കഴിഞ്ഞ ദിവസം ദീപാവലിക്ക് പകരം ഹോളി ആശംസകള്‍ നേര്‍ന്ന് പുലിവാല് പിടിച്ചിരിക്കുകയാണ് പാകിസ്ഥാന്‍ മന്ത്രി. പാകിസ്ഥാനിലെ സിന്ധ് മുഖ്യമന്ത്രി സയീദ് മുറാദ് അലി ഷായാണ് സംസ്ഥാനത്തെ ഹിന്ദു വിഭാഗങ്ങള്‍ക്ക് ദീപാവലി ദിനത്തില്‍ ഹോളി ആശംസിച്ചുകൊണ്ട് രംഗത്ത് എത്തിയത്.

ട്വിറ്ററിലൂടെയാണ് മന്ത്രി ഹോളി ആശംസ അറിയിച്ചത്. എന്നാൽ ആശംസയുടെ സ്ക്രീന്‍ഷോട്ട് സാമൂഹിക മാധ്യമങ്ങളില്‍ പ്രചരിക്കുകയാണ്. ഹിന്ദുക്കള്‍ ധാരാളമുള്ള സിന്ധിലെ മുഖ്യമന്ത്രിയുടെ അറിവില്ലായ്മ ചൂണ്ടിക്കാട്ടി നിരവധി പേരാണ് രംഗത്ത് വന്നിരിക്കുന്നത്.

എന്നാൽ മന്ത്രിയല്ല, അദ്ദേഹത്തിന്റെ സ്റ്റാഫാണ് ട്വീറ്റ് ചെയ്തതെന്നാണ് മന്ത്രിസഭയുമായി ബന്ധപ്പെട്ട വൃത്തങ്ങള്‍ നല്‍കുന്ന വിശദീകരണം നൽകിക്കൊണ്ട് രംഗത്ത് എത്തി. മന്ത്രിയുടെ സ്റ്റാഫിനും സാമാന്യ ബോധമില്ലേയെന്നും വിമര്‍ശകര്‍ ചോദ്യം ഉന്നയിച്ചു. 8.73 ശതമാനം ഹിന്ദു ജനസംഖ്യയുള്ള സംസ്ഥാനമാണ് സിന്ധ്.

അതേസമയം പാകിസ്ഥാന്‍ പീപ്പിള്‍സ് പാര്‍ട്ടിയിലെ മന്ത്രിയാണ് സയീദ് മുറാദ് അലി. വിമര്‍ശനങ്ങളും പരിഹാസങ്ങളും ഉയര്‍ന്നതോടെ ട്വീറ്റ് പിന്‍വലിച്ച്‌ വിവാദം ഒഴിവാക്കിയിരിക്കുകയാണ് മന്ത്രി. ഇതുമായി ബന്ധപ്പെട്ട് സര്‍ക്കാരിന്റെ ഭാഗത്ത് നിന്നും ഔദ്യോഗിക വിശദീകരണമൊന്നും വന്നിട്ടില്ല എന്നാണ് അറിയാൻ കഴിയുന്നത്.