യൂറോപ്പിലെ രാജകുടുംബവും അവരുടെ ജീവിത രീതികളും വിശേഷങ്ങളുമൊക്കെ ലോക മാധ്യമങ്ങള്‍ക്ക് എന്നും വാര്‍ത്തയാണ്. അവരുടെ സ്വകാര്യ പൊതു ജീവിതം വരെ ഇത്തരത്തില്‍ വാര്‍ത്തയാകാറുണ്ട്. ഇപ്പോഴിത നെതര്‍ലാന്‍ഡിലെ രാജകുമാരി കാതറിന അമേലിയയുടെ തീരുമാനമാണ് യൂറോപ്പിലെ പ്രധാന ചര്‍ച്ചാവിഷയം.

സാധാരണ രാജകുടുംബത്തിലെ അംഗത്തില്‍ നിന്നുണ്ടാകുന്നതില്‍ നിന്നും തീര്‍ത്തും വ്യത്യസ്തമായ തീരുമാനമാണ് അമേലിയയുടെത്.മറ്റൊന്നുമല്ല തന്റെ ചെലവിനായി വര്‍ഷാവര്‍ഷം അനുവദിക്കുന്ന ഭീമമായ തുക തനിക്ക് വേണ്ടെന്ന ധീരമായ തീരുമാനമാണ് ലോകം ഹൃദയത്തിലേറ്റിയത്.

നെതര്‍ലാന്‍ഡ് രാജാവ് വില്യം അലക്‌സാണ്ടറിന്റെയും മാക്‌സിമ രാജ്ഞിയുടെയും മൂത്ത മകളാണ് കാതറിന അമേലിയ. വരുന്ന ഡിസംബറില്‍ അമേലിയക്ക് 18 വയസ് പൂര്‍ത്തിയാകും. പ്രായ പൂര്‍ത്തിയാകുന്നതോടെ നെതര്‍ലാന്‍ഡിലെ നിയമമനുസരിച്ച്‌ രാജ്ഞിയുടെ ചുമതലകള്‍ കാതറിന അമേലിയ ഏറ്റെടുക്കണം.

ഇതിനായി പ്രതിവര്‍ഷം 1.9 മില്യണ്‍ ഡോളര്‍ കാതറിനയ്ക്ക് നല്‍കും.ഈ സാഹചര്യത്തിലാണ് പൂര്‍വികരുടെ പാതയൊന്നും പിന്തുടരാന്‍ തനിക്ക് ഉദ്ദേശമില്ലെന്ന് 17കാരിയായ അമേലിയ അസന്ദിഗ്ധമായി പ്രഖ്യാപിക്കുന്നത്.

ഇതിന്റെ ആദ്യപടിയായി വാര്‍ഷിക ചെലവിനായി തനിക്ക് അനുവദിക്കുന്ന 2 മില്യണ്‍ ഡോളര്‍ (14 കോടി രൂപ) രാജകുമാരി നിരസിച്ചു.കഴിഞ്ഞ ദിവസം ഡച്ച്‌ പ്രധാനമന്ത്രി മാര്‍ക്ക് റുട്ടേയ്ക്ക് അയച്ച കത്തിലാണ് രാജകുമാരി തന്റെ നയം വ്യക്തമാക്കിയത്.കാതറിന അമേലിയയുടെ കത്തില്‍ പറയുന്നത് ഇങ്ങനെ: 2021 ഡിസംബര്‍ 7ന് എനിക്ക് 18 വയസ്സാകും.

നിയമമനുസരിച്ച്‌ ചെലവിനായി നിശ്ചിത തുക നല്‍കും. എന്നാല്‍ രാജ്യത്തിനു ഈ തുക തിരിച്ചു നല്‍കാനായി ഞാന്‍ ഒന്നും ചെയ്യുന്നില്ല. മാത്രമല്ല, കൊറോണ വൈറസ് വെല്ലുവിളി നേരിടുന്ന സാഹചര്യത്തില്‍ മറ്റു വിദ്യാര്‍ത്ഥികള്‍ വലിയ പ്രതിസന്ധിയിലൂടെയാണ് കടന്നു പോകുന്നത്. അമേലിയ കത്തില്‍ വ്യക്തമാക്കുന്നു.

വിദ്യാര്‍ത്ഥിയായിരുന്ന കാലത്ത് രാജകുടുംബാംഗം എന്ന നിലയില്‍ തനിക്ക് ലഭിച്ച നാലുലക്ഷം ഡോളര്‍ തിരികെ നല്‍കാനാണ് തീരുമാനമെന്നും കാതറിന അമേലിയ കത്തിലൂടെ അറിയിച്ചു. ഓറഞ്ചിന്റെ രാജകുമാരി എന്ന നിലയില്‍ കൂടുതല്‍ ചെലവ് ഉണ്ടാകുന്നതുവരെ ജീവിത ചെലവിനായുള്ള തുക കൈപ്പറ്റില്ലെന്നും അമേലിയ വ്യക്തമാക്കി. കോളേജ് പഠനത്തിനു മുന്‍പായി ഒരുവര്‍ഷം അവധിയെടുക്കാനാണ് രാജകുമാരിയുടെ തീരുമാനം.