വിശ്വ കായിക മഹാമഹത്തിന് അരങ്ങൊരുങ്ങി..... ടോക്യോ ഒളിമ്പിക്‌സിന് ഇന്ന് വൈകിട്ട് ഇന്ത്യന്‍ സമയം 4.30നാണ് ഔദ്യോഗിക തുടക്കമാകും, സംഗീതവും നൃത്തവുമെല്ലാം ഉദ്ഘാടന വേദിയില്‍ നിറയും.... കൊവിഡ് പ്രതിരോധത്തിന്റെ ഭാഗമായി കാണികളില്ലാതെയാണ് ഇത്തവണ മത്സരങ്ങള്‍ നടത്തുക, ഒളിമ്പിക്‌സിന്റെ ഉദ്ഘാടനച്ചടങ്ങിലെ മാര്‍ച്ച് പാസ്റ്റില്‍ ഇന്ത്യയെ പ്രതിനിധീകരിച്ച് 22 കായിക താരങ്ങള്‍
വിശ്വ കായിക മഹാമഹത്തിന് അരങ്ങൊരുങ്ങി..... ഒരുമയുടെ കരുത്തോടെ മഹാമാരിക്കാലത്തെ പൊരുതിക്കീഴടക്കുക എന്ന സന്ദേശം പകരുന്ന ടോക്യോ ഒളിമ്പിക്‌സിന് ഇന്ന് വൈകിട്ട് ഇന്ത്യന്‍ സമയം 4.30നാണ് ഔദ്യോഗിക തുടക്കമാവുക.
ചരിത്രത്തിലാദ്യമായി രണ്ട് ഒളിമ്പിക്‌സുകള്‍ക്ക് വേദിയാകുന്ന ആദ്യ ഏഷ്യന്‍ നഗരമെന്ന ഖ്യാതി നേടിയെടുത്താണ് ടോക്യോ വിശ്വ കായിക മഹാമഹത്തിന് അരങ്ങൊരുക്കിയിരിക്കുന്നത്.
1964ലെ ഒളിമ്ബിക്‌സിന്റെ ഉദ്ഘാടനച്ചടങ്ങുകള്‍ക്ക് വേദിയായ നാഷണല്‍ സ്‌റ്റേഡിയത്തിലാണ് ഇത്തവണയും മാര്‍ച്ച് പാസ്റ്റ് ഉള്‍പ്പടെ നടക്കുന്നത്. സംഗീതവും നൃത്തവുമെല്ലാം ഉദ്ഘാടന വേദിയില്‍ നിറയുമെങ്കിലും കാണാന്‍ ഗാലറിയില്‍ ആരുമുണ്ടാകില്ല. കൊവിഡ് പ്രതിരോധത്തിന്റെ ഭാഗമായി കാണികളില്ലാതെയാണ് ഇത്തവണ മത്സരങ്ങളും നടത്തുന്നത്.
127 അത്‌ലറ്റുകളടങ്ങുന്ന ചരിത്രത്തിലെതന്നെ ഏറ്റവും വലിയ സംഘത്തെയാണ് ഇന്ത്യ ടോക്യോയിലേക്ക് നിയോഗിച്ചിരിക്കുന്നത്. 2012 ലണ്ടന്‍ ഒളിമ്ബിക്‌സില്‍ വെങ്കലമെഡല്‍ നേടിയ വനിതാ ബോക്‌സിംഗ് ഇതിഹാസം എം.സി മേരികോമും പുരുഷ ഹോക്കി ടീം ക്യാപ്ടന്‍ മന്‍പ്രീത് സിംഗുമാണ് മാര്‍ച്ച് പാസ്റ്റില്‍ ഇന്ത്യന്‍ പതാകയേന്തുന്നത്.
അതേസമയം ഒളിമ്പിക്‌സിന്റെ ഉദ്ഘാടനച്ചടങ്ങിലെ മാര്‍ച്ച് പാസ്റ്റില്‍ ഇന്ത്യയെ പ്രതിനിധീകരിച്ച് 22 കായിക താരങ്ങള്‍ മാത്രമേ പങ്കെടുക്കുകയുള്ളൂ.ആറ് ഒഫിഷ്യല്‍സും മാര്‍ച്ച് പാസ്റ്റില്‍ അണിനിരക്കും.
കൊവിഡ് പ്രോട്ടോക്കോള്‍ പാലിക്കേണ്ടതിനാല്‍ പരമാവധി ആളെക്കുറച്ചാണ് ഉദ്ഘാടനച്ചടങ്ങ് നടത്തുക. മാര്‍ച്ച് പാസ്റ്റില്‍ ഒളിമ്ബിക് മെഡല്‍ ജേതാവായ വനിതാ ബോക്‌സിംഗ് താരം എം.സി മേരികോമും പുരുഷ ഹോക്കി ടീം ക്യാപ്ടന്‍ മന്‍പ്രീത് സിംഗുമാണ് ഇന്ത്യന്‍ പതാകയേന്തുക. ഉദ്ഘാടനച്ചടങ്ങുകള്‍ ജാപ്പനീസ് സമയം അര്‍ദ്ധരാത്രി കഴിഞ്ഞാണ് അവസാനിക്കുക എന്നതിനാല്‍ ശനിയാഴ്ച രാവിലെ മത്സരമുള്ള ഇന്ത്യന്‍ താരങ്ങള്‍ ഒഴിവാക്കി.
ഹോക്കി ടീമിനും ശനിയാഴ്ച രാവിലെയാണ് ആദ്യ മത്സരം. ദേശീയപതാക ഏന്തേണ്ടതിനാല്‍ മാത്രമാണ് മന്‍പ്രീത് പങ്കെടുക്കുന്നത്. ഹോക്കി ടീമില്‍ നിന്ന് മറ്റാരും മാര്‍ച്ച് പാസ്റ്റില്‍ പങ്കെടുക്കാനുണ്ടാവില്ല. ബോക്‌സിംഗില്‍ നിന്ന് എട്ടു പേരും ടേബിള്‍ ടെന്നിസ്,സെയ്‌ലിംഗ് എന്നിവയില്‍ നിന്ന് നാലുതാരങ്ങള്‍ വീതവും റോവിംഗില്‍ നിന്ന് രണ്ടുപേരും ഹോക്കി,ജിംനാസ്റ്റിക്‌സ്,ഫെന്‍സിംഗ്,സ്വിമ്മിംഗ് എന്നിവയില്‍ നിന്ന് ഓരോരുത്തരും ഇന്ത്യയെ പ്രതിനിധീകരിച്ച് മാര്‍ച്ച് പാസ്റ്റില്‍ അണിനിരക്കും. അവസാനനിമിഷം താരങ്ങളുടെ എണ്ണത്തില്‍ കുറവുണ്ടായേക്കാമെന്നും ഐ.ഒ.എ സൂചന നല്‍കി.
ആഗസ്റ്റ് എട്ടിന് നടക്കുന്ന സമാപനച്ചടങ്ങില്‍ ഗുസ്തിതാരം ബജ്‌റംഗ് പൂനിയയാണ് ദേശീയ പതാകയേന്തുക.
"
https://www.facebook.com/Malayalivartha
