ആരാധകരുടെ മനസ്സിൽ വെണ്ണയുരുക്കി ബിടിഎസ്. കൊറിയന്‍ പോപ്ബാന്‍ഡായ ബിടിഎസിന്റെ പേരിലിറക്കിയ മീല്‍സിന് ഓര്‍ഡറുകള്‍ കുമിഞ്ഞ് കൂടി. ഇതോടെ ഫാസ്റ്റ് ഫൂഡ് ശൃംഖലയായ മക്‌ഡോണല്‍സിന്റെ ആറോളം ഇന്തോനേഷ്യന്‍ ഔട്ട്‌ലെറ്റുകള്‍ അടച്ചിടുന്നതായി റിപ്പോർട്ട്. പ്രതീക്ഷിക്കാത്ത അത്രയും ഓര്‍ഡറുകള്‍ മീല്‍സിന് എത്തിയതോടെയാണ് കുറച്ച് നാളത്തേക്ക് ഔട്ട്‌ലെറ്റുകള്‍ അടച്ചിടാന്‍ അധികൃതര്‍ തീരുമാനിച്ചിരിക്കുന്നത്.

അതോടൊപ്പം തന്നെ ഇന്തോനേഷ്യയുടെ സെമറാംഗിലുള്ള ആറ് ഔട്ട്‌ലെറ്റുകളില്‍ നാലെണ്ണം ഇതിനോടകം അടച്ചുകഴിഞ്ഞു. ബിടിഎസ് മീലിനായി ആളുകള്‍ തിക്കിത്തിരക്കാന്‍ തുടങ്ങിയതോടെ ഇവിടം കോവിഡ് ഹോട്ട്‌സ്‌പോട്ട് ആകുമോ എന്ന പേടിയിലാണ് നടപടി. മക്‌ഡോണല്‍സ് അടുത്തിടെ അവതരപ്പിച്ച തങ്ങളുടെ ബിടിഎസ് മീലിന് ലോകമെങ്ങും വന്‍ സ്വീകാര്യതയാണ് ലഭിച്ചുകൊണ്ടിരിക്കുന്നത്. പത്ത് ചിക്കന്‍ നഗ്ഗെറ്റസ്, ഫ്രൈസ്, കോക്ക്, രണ്ട് തരം സോസുകള്‍ എന്നിവയടങ്ങിയാണ് മീല്‍.

ബിടിഎസിന്റെ കഴിഞ്ഞ മാസം പുറത്തിറങ്ങിയ സിംഗിള്‍ ‘ബട്ടര്‍’ ലോകറെക്കോര്‍ഡ് തിരുത്തി 2020ലെ ബെസ്റ്റ് സെല്ലിംഗ് ആല്‍ബം എന്ന പേര് നേടിയിരുന്നു. സകല റെക്കോർഡുകളും തകർത്ത് ബിടിഎസ് മ്യൂസിക് വിഡിയോ ‘ബട്ടർ’ ആരാധകരുടെ ഹൃദയത്തിലേക്ക്... യൂട്യൂബിൽ അന്നോളം ഉണ്ടായിരുന്ന റെക്കോർഡുകൾ തകർത്താണ് പുതിയ വീഡിയോ എത്തിയിരിക്കുന്നത്. വിഡിയോ പ്രീമിയറിനായി കണ്ണുനട്ടിരുന്ന ആരാധകർ ആദ്യ 12 മിനിറ്റിൽ തന്നെ ഒരു കോടിയെന്ന മാന്ത്രിക സംഖ്യയുമായി ‘ബട്ടർ’ യുട്യൂബ് ഹിറ്റ് ചാർട്ടിലെത്തിയിരുന്നു. തുടക്കം മുതൽ തന്നെ ട്രെൻഡിങ്ങിൽ ഒന്നാമത്. ഏറ്റവും വേഗത്തിൽ ഇത്രയധികം വ്യൂ നേടുന്ന ആദ്യ മ്യൂസിക് വിഡിയോ കൂടിയാകുന്നു 'ബട്ടർ'.

കൂടാതെ ‘ഡൈനമറ്റി’നു ശേഷം ബിടിഎസിന്റെ രണ്ടാമത്തെ ഇംഗ്ലീഷ് മ്യൂസിക് വിഡിയോ കൂടിയാണ് ബട്ടർ. സംഗീതത്തിൽ മാത്രമല്ല ഫാഷനിലും കൊറിയൻ തരംഗം സൃഷ്ടിക്കുകയാണ് ബിടിഎസ് സംഘം ഇപ്പോൾ. ‘ബട്ടർ’ എത്തിയപ്പോൾ പാട്ടിൽ മാത്രമല്ല താരങ്ങളുടെ ലുക്കിലും ആരാധകരുടെ മനസ്സുടക്കിയിട്ടുണ്ട്. ഹെയർ സ്റ്റൈലിനും ഹെയർ കളറിലും പലപ്പോഴായി ഫാഷൻഗോളുകൾ സമ്മാനിക്കുന്നവരാണ് ഈ ഏഴംഗ സംഘം. ഇക്കുറി നീളൻ മുടിയിൽ പർപ്പിൾ നിറവും പുരികത്തിൽ ക്രിസ്റ്റൽ പിയേഴ്സിങ്ങും ചെയ്താണ് ‘കുക്കി’ എത്തിയിരിക്കുനന്ത്. മുടിയിഴകളിൽ പിങ്ക് അണിഞ്ഞ് ആർഎം, യൂണികോൺ നിറങ്ങളിൽ മുടിയൊരുക്കി ജിമീൻ, പഴയ ബ്ലോണ്ട് ലുക്കിലേക്കു മടങ്ങി ജെയ്ഹോപ്, അണ്ടർ കട്ട് ഹെയറുമായി ‘വി’ എന്നിവരും ഹെയർ സ്റ്റൈലിങ് പരീക്ഷണങ്ങൾക്കു വഴിയൊരുക്കുകയാണ്.

പുതിയ മ്യൂസിക് വിഡിയോയുടെ ലൈവ് പെർഫോമൻസിന് ഒരുങ്ങുകയാണ് സംഘം. ബിൽബോർഡ് മ്യൂസിക് അവാർഡ്സിനു വേണ്ടിയാണ് ബിടിഎസ് സംഘം ഈ വർഷത്തെ ആദ്യ ‘ബട്ടർ’ വേദിയിലെത്തുക.