സിനിമ ഷൂട്ടിങ്ങിനായി ബഹിരാകാശത്തേക്ക്​ യാത്രതിരിച്ച്‌​ റഷ്യന്‍ സംഘം. ബഹിരാകാശത്ത്​ ചിത്രീകരിക്കുന്ന ആദ്യ സിനിമയാണിത്​. ചലഞ്ച്​ എന്നി സിനിമക്കായി നടി യൂലിയ പെരേസില്‍ഡും സംവിധായകന്‍ കിം ഷിപെന്‍കോയുമാണ്​ സംഘത്തിലുള്ളത്​.

ഹൃദയസംബന്ധമായ രോഗം ബാധിച്ച ബഹിരാകാശ സഞ്ചാരിയുടെ ജീവന്‍ രക്ഷിക്കാനായി പുറപ്പെടുന്ന ​​ഡോക്​ടറുടെ കഥയാണ്​ സിനിമ പറയുന്നത്​. റഷ്യന്‍ സോയുസ്​ സ്​പേസ്​ ക്രാഫ്​റ്റിലാണ്​ കസാഖ്​സ്​ഥാനിലെ റഷ്യന്‍ സ്​പേസ്​ സെന്‍ററില്‍നിന്ന്​ സംഘം പുറപ്പെട്ടത്​. ബഹിരാകാശ യാത്രികനായ ആന്‍റണ്‍ ഷ്​കപ്ലറേവും ഒപ്പമുണ്ട്​. ബഹിരാകാശത്ത്​ സുരക്ഷിതമായി എത്തിയെന്നാണ്​ റിപ്പോര്‍ട്ട്​. 12 ദിവസത്തെ ഷൂട്ടിങ്​ കഴിഞ്ഞ്​ ഇവര്‍ മടങ്ങും.