പാകിസ്ഥാനിലെ അഫ്ഗാന്‍ സ്ഥാനപതിയുടെ മകളെ തട്ടിക്കൊണ്ടു പോയതായി റിപ്പോര്‍ട്ട്. അഫ്ഗാനിസ്ഥാന്‍ സര്‍ക്കാര്‍ ഔദ്യോഗികമായി വിവരം സ്ഥിരീകരിച്ചിട്ടുണ്ട്. അഫ്ഗാന്‍ സ്ഥാനപതിയായ നജീബുള്ള അലികിലിന്റെ മകളെയാണ് തട്ടിക്കൊണ്ടു പോയത്.

ക്രൂരമായി മര്‍ദ്ദിച്ച ശേഷം പെണ്‍കുട്ടിയെ വഴിയില്‍ ഉപേക്ഷിച്ചതായും നിലവില്‍ ആശുപത്രിയില്‍ പ്രവേശിപ്പിച്ചെന്നും സ്ഥിരീകരിക്കാത്ത റിപ്പോര്‍ട്ടുകളുണ്ട്. കയ്യും കാലും കൂട്ടിക്കെട്ടിയ രീതിയിലാണ് കണ്ടെത്തിയത്. അടുത്തത് നിന്റെ ഊഴമാണ് എന്നെഴുതിയ ടിഷ്യൂ പേപ്പറും പെണ്‍കുട്ടിയുടെ ശരീരത്തില്‍ നിന്ന് കണ്ടെത്തി. അനുജന് സമ്മാനം വാങ്ങാനായി പുറത്തിറങ്ങിയ പെണ്‍കുട്ടിയെയാണ് തട്ടിക്കൊണ്ടു പോയത്. അതീവ നയതന്ത്ര പ്രാധാന്യമുള്ള സുരക്ഷിത സ്ഥലത്ത് നിന്നാണ് പെണ്‍കുട്ടിയെ തട്ടിയെടുത്തത്.
സംഭവത്തെ ശക്തമായി അപലപിക്കുന്നതായി അഫ്ഗാനിസ്ഥാന്‍ വിദേശകാര്യമന്ത്രാലയം പ്രസ്താവനയില്‍ പറഞ്ഞു. അഫ്ഗാന്‍ സ്ഥാനപതിയുടേയും കുടുംബാംഗങ്ങളുടേയും സുരക്ഷ പാകിസ്ഥാന്റെ ഉത്തരവാദിത്വമാണ്. ഈ വീഴ്ച്ച എന്തുകൊണ്ടുണ്ടായി എന്ന് അന്വേഷിച്ച് ഉത്തരവാദികളായവര്‍ക്കെതിരെ കര്‍ശന നടപടി സ്വീകരിക്കണമെന്ന് അഫ്ഗാനിസ്ഥാന്‍ ആവശ്യപ്പെട്ടു. അന്താരാഷ്ട്ര മാനദണ്ഡങ്ങളും നിയമങ്ങളും അനുസരിച്ച് പാകിസ്ഥാന്‍ എത്രയും പെട്ടെന്ന് നടപടിയെടുക്കണമെന്നും അഫ്ഗാനിസ്ഥാന്‍ പ്രസ്താവനയില്‍ കൂട്ടിച്ചേര്‍ത്തു.