷാ ബലൂണുകള് സ്ഥാപിച്ചാണ് പായ്ക്കപ്പല് മുങ്ങാതെ സംരക്ഷിച്ചത്. കപ്പലിലുണ്ടായിരുന്ന ചരക്ക് ദുബായ് മുന്സിപ്പാലിറ്റിയുടെ സഹായത്തോടെ കരയ്ക്കെത്തിച്ചു.
കപ്പലിലെ വിള്ളല് വലുതാണെന്ന് കണ്ടെത്തിയതോടെ മുങ്ങാതെ സംരക്ഷിച്ച് അടുത്തുള്ള തുറമുഖത്തേക്ക് എത്തിച്ചതായി പോര്ട്ട് പോലീസ് സ്റ്റേഷനിലെ മറൈന് റെസ്ക്യൂ വിഭാഗം ഡയറക്ടര് അലി അബ്ദുല്ല അല് നഖ്ബി പറഞ്ഞു.
https://www.facebook.com/Malayalivartha
