ഇസ്രയേലില്‍ ഒരു വ്യാഴവട്ടം നീണ്ട ബെഞ്ചമിന്‍ നെതന്യാഹു യുഗത്തിന് അന്ത്യം കുറിച്ച്‌ യമിന പാര്‍ട്ടി അധികാരമേറ്റു.. ഇസ്രയേല്‍ പാര്‍ലമെന്റായ നെസെറ്റില്‍ നടന്ന വിശ്വാസ വോട്ടെടുപ്പില്‍ ഒരു വോട്ടിന്റെ നേരിയ ഭൂരിപക്ഷത്തിലാണ് നെതന്യാഹു സര്‍ക്കാരിനെ പരാജയപ്പെടുത്തി ഐക്യസര്‍ക്കാര്‍ അധികാരത്തിലെത്തിയിരിക്കുന്നത്.

ഈ ഭരണമാറ്റത്തിനൊപ്പം യാദൃശ്ചികമെന്നോണം ഒരു പ്രതീകാത്മക സംഭവം കൂടി ഉണ്ടായി. ഇസ്രായേലില്‍ പുതിയ സര്‍ക്കാരിന് അധികാരം നല്‍കിയ വോട്ടെടുപ്പിന് ശേഷം നെതന്യാഹു തനിക്ക് ഇനിയങ്ങോട്ട് അവകാശപ്പെട്ടതല്ലാത്ത പ്രധാനമന്ത്രിയുടെ കസേരയില്‍ തന്നെയാണ് അബദ്ധവശാല്‍ ഇരുന്നത്.

ഈ സംഭവത്തിന്റെ വീഡിയോ ഇപ്പോള്‍ സമൂഹ മാധ്യമങ്ങളില്‍ വൈറലായി കഴിഞ്ഞിട്ടുണ്ട്. ഒരു പതിറ്റാണ്ടിലേറെക്കാലം റെക്കോര്‍ഡ് സൃഷ്ടിച്ചുകൊണ്ട് ആ കസേരയില്‍ തുടര്‍ന്ന നെതന്യാഹു വോട്ടെടുപ്പില്‍ പരാജയപ്പെട്ടതിന് ശേഷവും തന്റെ ശീലം കൊണ്ടെന്ന വണ്ണം അബദ്ധവശാല്‍ പ്രധാനമന്ത്രി ഇരിക്കേണ്ട കസേരയില്‍ ഇരിക്കുകയായിരുന്നു.

പിന്നീട് അദ്ദേഹത്തോട് പ്രതിപക്ഷത്തിനായി സജ്ജമാക്കിയ ഭാഗത്തേക്ക് മാറിയിരിക്കാന്‍ ബന്ധപ്പെട്ട അധികൃതര്‍ ആവശ്യപ്പെടുകയായിരുന്നു. പഴയ ശീലങ്ങള്‍ മറക്കാന്‍ ബുദ്ധിമുട്ടായിരിക്കും എന്ന മട്ടിലുള്ള നിരവധി പ്രതികരണങ്ങളാണ് ഈ വീഡിയോയ്ക്ക് ലഭിച്ചു കൊണ്ടിരിക്കുന്നത്. രണ്ട് വര്‍ഷത്തിനിടയില്‍ നാല് തെരഞ്ഞെടുപ്പുകള്‍ക്ക് സാക്ഷ്യം വഹിച്ച ഇസ്രായേലില്‍ പുതിയ സര്‍ക്കാറിനെ സ്വാഗതം ചെയ്യാന്‍ ആയിരങ്ങളാണ് ടെല്‍ അവീവില്‍ എത്തിച്ചേര്‍ന്നത്.

"ഇസ്രായേലില്‍ ഒരു യുഗത്തിന്റെ അന്ത്യം ആഘോഷിക്കാനാണ് ഞാന്‍ എത്തിയിരിക്കുന്നത്", റാബിന്‍ സ്‌ക്വയറില്‍ ജനങ്ങളെ അഭിസംബോധന ചെയ്തുകൊണ്ട് ഇറേസ് ബിയെസുനര്‍ പറഞ്ഞു. "ഞങ്ങളെ വീണ്ടും ഒന്നിപ്പിക്കാന്‍ അവര്‍ മുന്‍കൈ എടുക്കണമെന്നാണ് ഞങ്ങള്‍ ആഗ്രഹിക്കുന്നത്", അദ്ദേഹം കൂട്ടിച്ചേര്‍ത്തു.

എന്നാല്‍, 59-നെതിരെ 60 വോട്ടുകളുടെ നേരിയ ഭൂരിപക്ഷത്തില്‍ നെതന്യാഹു സര്‍ക്കാരിനെ താഴെയിറക്കിയ സഖ്യം ഇടതുപക്ഷ, സെന്ററിസ്റ്റ്, വലതുപക്ഷ, അറബ് പാര്‍ട്ടികള്‍ ഒത്തുചേര്‍ന്ന മുന്നണിയാണ്. നെതന്യാഹുവിനെ അധികാരത്തില്‍ നിന്ന് പുറത്താക്കുക എന്ന ലക്ഷ്യമല്ലാതെ പൊതുവായി മറ്റു ഘടകങ്ങളൊന്നും പങ്കുവെയ്ക്കാത്ത രാഷ്ട്രീയ പാര്‍ട്ടികളാണ് ഇവ. അത് ഈ സര്‍ക്കാരിന്റെ ദൗര്‍ബല്യത്തെ സൂചിപ്പിക്കുന്നതായി ചൂണ്ടിക്കാണിക്കപ്പെടുകയാണ്.