അമേരിക്കന്‍ മുന്‍ പ്രസിഡന്റ് ഡോണള്‍ഡ് ട്രംപ് തന്റെ അക്കൗണ്ട് പുനഃസ്ഥാപിക്കാന്‍ ട്വിറ്ററിനോട് നിര്‍ദേശിക്കണമെന്ന ആവശ്യവുമായി കോടതിയില്‍ . പ്രസിഡന്റ് തെരഞ്ഞെടുപ്പിനോടനുബന്ധിച്ച് യുഎസ് കാപ്പിറ്റോള്‍ ഹില്ലില്‍ ട്രംപ് അനുകൂലികള്‍ നടത്തിയ അതിക്രമങ്ങള്‍ക്കു പിന്നാലെയാണ് ട്രംപിന്റെ ട്വിറ്റര്‍ അക്കൗണ്ട് ഉള്‍പ്പെടെ സമൂഹമാധ്യമ അക്കൗണ്ടുകള്‍ മരവിപ്പിച്ചത്.


കാപ്പിറ്റോള്‍ അക്രമത്തിന് പ്രേരിപ്പിച്ചെന്ന് ചൂണ്ടിക്കാട്ടിയായിരുന്നു നടപടിയെടുത്തത്. തനിക്കെതിരായ നടപടി നിയമവിരുദ്ധമാണെന്നും തന്റെ രാഷ്ട്രീയ കാഴ്ചപ്പാടുകളെ നിയമവിരുദ്ധമായി നിശബ്ദമാക്കുന്നുവെന്നും ആരോപിച്ച് ജൂലൈയില്‍ ട്വിറ്റര്‍, ഫേസ്ബുക്ക്, ഗൂഗിള്‍ എന്നിവയ്ക്കെതിരെയും അവരുടെ ചീഫ് എക്‌സിക്യൂട്ടീവുകള്‍ക്കെതിരെയും ട്രംപ് കേസ് കൊടുത്തിരുന്നു.

അതേസമയം യുഎസ് ഭീകരസംഘടനയായി കരുതുന്ന താലിബാന് പോലും ട്വിറ്റര്‍ അക്കൗണ്ട് ഇപ്പോഴും അനുവദിച്ചിട്ടുണ്ട്. ട്രംപിന് അക്കൗണ്ട് നിഷേധിക്കുകയും താലിബാന് അനുവദിക്കുകയും ചെയ്യുന്നതില്‍ പരിഹാസ്യമായി പൊരുത്തക്കേടുണ്ടെന്നും ട്രംപ് ഹര്‍ജിയില്‍ പറയുന്നു.