കഴിഞ്ഞ കുറച്ച് ദിവസങ്ങളായി കനത്ത മഴയെ തുടര്‍ന്ന് ചൈനയില്‍ ഉണ്ടായ മണ്ണിടിച്ചിലിലും വെള്ളപ്പൊക്കത്തിലും വ്യാപക നാശനഷ്ടം റിപ്പോർട്ട് ചെയ്തു. പ്രകൃതി ക്ഷോഭത്തില്‍ ഇതുവരെ 33 പേര്‍ മരിച്ചതായും എട്ടുപേരെ കാണാതായതായും ചൈനീസ്​ മാദ്ധ്യമങ്ങള്‍ റിപ്പോര്‍ട്​ ചെയ്യുകയുണ്ടായി.

മധ്യചൈനയിലെ ജനസാന്ദ്രത കൂടുതലുള്ള ഹെനാന്‍ പ്രവിശ്യയിലെ ഷെങ്​സൂവിലാണ്​ ഏറ്റവും കൂടുതല്‍ നാശനഷ്ടങ്ങള്‍ സംഭവിച്ചിരിക്കുന്നത്. അപ്രതീക്ഷിതമായുണ്ടായ വെള്ളപ്പൊക്കത്തില്‍ പലരും ഓഫിസുകളിലും സ്​കൂളുകളിലും അപാര്‍ട്​മെന്റുകളിലും കുടുങ്ങിയിട്ടുണ്ട്.

വെപ്പൊക്കത്തിൽ നൂറുകണക്കിന് വാഹനങ്ങള്‍ ഒലിച്ചുപോയി. ഇതിനിടെ പ്രളയതീവ്രത കുറക്കാന്‍ ഹെനാന്‍ പ്രവിശ്യയിലെ ഡാം തുറന്നുവിട്ടു. ഇവിടെ മൂന്നു ദിവസത്തിനിടെ 640 മീല്ലിമീറ്റര്‍ മഴയാണ്​ പെയ്​തത്. 1.2 കോടി ജനസംഖ്യയുള്ള ഷെങ്​സൂവില്‍ 14 ലക്ഷം പേര്‍ പ്രളയ ദുരിതത്തിലാണെന്നാണ് പ്രാഥമിക വിവരം. ​ഇവിടെയുള്ള ബുദ്ധതീര്‍ഥാടന കേന്ദ്രമായ ഷാഓലിന്‍ ക്ഷേത്രമടക്കം വെള്ളത്തിനടിയിലായി.